Read Bilaspuri 2 कुरिन्थियों 6 Bible Online

2 कुरिन्थियों 6 - Bilaspuri bible

2 कुरिन्थियों 6

¹परमेशरा सौगी काम्म करने रे नाते अहें तुहां लोकां ने बिनती कराँ ये भई परमेशरा रा सै अनुग्रह जे तुहांजो मिलीरा, तिस्सो बेकार नीं जाणे देआ।

²काँह्भई पवित्रशास्त्रा च परमेशर बोलां, “मैं ठीक वगता पर तेरी सुणी ली कने हऊँ छुटकारे रे दिन तिज्जो सहारा देणे आया।” देक्खा। “सही वगत” येई हाया। देक्खा। “छुटकारे रा दिन येई हाया।”

³अहांरा स्वाभाव किसी बी तरिके ने किसी रे खातर अड़चन नीं बणदा, ताकि अहांरी सेवकाईया पर कोई दोष नीं लाओ।

⁴पर हरेक गल्ला च अहें ये दस्सां ये भई अहें परमेशरा रे सच्चे सेबक ये। अहें धीरजा सौगी पीड़ा सैहणे च, गरीबिया च, कष्टां च,

⁵कोड़े खान्दे हुये, जेल्लां च रैहन्दे हुये, अशान्तिया रे बिच, मेहणत करदे हुये, कईं रातीं तक बिणा सोये, उपवासा च,

⁶पवित्रता ते, ज्ञाना ते, धीरजा ते, दयालुता ते, पवित्र आत्मा ते, सच्चे प्यारा ने,

⁷सच्चे बचना ने, कने परमेशरा रिया सामर्था ने, धार्मिकता रे हत्थियार सै जे अपणे सज्जे कने खब्बे हत्थां चे,

⁸अहें आदरा कने निरादरा रे बिच, बेज्जतिया कने सम्माना च अपणे बारे च हमेशा सच्च बोल्या, पर किछ लोकें अहांजो भरमाणे औल़े समझया;

⁹किछ लोक अहांजो अंजाण समझां ये, जबकि अहौं सारे जाणाँ ये; अहें मूईरे समझे जायें, पर फेरी भीं अहें जिऊंदा ये; अहांजो सजा त दित्ति जाँई, पर अहें प्राणा ते मारे नीं जान्दे।

¹⁰अहें दुखां रे वगता च बी, हमेशा खुश ये; हलाँकि अहें गरीब ये, फेरी बी बौहत लोकां जो आत्मिकता च अमीर बणाई दें। लोक समझां ये अहांले किछ निआं, जबकि अहांले त सब किछ आ।

¹¹कुरिन्थ नगरा च रैहणे औल़े लोको, अहें तुहांजो किछ बी छुपान्दे नींये, काँह्भई अहें तुहांजो अपणे पूरे दिला ने प्यार कराँ ये।

¹²अहांरा प्यार तुहांरे खातर घट नीं हुईरा; पर तुहें अहांने प्यार करना घट करी तरा।

¹³तुहांजो अपणा बच्चा समझदे हुये हऊँ बोलीराँ भई तुहें बी अहांजो अपणे दिला ते प्यार करा।

¹⁴अविश्वासियां ने बौहत करीवी रिश्ता नीं रक्खा, काँह्भई धर्मिये कने अधर्मिये री भला क्या बराबरी हुई? या लोई रे कने अन्धेरे रे बिच भला मित्रता कियां हुई सक्कां इ?

¹⁵इयां इ मसीह रा शैतान्ना ने क्या तालमेल? यनिके विश्वासिया रा अविश्वासिये ने क्या नाता?

¹⁶परमेशरा रे मन्दरा रा मूर्तियां ने क्या नाता? काँह्भई अहें खुद तिस जीवित परमेशरा रे मन्दर ये; तियां जे परमेशरे पवित्रशास्त्रा च बोल्या, “माह तिन्हां लोकां च बसणा कने तिन्हां सौगी हमेशा रैहणा; कने हऊँ तिन्हांरा परमेशर हूणा कने सै मेरे लोक हुणे।”

¹⁷इस खातर पवित्रशास्त्रा रे जरिये प्रभु बोलां, “तुहें अविश्वासी लोकां रे बिच्चा ते निकल़ीने बाहर औआ सै जे मेरा अनुशरण नीं करदे, तिन्हांते अप्पूँजो लग करा; हुण तुहें कदीं किछ बी नीं छूआ, सै जे अपवित्र आ, तांई मांह तुहें ग्रहण करने;

¹⁸कने हऊँ तुहांरा पिता हूणा, कने तुहें मेरे बेटे कने बेटियां हुणे। ये सर्वशक्तिमान परमेशरा रा वचन आ।”