Read Bilaspuri इफिसियां 1 Bible Online

इफिसियां 1 - Bilaspuri bible

इफिसियां 1

¹हऊँ, पौलुस परमेशरा रिया इच्छा रे जरिये यीशु मसीह रा प्रेरित आ। हऊँ ये चिट्ठी इफिसुस नगरा च रैहणे औल़े पवित्र लोकां कने यीशु मसीह रे सच्चे विश्वासियां जो लिखिराँ।

²तुहांजो अहांरे पिता परमेशर कने यीशु मसीह रिया तरफा ते अनुग्रह कने शान्ति मिलदी रौ।

³अहांरे प्रभु यीशु मसीह रे पिता कने परमेशरा रा धन्यवाद, तिने जे अहांजो मसीह च स्वर्गा ते सब आत्मिक आशीषां दित्ति रियां।

⁴तियां जे तिने संसारा रिया सृष्टिया ते पैहले मसीह च चुणील्या ताकि अहें तिसरे सामणे पवित्र कने निर्दोष बणो।

⁵काँह्भई परमेशरे अहांने प्यार कित्या इसा बजह ने तिने अहांजो यीशु मसीह रे जरिये अपणा पुत्र हुणे रा दर्जा देईने नियुक्त कित्या, येई तिसरी इच्छा कने तिसरी खुशी थी।

⁶ताकि अहें तिसरे महान अनुग्रह रे खातर तिसरी प्रशंसा करिये। तिने ये अनुग्रह अहौं अपणे प्यारे पुत्रा च मुफ्ता च दित्तिरा।

⁷अहौं तिसच परमेशरा रे बौहत अनुग्रह रे मुतावक मसीह रे खून्ना रे जरिये छुटकारा, यनिके अहांरे पापां री माफी मिलीरी, परमेशरा रा अनुग्रह बौहत इ महान आ सै जे तिने अहांजो बौहत-जादा करीने दित्या।

⁸ये अनुग्रह परमेशरे अपणे सारे ज्ञाना कने समझा सौगी अहांजो बौहत दित्या।

⁹परमेशरे अपणिया इच्छा रा भेत भली योजना रे मुतावक अहां पर परगट कित्या, सै जे तिने मसीह च तैह कित्या था।

¹⁰ताहली जे ये योजना पूरी करने रा सही वगत औंगा, तां परमेशरा स्वर्ग कने धरतिया री सारियां चिज़ां जो मसीह रे अधीन करना, ताकि मसीह सारियां चीजां रा मुखिया हो।

¹¹ये सारियां गल्लां परमेशरा रिया योजना कने फैसले रे मुतावक हुई, कने परमेशरे मसीह च अहौं अपणे लोक हुणे रे खातर अपणिया इच्छा रे मुतावक चुणया, सै जे परमेशरे पैहले तेई तैह करीने रखीरा था।

¹²ताकि अहें यहूदी तिन्हेंजे पैहले ते मसीह च भरोसा कित्या ताकि अहां लोकां रिया वजह ने परमेशरा रिया महिमा री स्तुति हो।

¹³परमेशरे तुहौं बी अपणे लोक बणाया ताहली जे तुहें सच्चाईया रा सन्देश यनि तुहांरे छुटकारे री खुशखबरी सुणी। तां तुहें तिस पर विश्वास कित्या कने मसीह च परमेशरे तुहां पर छाप लाई सै छाप जे वायदा कित्तिरा पवित्र आत्मा।

¹⁴ये पवित्र आत्मा इक ब्यान्ने साई आ सै जे जमाणत देआं भई परमेशर अपणे लोकां रे खातर वायदा कित्ती रियां चीजां जो अहौं देन्गा। ये तिस वगत हूणा ताहली जे परमेशर अपणयां लोकां यनि अहौं पूरे तरिके ने छुटकारा देन्गा। इस रिया बजह ने लोक परमेशरा रिया महिमा री स्तुति करो।

¹⁵इसा वजह ने, हऊँ बी तिस विश्वासा जो सै जे तुहां लोकां च प्रभु यीशुये पर आ कने सारे पवित्र लोकां रे प्रति तुहांरे प्यारा री खबर सुणीने,

¹⁶तुहांरे खातर परमेशरा रा धन्यवाद करना नीं छडदा, कने अपणियां प्राथनां च तुहांजो याद करदा रैयां।

¹⁷हऊँ प्राथना कराँ भई अहांरे प्रभु यीशु मसीह रा परमेशर सै जे महिमा रा पिता, तुहांजो ज्ञान कने प्रकाशा रा आत्मा देओ तिसते जे तुहें परमेशरा जो अच्छे तरिके ने जाणी सक्को।

¹⁸हऊँ परमेशरा ने ये बी प्राथना कराँ भई सै तुहौं सच्चाईया जो समझणे च तुहांरी मदद करगा, भई तुहें तिसा आस्सा जो जाणी लो तिसरे खातर जे तिने तुहांजो सद्दीरा; कने तुहें इसा गल्ला जो जाणो भई सै आशीषां जे परमेशर अपणयां लोकां जो देणे रा वायदा कराँ सै कितणियां महान इ।

¹⁹कने हऊँ ये बी प्राथना कराँ भई तुहें समझी सक्को भई अहां विश्वासियां रे खातर परमेशरा री सामर्थ कितणी महान इ, येई महान सामर्थ

²⁰परमेशरे इस्तेमाल कित्ती ताहली जे तिने मसीह जो मूईरयां चते जिऊंदा कित्या कने स्वर्गा च अपणे सज्जे पासे आदरा रिया जगह बठाल़या,

²¹तिसा जगह सारे राजयां पर, अधिकाराँ पर, सामर्थां पर, प्रभुता, कने हरेक नौंवां रे ऊपर, सै जे न सिर्फ इस लोका च, पर औणे औल़े लोका च बी तिसरा इ नौं सब्बीं ते ऊपर मन्नया जाणा।

²²परमेशरे सब किजि जो मसीह रे अधिकारा च करित्या कने तिस्सो सारियां चिज़ां पर मुखिया बणाईने कलीसिया जो देईत्या।

²³कलीसिया मसीह री देह इ, कने कलीसिया मसीह रे जरिये ही परिपूर्ण इ, सै जे सारियां जगहां च सब किछ अपणिया मौजूदगिया च पूरा कराँ।