Read Bilaspuri इफिसियां 5 Bible Online

इफिसियां 5 - Bilaspuri bible

इफिसियां 5

¹तुहें लोक परमेशरा रे प्यारे बच्चे इस खातर तिसरा अनुशरण कराँ।

²जिस तरिके ने मसीहे अहांने प्यार कित्या कने खुद अप्पूँजो खुशबुदार तेला साई परमेशरा खातर इक भेन्ट कने बलिदान्ना रे रुपा च चढ़ाईत्या, तियां इ प्यार रा जीवन जीओ।

³तुहांरे बिच व्यभिचार कने हर तरह रे अपवित्र कम्मां यनि लालचा री चर्चा तक नीं हूणी चाहिन्दी; काँह्भई पवित्र लोकां रे खातर ये ठीक निआं।

⁴तुहां च नांत गन्दियां गल्लां रा इस्तेमान हूणा चाहिन्दा, नांईं मूर्खां औल़ा खप्प खान्ना या फालतू हसी-मजाक नीं हूणा चाहिन्दा; ये गल्लां तुहांजो शोभा नीं देन्दियां, बल्कि तुहांरे बिच धन्यवाद इ सुणया जाओ।

⁵काँह्भई तुहें ये जाणाँ ये भई येढ़ा कोई बी माहणु सै जे दुराचारी आ, अपवित्र आ, या लालची आ (सै जे इक मूर्तिया री पूजा करने औल़े साई आ) मसीह रे कने परमेशरा रे राज्जा रा वारिस नीं बणी सकदा।

⁶कोई तुहौं बेकार गल्ला ने धोखा नीं देओ, काँह्भई इन्हां गल्लां रिया वजह नेई परमेशरा रा गुस्सा आज्ञा नीं मनणे औल़या लोकां पर भड़कां।

⁷इस खातर तुहें तिन्हांरे साथी मत बणा।

⁸ये हऊँ इस खातर बोल्ली कराँ भई इक बगत था ताहली जे तुहें अन्धकारा च थे, पर हुण तुहें प्रभुये च ज्योति ये; इस खातर ज्योतिया रे बच्चयां साई जीओ।

⁹काँह्भई ज्योति हर किस्मा री भलाई, धार्मिकता कने सच्चाई पैदा कराँ इ।

¹⁰ये गल्ल जाणने री कोशिश करा सै जे प्रभुये जो खुश कराँ इ।

¹¹अन्धकारा रे बेकार कम्मां च शामिल मता हुन्दे, बल्कि तिन्हांरियां बुराईयां जो सामणे ल्यावा।

¹²काँह्भई येढ़े काम्म तिन्हांजो जे सै चुपचाप कराँ ये, तिन्हांरे बारे च चर्चा करना बी शर्मा री गल्ल इ।

¹³ज्योति ताहली जे चमकां इ, तां सारा किछ दिखणे लगां। कने ज्योति तिस्सो जे दस्सां इ, सै खुद ज्योति बणी जां।

¹⁴इसा वजह ने लोक बोलां ये, “सौणे औल़या जाग कने मूईरेयां चते जिऊंदा हुई जा; तां मसीह री ज्योति तूह पर चमकणी।”

¹⁵इस खातर सावधानिया ने देखदे रौआ भई तुहें केढ़ी जिन्दगी जी कराँ ये, बेअक्कलां साई मत जीओ, पर बुद्धिमान्ना साई जीओ।

¹⁶खरे कम्मा खातर हरेक मौके रा इस्तेमाल करा, काँह्भई दिन बुरे।

¹⁷इस खातर मूर्ख मत बणा, पर ये जाणा भई प्रभुरी क्या इच्छा इ।

¹⁸शराब पीणे औल़े रा नशा मत करा, काँह्भई इसते गल़त इच्छा पैदा हुआं इ, पर पवित्र आत्मा ते भरदे जावा।

¹⁹कने अप्पूँ बाटियें भजन कने स्तुति रे गीत कने आत्मिक गीत गाया करा, कने अपणे-अपणे मना च प्रभुरे सामणे गान्दे कने कीर्तण करदे रौआ।

²⁰कने सब गल्ला रे खातर अहांरे प्रभु यीशु मसीह रिया वजह ने अहांरे पिता परमेशरा रा हमेशा धन्यवाद करा।

²¹मसीह रे प्रति आदर रखणे रिया वजह ते इक्की दूये रे अधीन रौआ।

²²अरे पत्नियो, अपणे-अपणे पतियां रे प्रति इयां समर्पित रौआ, तियां जे तुहें प्रभुये जो समर्पित हुआं इयां।

²³काँह्भई पति पत्निया रा सिर आ, तियां जे भई मसीह कलीसिया रा सिर आ, कने सै खुद इस कलीसिया रा छुटकारा करने औल़ा हया, सै जे तिसरा शरीर आ।

²⁴तियां जे कलीसिया मसीह रे अधीन इ, तियां इ पत्नियां जो सारियां गल्लां च अपणे-अपणे पतियां रे प्रति समर्पित रैहणा चाहिन्दा।

²⁵अरे पतियो, अपणी-अपणी पत्नियां ने प्यार करा, तियां इ तियां जे मसीहे कलीसिया ने प्यार कित्या कने खुद अप्पूँजो तिसरे खातर बलिदान करित्या।

²⁶ताकि सै तिसाजो वचना रे जरिये पाणिये ने नैहलाईने शुद्ध करो कने पवित्र बणाओ,

²⁷इस तरिके ने सै कलीसिया जो इक येढ़ि चमचमाती दुलहना रे रुपा च अपणे खातर प्रस्तुत करी सक्कां सै जे निष्कलंक हो, झुरियां ते बगैर हो, या तिसच येढ़ि होर कोई कमी नीं हो, बल्कि सै पवित्र कने निर्दोष हो।

²⁸इस तरिके ने पतियां जो अपणी-अपणी पत्नियां ने इयां इ प्यार करना चाहिन्दा तियां जे सै खुद अपणे जिस्मां ने कराँ ये, सै जे अपणिया पत्निया ने प्यार कराँ, सै खुद अप्पूँ नेई प्यार कराँ।

²⁹काँह्भई कोई अपणे जिस्मा ने कदीं नफरत नीं करदा, बल्कि सै तिस्सो पाल़ां-पणोसां कने तिसरा ध्यान रक्खां, तियां इ मसीह बी कलीसिया ने कराँ,

³⁰काँह्भई अहें बी तिसरे जिस्मा रेई अंग हाये।

³¹तियां जे पवित्रशास्त्र बोलां, “इसा वजह ने इक माहणु अपणे माता-पिता जो छड्डिने अपणी पत्निया ने बझी जां, कने सै दोन्नों इक देह हुई जायें।”

³²ये इक बौहत गैहरा भेत आ; पर ये हऊँ मसीह कने कलीसिया रे बारे च बोलां।

³³इस खातर किछ बी हो, तुहां चते हर इक्की जो बी अपणी पत्निया ते तियां इ प्यार करना चाहिन्दा जियां जे तुहें खुद अप्पूँजो कराँ ये, कने हरेक पत्निया जो बी अपणे-अपणे पतिये रा आदर करना चाहिन्दा।