Read Bilaspuri 2 कुरिन्थियों 11 Bible Online

2 कुरिन्थियों 11 - Bilaspuri bible

2 कुरिन्थियों 11

¹मेरी आशा इ भई तुहां मेरी छोट्टी जेई मूर्खता जो सैई लेणा, तियां जे हकीकत च तुहें इस वगत सैई बी रैयां ये।

²काँह्भई हऊँ तुहांरे बारे च चिन्तित आ तियां जे परमेशर चिन्ता कराँ। इस खातर मैं तुहांजो अपणे इकलौते पितिये रे रुपा च मसीह जो देणे रा वायदा कित्या था, हऊँ तुहांजो तिसरी पवित्र दुल्हना रे रुपा च देखणा चाँह।

³पर हऊँ डराँ भई तियां जे शैताने सर्पा रे रुपा च अपणिया चतुराईया ने हव्वा जो बैहकाया था, तियां इ किति तुहांरे मना जो मसीह रे प्रति तुहांरिया ईमानदारिया कने पवित्रता जो दूर नीं करी दो।

⁴जे कोई तुहांले आईने किसी दुज्जे यीशुये रा प्रचार करो तिसरा प्रचार जे अहें नीं कित्या, या कोई होर आत्मा तुहौं मिलो सै जे पैहले नीं मिलया था, या होर कोई खुशखबरी तिस्सो जे तुहें पैहले नीं मन्नया था, इन्हां सारियां शिक्षां जो ग्रहण करने च तुहें गल़त ये।

⁵हऊँ मन्नां भई हऊँ किसी गल्ला च बड्डे ते बड्डे प्रेरिता ते घट नींआ।

⁶हुई सक्कां हऊँ बोलणे च निपुण नींआ, पर ज्ञाना च हऊँ घट नींआ। अहें इसजो तुहौ हर गल्ला च साफ रुपा च दस्सीरा।

⁷कने फेरी मैं मुख्ता च परमेशरा रिया खुशखबरिया रा प्रचार करीने तुहांजो ऊच्चा चकणे रे खातर खुद अप्पूँजो झुकान्दे हुये, क्या कोई पाप कित्या?

⁸मैं होरीं कलीसियां ते अपणी मजदूरी ग्रहण कित्ती, ताकि हऊँ बिणा किसी कीमता ते तुहांरी सेवा करी सक्कूं। इसजो तुहें लुटणा मत बोल्ला।

⁹कने ताहली जे हऊँ तुहां सौगी था, तां बी पैसयां री जरूरत पौणे पर मैं किसी रे ऊपर कोई बोझ नीं पाया, काँह्भई मकिदुनिया प्रदेशा ते आईरे विश्वासी भाईयें मेरी पैसे री जरूरतां पूरी कित्तियां थी। मैं हर गल्ला पर खुद अप्पूँजो तुहां पर बोझ नीं बणने दित्या कने नांई कदीं बणने देणा।

¹⁰जे मसीह री सच्चाई माह ची, इस खातर अखाया प्रदेशा रे सारयां इलाकयां च मिन्जो गर्वा ने बोलणे ते कोई नीं रोकी सकदा।

¹¹काँह, मैं तुहांते पैसा नीं लैया? क्या इस खातर भई हऊँ तुहांजो प्यार नीं करदा? परमेशर जाणाँ, भई हऊँ तुहांजो प्यार कराँ।

¹²पर सै जे हऊँ करी रां तिसजो त माह करदे इ रैहणा, ताकि सै लोक सैई काम्म करने रे बारे च घमण्ड करने च सक्षम नीं हुणे सै जे अहे करी राँये।

¹³येढ़े लोक झूट्ठे प्रेरित ये कने छल़ा ने काम्म करने औल़े, सै मसीह रे प्रेरित हुणे रा ढोंग कराँ ये।

¹⁴इसच कोई हैरानिया री गल्ल नीं, काँह्भई शैतान बी त परमेशरा रे चमकणे औल़े दूता रा रुप धारण करी लेआं।

¹⁵इस खातर जे शैतान्ना रा सेवक बी भले काम्म करने औल़े सेवकां रा रुप धारण करी लो, तां इसच बड़ी गल्ल क्या इ? पर आखिर च तिन्हांजो अपणिया करनिया रे मुतावक सजा मिलणी।

¹⁶हऊँ फेरी बोलां, भई मिन्जो कोई मूर्ख नीं समझो, पर जे फेरी भीं तुहें येढ़ा समझा यें तां मिन्जो मूर्ख साई स्वीकार करी लवा, ताकि इसते मिन्जो बी गर्व करने रा मौका मिलणा।

¹⁷तां ते हऊँ इस तरिके ने अपणी बडयाई कराँ, तां हऊँ इक्की मूर्खा साई गल्ल करी रां कने येढ़ा घमण्ड प्रभु रिया तरफा ते नींआ।

¹⁸काँह्भई बौहत सारे लोक अपणी कामयाबिया पर धमण्ड कराँ ये, इस खातर मांह बी अपणिया कामयाबिया पर घमण्ड करना।

¹⁹तुहें सै जे अप्पूँजो समझदार मन्नां ये, पर तुहें मूर्खां रियां गल्लां जो सैई लैं।

²⁰काँह्भई जे कोई तुहांजो दास बणाये, तुहांरा शोषण करो, तुहांजो किसी जाल़ा च फसाये, अप्पूँजो तुहां ते बड्डा बणाये या तुहांरे मुँआं पर चपैड़ मारो, तां तुहें तिसजो सैहण करी लें।

²¹मिन्जो खुद शर्मिन्दा हुईने बोलणा पैईराँ भई अहें इस तरिके रा व्यवहार करने च बौहत जादा कमजोर ये। जे सै घमण्ड करी सक्कां ये, तां हऊँ बी घमण्ड करी सक्कां, पर ये करना मूर्खता इ।

²²क्या सै इब्रानी ये? तां हऊँ बी इब्रानी आ। क्या सै इस्राएली ये? तां हऊँ बी इस्राएली आ। क्या सै अब्राहम रे बंशा रे? तां हऊँ बी अब्राहम रे बंशा रा।

²³क्या सैई मसीह रे सेवक ये? हऊँ पागला साई बोलां, हऊँ त तिन्हांते बी बड्डा मसीह रा दास आ! मैं तिन्हांते बौहत कठण मेहणत कित्तिरी; हऊँ कई बार जेल्ला गया; मिन्जो अनगिणत बार कुट्टया गया, कने लगातार मिन्जो मौती रा सामना करना पैया।

²⁴पांज्ज बार मैं यहूदी अगुवेयां ते उन्ताल़ी कोड़े खादे।

²⁵मिन्जो तिन्न बार डन्डयां ने कुट्टया, इक बार त माह पर पत्थर बी मारे गये। तिन्न बार जहाज तिन्हां पर जे हऊँ चढ़या था टुटिग्या, इक दिन कने इक रात मैं समुद्रा रे डुग्गे पाणिये च कट्टी।

²⁶मेरी कई यात्राँ रे दौरान मैं खतरनाक नदियां, खूँखार डाकुआं, खुद अपणयां लोकां, अन्यजातियां, नगराँ, गाँवां, समुद्राँ कने झूट्ठे विश्वासी भाईयां रे जख्मां रा सामना कित्या।

²⁷मैं बौहत मेहणत करीने दुखां ते थक्कीने टुटिग्या, कईयां मौकयां च त मिन्जो सौणे बी नीं मिलया, कने ठण्डा ते बचणे खातर पैहनणे जो गर्म कपड़ा बी नीं था इस वजह ने कम्बदा रैया।

²⁸इन्हां गल्लां जो छड्डिने, माह पर सारी कलीसियां री चिन्ता रा बोझ बी हर दिन बणीरा रैया।

²⁹ताहली जे कोई कमजोर आ, तां हऊँ बी अप्पूँजो कमजोर समझां, कने ताहली जे किसी जो पापा च लेई जाया जां, तां मिन्जो बौहत गुस्सा महसूस हुआं।

³⁰जे घमण्ड करना जरूरी आ, तां मांह अपणियां कमजोरिया री गल्लां पर घमण्ड करना।

³¹अहें सदा परमेशर कने अहांरे प्रभु यीशुये रे पिता री प्रशंसा कराँ ये! काँह्भई परमेशर जाणाँ भई हऊँ सच्च बोलीराँ।

³²ताहली जे हऊँ दमिश्क नगरा च था, तां अरितास राजे रे राजपाले मिन्जो पकड़ने खातर दमिश्क नगरा रे दवाराँ पर पैहरा लगाईरा था।

³³पर मिन्जो नगरा री चार दवारिया री खिड़किया ते टोकरे च बठाल़ीने थल्ले त्वारीत्या कने हऊँ तिन्हांते बचीने निकल़िग्या।