Read Bilaspuri इफिसियां 6 Bible Online

इफिसियां 6 - Bilaspuri bible

इफिसियां 6

¹अरे बच्चयो, तुहें प्रभुये रे बच्चे, इस खातर अपणे माता-पिता रा कैहणा मन्नो, काँह्भई येई ठीक आ।

²“अपणे माता-पिता रा आदर करयां” (येढ़ा पैहला हुक्म आ, तिसने जे इक वायदा जुड़ीरा),

³ताकि “तुहांरा भला ओ कने इसा दुनिया च तुहें बौहत दिनां तक ज्यून्दे रौ।”

⁴अरे पिताओ, अपणेयां बच्चेयां जो गुस्सा नीं चढ़ावा, पर अनुशासन कने प्रभुये री शिक्षा देन्दे हुये तिन्हारा पालन-पोषण करा।

⁵अरे सेबको, तुहौं मना रिया सच्चाईया ने आदर कने डरा ने अपणे संसारिक मालकां रे हुक्मां रा पालन इस तरिके ने करा, तियां जे तुहें मसीह रा कराँ ये।

⁶लोकां जो खुश करने औल़यां साई दिखावा करने रे खातर सेवा नीं करा, पर मसीह रे सेबका साई दिला ने परमेशरा री इच्छा पूरी करा।

⁷खुशिया ने इक दास्सा रे रुपा च इयां काम्म करा तियां जे मन्नो तुहें लोकां री नीं, बल्कि प्रभुये री सेवा करया राँये।

⁸काँह्भई तुहें जाणाँ ये भई हरेक माहणु चाहे सै दास हो या अजाद, जो बी भलाई करगा, तिसरा ईनाम तिस्सो प्रभुये देणा।

⁹इस तरिके ने अरे मालको, अपणेयां सेबकां ने अच्छा बर्ताव करा। तिन्हौं धमकी मत देआ, काँह्भई ये तुहें जाणाँ ये भई तिन्हांरा कने तुहांरा दुईं रा मालक स्वर्गा चा कने सै किसी ने भेदभाव नीं करदा।

¹⁰आखिर च, मेरे भाईयो प्रभु च कने तिसरिया शक्तिया रे प्रभावा ने आत्मिकता च मजबूत हुन्दे जावा।

¹¹परमेशरा रे सारे हथियाराँ जो पैहनी लो, ताकि तुहें शैतान्ना रिया बुरिया चाला रे सामणे खड़े रैई सक्को।

¹²काँह्भई अहांरी लड़ाई लहू कने मास्सा ने बणाईरे माहणुआं ने नीं, पर प्रधानां, अधिकारियां, कने इस संसारा रे अन्धकारा रे हाकिमां कने तिस दुष्टता री आत्मिक सेनां सौगी सै जे अम्बरा चियां।

¹³इस खातर सिपाईये साई तुहें परमेशरा रे सारे हत्थियाराँ जो कस्सी लौ तिसते जे बुरे वगता च तुहें दुष्टां ने लड़ने लायक हुई सक्को। सब किछ करने ते बाद तुहां पिच्छे नीं हटणा।

¹⁴इस खातर सच्चाईया रिया पेट्टिया ने अपणी कमर कस्सीने, कने धार्मिकता री झिलम पैहनीने,

¹⁵कने पैराँ च शान्तिया री खुशखबरी सुनाणे री त्यारिया रे जुट्टे पैहनीने;

¹⁶तिन्हां सारयां सौगी विश्वासा री ढाल लेईने मजबूत हुई जा, तिसते जे तुहें शैतान्ना रे सारे बल़दे तीराँ जो बुझाई सक्को,

¹⁷कने छुटकारे रा टोप, कने पवित्र आत्मा री तलवारा जो, सै जे परमेशरा रा वचन आ, लैई लो।

¹⁸कने तियां जे पवित्र आत्मा तुहांरी अगुवाई कराँ, तियां इ हर बगत कने सब प्रकारा रियां प्राथनां कने विनतियां करदे रौआ। इसा वजह ने जागदे रौआ कने सब पवित्र लोकां रे खातर लगातार प्राथना करदे रौआ।

¹⁹कने तुहें मेरे खातर बी प्राथना करा, भई मिन्जो बोलणे रा मौका मिलणे पर परमेशर मिन्जो सही शब्दां जो देओ ताकि हऊँ खुशखबरिया रे भेता जो हिम्मता ने लोकां जो दस्सी सक्कूं।

²⁰तिसरे खातर जे हऊँ जंजीराँ ने जकड़ोईरे राजदूता साई सेवा करया राँ। प्राथना करा भई तियां जे हिम्मता ने मिन्जो बोलणा चाहिन्दा, तियां इ निडर हुईने बोल्ली सक्कूं।

²¹प्रभुये च अहांरे साथी विश्वासी कने बफादार सेवक तुखिकुस तुहां लोकां जो ये सब दस्सी देंगा तिसते जे तुहें मेरी हालत जाणी सक्को भई हऊँ केढ़ा कने क्या करीराँ।

²²इसी वजह ने मैं तिस्सो तुहांले भेज्या राँ, भई तुहें अहांरी हालत जाणो कने सै तुहांजो हौंसला देई सक्को।

²³परमेशर अहांरे पिता कने अहांरे प्रभु यीशु मसीह तुहां विश्वासियां जो शान्ति देओ कने तुहें इक्की दूये ने प्यार करो कने मसीह पर लगातार विश्वास करदे रौओ।

²⁴परमेशरा रा अनुग्रह तिन्हां सब्बीं पर बणीरा रौ सै जे अहांरे प्रभु यीशु मसीह ने बेथौह प्यार कराँ ये।