Read Bilaspuri गलातियां 5 Bible Online

गलातियां 5 - Bilaspuri bible

गलातियां 5

¹मसीहे अजादिया रे खातर अहांजो मूसा रिया व्यवस्था ते अजाद कित्या; इस खातर तुहें ये निश्चा करी लवा भई तुहें अजाद ये, कने फेरी भीं अप्पूँजो व्यवस्था रा दास बनाणे री इजाज़त नीं देआ।

²सुणा! हऊँ, पौलुस खुद तुहांजो बोल्ली कराँ भई जे परमेशरा रे सामणे धर्मी हुणे रे खातर तुहें अपणा खतना करवांगे, तां तुहांरे खातर मसीह रा कोई मतलब नीं हूणा।

³अपणा खतना करवाणे औल़े हर माहणुये जो, हऊँ इक बार भीं ते याद दिलाणा चाँह भई तिस्सो मूसा री सारिया व्यवस्था रा पालन करना जरूरी आ।

⁴तुहां चते जितने बी लोक व्यवस्था रा पालन करने रे जरिये परमेशरा रे सामणे धर्मी हुणे री कोशिश करया राँये, तुहें सारे मसीह ते लग ये कने परमेशरा रे अनुग्रह जो ग्रहण करने ते मना कित्तिरा।

⁵पर अहौं पवित्र आत्मा रिया तरफा ते पूरा भरोसा भई परमेशर अहांजो धर्मिये रे रुपा च ग्रहण करगा, काँह्भई अहें यीशु मसीह पर विश्वास कराँ ये।

⁶जे तुहें मसीह यीशुये रे चेले हो, तां चाये तुहें खतना या बगैर खतने औल़े हो इसरा कोई फर्क नीं पौन्दा, पर मसीह पर विश्वास करना इ मायना रखां सै जे परमेशर कने दुज्यां लोकां रे परति प्यारा रे जरिये दिखां।

⁷तुहें त बौहत अच्छे ढंगा ने अपणे आत्मिक जीवना च बधया राँ थे, हुण तुहांजो किने रोकील्या ताकि तुहें सच्चाईया जो नीं मन्नो?

⁸येढ़ि सीख सै जे तुहांजो सच्चाईया ते दूर करी राईं, तुहांरे सद्दणे औल़े परमेशरा रिया तरफा ते नीं आईरी।

⁹येढ़ि सीख थोड़ा जेआ मलेड़ा गुन्हीरे सारे आट्टे जो मलेड़ा बणाई देआं।

¹⁰हऊँ प्रभु पर तुहांरे बारे च भरोसा रक्खां भई तुहांरा होर कोई विचार नीं हूणा; पर तुहांजो विचलित करने औल़ा चाये कोई बी हो, परमेशरा तिस्सो सजा देणी।

¹¹पर मेरे साथी विश्वासियो, जे हऊँ हुण तक खतने रा प्रचार करदा, तां मिन्जो हुण तक सताया नीं जान्दा, जे हुण तक हऊँ मसीह रे क्रूसा ते इलावा खतने रिया जरूरता रा प्रचार करदा हुन्दा, तां हऊँ यहूदियां जो नराज नीं करदा।

¹²भला हुन्दा, भई सै जे तुहांजो गिराणा चाँये, सै अपणा अंग इ बड्डी लेन्दे।

¹³पर मेरे साथी विश्वासियो, परमेशरे तुहांजो अजाद रैहणे रे खातर चुणीरा, पर येढ़ा नीं हो भई ये अजादी पापी स्वभावा जो पूरा जरने रे खातर अवसर बणो, इसरे बदले प्यारा रिया वजह ने अप्पूँ चियें इक्की दुज्जे री सेवा करा।

¹⁴काँह्भई सारी व्यवस्था इसा इक्की हुक्मा च पूरा हुई जाईं, “तू अपणे पड़ेसिये ने तियां प्यार कर, तियां जे तूं खुद अप्पूँ ने प्यार कराँ।”

¹⁵पर जे तुहें इक्की दूये जो जानबराँ साई दन्दा ने बड्डीने खान्दे रैहन्गे तां सावधान रौआ भई, तुहें अप्पूँ बाटियें इक्की दूये जोई नीं खत्म करी दो।

¹⁶पर हऊँ बोलां भई पवित्र आत्मा रे मुतावक जीआ तां तुहें अपणे पापी स्वभावा रियां इच्छां जो पूरा नीं करगे।

¹⁷काँह्भई पापी स्वभावा रियां इच्छां पवित्र आत्मा रे वरोधा ची, कने पवित्र आत्मा पापी स्वभावा रियां इच्छां रे वरोधा चा। इन्हांरा अप्पूँ चियें बैर आ, इस खातर सै जे तुहें करना चाँये सै करी नीं सकदे।

¹⁸पर जे तुहें पवित्र आत्मा रे मुतावक चलां ये, तां फेरी व्यवस्था रे अधीन नीं रैहन्दे।

¹⁹हुण देक्खा, अहांरे पापी स्वभावा जो त सारे जाणाँ ये, सै येवे: व्यभिचार, अपवित्रता, भोगविलास,

²⁰मूर्ति पूजा, जादू-टोणा, बैर-बरोध, लड़ाई-झगड़ा, हिरख, गुस्सा, स्वार्थ, मनमुटाव, फूट,

²¹जल़ण, नशा, मतवाले हूणा या येढ़ि इ होर गल्लां, हुण हऊँ तुहांजो इन्हां गल्लां रे बारे च तियां इ चेतावनी देई कराँ, तियां जे हऊँ तुहांजो पैहले इ चेतावनी देई बैठिरा था भई सै लोक जे येढ़ियां गल्लां च शामिल हुंगे, सै परमेशरा रे राज्जा रे बारस नीं हुणे।

²²पर पवित्र आत्मा रा फल़ प्यार, खुशी, शान्ति, धीरज, दया, भलाई, विश्वास,

²³नम्रता कने आत्म संयम आ। येढ़ियां गल्लां रे बरोधा च कोई व्यवस्था नीं।

²⁴सै जे यीशु मसीह रे लोक ये, तिन्हें अपणे पापी स्वभावा रियां इच्छां कने लालसां जो क्रूसा पर चढ़ाईत्या।

²⁵काँह्भई अहें पवित्र आत्मा रे जरिये जीयें, तां औआ पवित्र आत्मा रे मुतावक इ चलिये।

²⁶अहें घमण्डी नीं हो, अहांरा इक्की दूये ने चिड़-चिड़ा स्वाभाव नीं हो, कने नांई अहें अप्पूँ चियें नफरत करो।