Read Bilaspuri 1 कुरिन्थियों 9 Bible Online

1 कुरिन्थियों 9 - Bilaspuri bible

1 कुरिन्थियों 9

¹क्या हऊँ अजाद माहणु निआं? क्या हऊँ प्रेरित निआं? क्या मैं यीशुये जो सै जे अहांरा प्रभु आ, नीं देख्या? क्या तुहें प्रभुये च मेरिया मेहणता रा नतीजा नींये?

²हलाँकि हऊँ दुज्यां खातर प्रेरित निआं; तां बी तुहां खातर तां हया! काँह्भई प्रभुये च तुहांरा विश्वास ये साबित कराँ भई हकीकत च हऊँ इक प्रेरित आ।

³सै लोक जे मेरे अधिकारा पर इल्जाम लगां ये, तिन्हां खातर येई मेरा जबाब आ।

⁴क्या अहांजो तुहांरे खाणे-पीणे च शामिल हुणे रा अधिकार निआं?

⁵क्या अहौं दुज्यां प्रेरितां साई, प्रभुये रे भाईयां कने कैफा साई अप्पूँ सौगी अपणी विश्वासी पत्निया जो ले जाणे रा अधिकार निआं?

⁶क्या सिर्फ मिन्जो कने बरनबासा जोई अपणा जीवन जीणे खातर काम्म करना जरूरी आ?

⁷येढ़ा कुण सिपाई आ सै जे अपणे खर्चे ते फौजा च सेवा कराँ? कुण अंगूरां रा बगीचा लाईने तिसरा फल़ नीं खांदा? कुण भेडां री रखवाली करीने तिन्हांरा दुध नीं पींदा?

⁸ये गल्ल हऊँ आम जीवना रे उदाहरणां पर इ नीं बोल्या राँ बल्कि मूसा री व्यवस्था बी येई गल्ल बोलां इ।

⁹काँह्भई मूसा रिया व्यवस्था च लिखिरा, “गाहणी रे वगत चलदे बल़दा रा मुँह नीं बन्हणा।” क्या परमेशर बल़दां री ही चिन्ता कराँ? नां।

¹⁰या खास करीने अहांरे खातर बोलां? हाँ, ये अहांरे खातर इ लिख्या गया था, काँह्भई ठीक आ भई बाहणे औल़ा आशा ने बांह कने गाहणे औल़ा अपणिया फसला रा हिस्सा पाणे रिया आशा च गाहण गाँह।

¹¹इस खातर जे अहें तुहांरे बिच आत्मिक ब्यू बाहीरा, तां क्या ये कोई बड्डी गल्ल इ भई तुहांरी भौतिक फसल कट्टिये?

¹²जे दुज्यां जो तुहां पर ये अधिकार आ, तां क्या अहांरा अधिकार तिसते बधीने नीं हूणा? फेरी बी अहें इस अधिकारा रा इस्तेमाल नीं कित्या। इसरे उलट अहें सब किछ सैया भई अहांरे जरिये किति मसीह रिया खुशखबरिया रे प्रचारा च कोई रुकाबट नीं आओ।

¹³क्या तुहें नीं जाणदे भई सै जे मन्दरा च सेवा कराँ ये, तिसरा खाणा-पीणा मन्दरा तेई हुआं; कने सै जे वेदिया री सेवा कराँ ये, सै वेदिया पर बल़ि कित्ती रियां चीजां च हिस्सेदार हुआं ये?

¹⁴इसा इ रितिया ते प्रभुये बी हुक्म दित्तिरा भई सै जे लोक खुशखबरिया रा प्रचार कराँ ये, तिन्हांरी जीविका खुशखबरी सुणने औल़यां तेई हूणी चाहिन्दी।

¹⁵पर मैं इन्हां चते कोई बी अधिकार इस्तेमाल नीं कित्तिरा, कने हऊँ ये गल्लां इस खातर नीं लिख्यां रा भई मेरे खातर येढ़ा कित्या जाओ, बजाये इसरे भई कोई माहते तिन्हां गल्लां जोई खोई लो तिसरा जे मिन्जो गर्व आ, इसते त हऊँ मरना ही ठीक समझां।

¹⁶फेरी बी ताहली जे हऊँ खुशखबरिया रा प्रचार कराँ, तां हऊँ घमण्ड नीं करी सकदा, काँह्भई हऊँ त ये करने जो मजबूर आ। जे हऊँ खुशखबरी नीं सुणांऊ तां मांह पर धिक्कार आ!

¹⁷काँह्भई जे हऊँ अपणिया इच्छा ते प्रचार कराँ, तां मिन्जो इसरा ईनाम मिलणा, कने जे अपणिया इच्छा ते प्रचार नीं करदा, तां बी मिन्जो सौपी रिया जिम्मेवारिया जो हऊँ पूरा कराँ।

¹⁸तां मेरा ईनाम क्या? ये: भई हऊँ मसीह री खुशखबरिया रा प्रचार मुख्ता च करदा रऊँ, कने खुशखबरिया च सै जे मेरा अधिकार आ तिस्सो हऊँ इस्तेमाल नीं करूँ।

¹⁹हलाँकि हऊँ अजाद आ फेरी बी मैं अप्पूँजो सब्बीं रा दास बणाईत्या ताकि बौहत लोकां जो मसीह च ल्याई सक्कूँ।

²⁰हऊँ यहूदियां खातर यहूदिये साई बणया ताकि यहूदियां जो ल्याई सक्कूँ। सै लोक जे व्यवस्था रे अधीन ये तिन्हांरे खातर हऊँ व्यवस्था रे अधीन लोकां साई बणया हलाँकि हऊँ खुद व्यवस्था रे अधीन नींआ ताकि तिन्हांजो ल्याई सक्कूँ सै जे व्यवस्था रे अधीन ये।

²¹सै लोक जे व्यवस्था रे अधीन नींये तिन्हांजो ल्याणे रे खातर हऊँ तिन्हां साई बणीग्या, हलाँकि हऊँ परमेशरा रिया व्यवस्था ते अजाद निआं, पर मसीह री व्यवस्था रे अधीन आ।

²²सै जे विश्वासा च कमजोर ये तिन्हांरे खातर हऊँ खुद कमजोर बणया ताकि कमजोराँ जो ल्याई सक्कूँ। हऊँ सब माहणुआं खातर सब किछ बणया भई किसी नां किसी तरिके ने किछ लोकां रा छुटकारा हुईजो।

²³हऊँ ये सब किछ खुशखबरिया खातर कराँ ताकि हऊँ दुज्यां लोकां ने तिसरियां आशीषां रा सहभागी हुई जाऊँ।

²⁴क्या तुहें नीं जाणदे भई दौड़ा च त सब दौड़ां ये, पर ईनाम इक्की जोई मिलां? इस खातर तुहें इयां दौड़ा भई ईनाम जित्तो।

²⁵हरेक पैहलवाण सब प्रकारा रा संयम कराँ; सै त इक मुर्झाणे औल़े मुकटा जो पाणे खातर ये सब किछ कराँ ये, पर अहें त तिस मुकटा खातर कराँ ये सै जे मुर्झान्दां निआं।

²⁶इस खातर हऊँ लक्ष्य हीन माहणुये साई नीं दौड़दा; कने हऊँ इक येढ़ा मुक्केबाज आ सै जे हवा च मुक्के नीं मारदा।

²⁷पर हऊँ अपणे शरीरा जो कष्ट देआं कने वशा च रखां, येढ़ा नीं हो भई होरीं जो प्रचार करीने हऊँ खुद ईनाम पाणे रे खातर निकम्मा नीं बणुँ।