Read Bilaspuri 1 कुरिन्थियों 6 Bible Online

1 कुरिन्थियों 6 - Bilaspuri bible

1 कुरिन्थियों 6

¹जे तुहां लोकां च आपसी झगड़ा हो, तां तुहें न्याय रे खातर पवित्र लोकां ले नीं बल्कि अधर्मी लोकां ले जाणे री हिम्मत कियां करी सक्कां ये?

²क्या तुहें नीं जाणदे भई पवित्र लोकां संसारा रा न्याय करना? इस खातर जे तुहौं संसारा रा न्याय करना, तां क्या तुहें छोट्टे-छोट्टे झगड़यां रा न्याय करने रे लायक बी नींये?

³क्या तुहें नीं जाणदे भई अहां दूतां रा न्याय करना? तां तिसरिया तुलना च जिन्दगिया रे हर रोज के छोट्टे-मोटे झगड़े क्या ये?

⁴इस खातर जे तुहां लोकां च येढ़ा कोई झगड़ा हो, तां तुहें कांह् येढ़े लोकां जो न्याय करने खातर बिठायें सै जे कलीसिया च नीच समझे जायें?

⁵हऊँ तुहांजो शर्मिन्दा करने खातर ये बोलां। क्या सच्चीजो तुहां च इक बी बुद्धिमान माहणु नींआ, सै जे अपणे साथी विश्वासियां रे झगड़यां रा न्याय करी सक्को?

⁶बरन इक विश्वासी दुज्जे विश्वासिये रे खिलाफ मुकद्दमा कराँ, कने सै बी अविश्वासिये रे सामणे।

⁷सच्चीजो तुहां च बड्डा दोष त येआ, भई तुहें अप्पूँ चियें मुकद्दमा कराँ ये इसरा मतलब तुहें मसीह लोकां साई नीं जीआ राँये। तां तुहें अन्याय कैं नीं सही लेन्दे? अपणा नुक्शान कैं नीं हुणे देन्दे?

⁸पर इसते उलट तुहें खुद अन्याय कराँ ये कने नुक्शान कराँ ये, कने सै बी साथी विश्वासियां ने।

⁹क्या तुहें नीं जाणदे भई अन्यायी लोक परमेशरा रे राज्जा रे वारस नीं हुणे? खुद अप्पूँजो धोखा नीं देआ, नां वैश्यगामी, नां मूर्तीपूजक, नां पराई जनाना ने गल़त करना, नां लुच्चे, नां पुरुषगामी,

¹⁰नां चोर, नां लालची, नां पियक्कड़, नां गाल़ी देणे औल़े, नां अन्धेर करने औल़े परमेशरा रे राज्जा रे वारस हुणे।

¹¹कने तुहां चते किछ लोक येढ़े इ थे, पर तुहें प्रभु यीशुये रे नौआं ते कने अहांरे परमेशरा रे आत्मा रे जरिये पापां ते धोये गैईरे कने पवित्र कित्ते गये कने धर्मी घोषित कित्ते गये।

¹²तुहां चते किछ लोक ये बोलां ये, “मिन्जो सब किछ करने री अनुमति हाई,” पर सब किछ फायदे रा निआं; “मिन्जो सब किछ करने री अनुमति हाई,” पर मांह किसी चीजा रा गुलाम नीं हूणा।

¹³तुहां चते किछ लोक ये बोलां ये, “रोटी पेट्टा रे खातर इ कने पेट रोटिया रे खातर आ,” पर परमेशरा दुईं जो नाश करना। शरीर व्यभिचारा खातर नींआ, पर प्रभुये खातर आ; कने प्रभु शरीरा रे खातर आ।

¹⁴परमेशरे अपणिया सामर्था ने प्रभुये जो जिऊंदा कित्या, कने तिसा इ सामर्था ने तिस अहें बी जिऊंदा करने,

¹⁵क्या तुहें नीं जाणदे भई तुहांरा शरीर मसीह रे अंग ये? तां क्या हऊँ मसीह रे अंग लेईने तिन्हांजो वेश्यां रे अंग बणाऊं? कदी मनी।

¹⁶क्या तुहें नीं जाणदे भई तिसरा मिलन जे वेश्या ने हुआं, सै तिसाने सौगी इक शरीर हुई जां? काँह्भई पवित्रशास्त्रा च लिखिरा, “सै दोन्नों इक शरीर होणे।”

¹⁷कने सै जे प्रभुये री संगतिया च रैआं, सै तिसने सौगी इक आत्मा हुई जां।

¹⁸व्यभिचारा ते दूर रौआ। माहणुये रे सारे दुज्जे पाप तिसरे शरीरा ते बाहर ये, पर व्यभिचार करने औल़ा अपणे इ शरीरा रे बरोधा च पाप कराँ।

¹⁹क्या तुहें नीं जाणदे भई तुहांरा शरीर पवित्र आत्मा रा मन्दर आ; सै जे तुहां च बसीरा कने तुहांजो परमेशरा रिया तरफा ते मिलीरा? कने तुहें अपणे नींये,

²⁰काँह्भई तुहांजो दाम देईने खरीदया गईरा, इस खातर अपणे शरीरा रे जरिये परमेशरा री महिमा करा।