Read Bilaspuri कुलुस्सियां 4 Bible Online

कुलुस्सियां 4 - Bilaspuri bible

कुलुस्सियां 4

¹मालको, तुहें अपणे-अपणे दास्सां ने न्याय कने ठीक-ठीक बर्ताव करा, याद रखा स्वर्गा च तुहांरा बी कोई मालक आ।

²हमेशा प्राथना च लगीरे रौआ, कने ताहली जे तुहें प्राथना करो तां सावधान रौआ कने परमेशरा रा धन्यवाद करदे रौआ;

³कने इस सौगी अहांरे खातर बी प्राथना करा भई परमेशर अहांरे खातर वचन सुणने रा येढ़ा अवसर देई दो, भई अहें मसीह रे तिस भेदा रा बखान करी सक्को तिसरिया वजह ने जे हऊँ कैदा चा,

⁴प्राथना करा भई हऊँ इस्सो इयां परगट करी सक्कूं, तियां जे मिन्जो दसणा चाहिन्दा।

⁵मौके जो कीमती समझीने अविश्वासी लोकां ने समझदारिया ने बर्ताव करा।

⁶तुहांरी बोल्ली सदा मिठी रौ कने तिसते जे समझदारिया री पछयाण लगो कने तुहें जाणी सक्को भई किसी माहणुये जो कियां जबाब देणा चाहिन्दा।

⁷अहांरा प्यारा विश्वासी, तुखिकुस सै जे इक बफादार सेवक आ, कने सै जे अहां सौगी प्रभुये री सेवा कराँ, मेरी सारी गल्लां तुहांजो दस्सी देन्गा।

⁸हऊँ तिस्सो तुहांले इस खातर भेज्जी राँ, भई तुहांजो तिसते अहांरे सारे हालचाला रा पता चली जाओ, ताकि सै तुहांरे विश्वासा च तुहांजो मजबूत करी सक्को।

⁹हऊँ अपणे विश्वास लायक कने प्यारे विश्वासी उनेसिमुस जो बी तिसने सौगी भेज्जी राँ सै जे तुहांरे नगरा ते आ; सै तुहांजो येत्थी री सारियां गल्लां दस्सी देन्गे।

¹⁰अरिस्तर्खुस, सै जे मेरे सौगी कैदी आ, कने बरनबास रे रिश्तेदार मरकुस रा तुहांजो नमस्कार, (तिसरे बारे च तुहें आज्ञा पाई थी भई जे सै तुहांले आओ, तां तिसने ठीक ढंगा ने बर्ताव करयां।)

¹¹युसतुस रे नौआं ते जाणयां जाणे औल़े यीशुये रा बी तुहांजो नमस्कार हो। यहूदी विश्वासियां चते परमेशरा रे राज्जा खातर मेरे सौगी काम्म करने औल़े सिर्फ ये तिन्न माहणु ये कने इन्हा रिया वजह ने मिन्जो बौहत जादा तसल्ली मिली।

¹²इपफ्रास रा बी तुहांजो नमस्कार हो, सै जे तुहांरे नगरा चते इक आ कने यीशु मसीह रा दास आ, कने सदा तुहांरे खातर लगना ने प्राथनां च कोशिश करदा रैयां, ताकि तुहें सिद्ध हुईने पूरे विश्वासा सौगी परमेशरा रिया इच्छा च टिक्कीरे रौओ।

¹³हऊँ तिसरा गवाह भई सै तुहांरे खातर कने लौदीकिया कने हियरापुलिस नगरा रे रैहणे औल़यां रे खातर हमेशा कड़ी मेहणत करदा रैहन्दा।

¹⁴प्यारे डाँक्टर लूका कने देमास तुहांजो नमस्कार बोलां ये।

¹⁵लौदीकिया नगरा रे साथी विश्वासियां जो, कने नुमफास कने तिन्हांरे घरा री कलीसिया जो नमस्कार बोलणा।

¹⁶ताहली जे ये चिट्ठी तुहांरे येत्थी पढ़ी ली जाओ, तां येढ़ा करयां भई लौदीकिया री कलीसिया च बी पढ़वाया जाये, कने लौदीकिया ते मेरी सै चिट्ठी जे तुहांजो मिलो, तिसाजो तुहें बी पढ़ी लेयों।

¹⁷कने अरखिप्पुस ते गलायां भई सै इसा गल्ला रा ध्यान रखो भई प्रभु च सै जे सेवा तिस्सो दित्तिरी, सै तिसजो सावधानिया ने पूरी करी सक्को।

¹⁸मेरा यनि पौलुसा रा अपणे हत्था रा लिखिरा नमस्कार। याद रखयां हऊँ जेल्ला चा, परमेशरा रा अनुग्रह तुहांजो सौगी रौओ। आमीन।