Read Bilaspuri 1 थिस्सलुनीकियां 2 Bible Online

1 थिस्सलुनीकियां 2 - Bilaspuri bible

1 थिस्सलुनीकियां 2

¹हे भाईयो, तुहें खुद जाणाँ ये भई अहांरा तुहांले औणा बेकार नीं गया,

²पर तुहें खुद जाणाँ ये भई अहें पैहले फिलिप्पी शहरा च दुख भोगणे कने उपद्रव सैहणे ते बाद बी अहांरे परमेशरे येढ़ि हिम्मत दित्ति, भई अहें परमेशरा री खुशखबरी बड़े बरोधा रे उपरान्त बी तुहांजो सुणाई सक्को।

³काँह्भई तुहांजो अहांरी विनती कोई गल़ती या बुरे मकसदा पर अधारित नीं, कने नांई अहें किसी जो बी धोखा देणे री कोशिश कराँ ये।

⁴पर तियां जे परमेशरे अहांजो लायक समझीने खुशखबरी सौंपी, इस खातर अहें माहणुआं जो नीं, पर अहांरे मना जो परखणे औल़े परमेशरा जो खुश करने रे खातर उपदेश देआंये।

⁵तुहें जाणाँ ये भई अहें नांत कदीं चापलुसिया री गल्लां करदे थे, कने नांई लालचा रे खातर कोई बहान्ना बणां थे, इसरा परमेशर गवाह।

⁶कने अहें मसीह रे प्रेरित हुणे रिया वजह ने तुहां पर बोझ पाई सक्कां थे, फेरी बी अहें माहणुआं ते आदर नीं चाहन्दे थे, कने न तुहांते, न किसी होरी ते।

⁷अहें मसीह रे प्रेरितां रे रुपा च अपणा हक जताई सक्कां थे, पर अहें तुहांरे बिच तियां इ नम्रता ने रैये तियां जे इक मौ अपणे बच्चे जो दुध प्याईने तिसरा पालन-पोषण कराँ इ।

⁸अहें तुहांरे बारे च तेढ़िया इ नम्रता जो महसूस कित्या, इस खातर परमेशरा ते मिली रिया खुशखबरिया जोई नीं, बल्कि अहें खुद अप्पूँजो बी तुहां सौगी बंड्डी लेणा चाँये, काँह्भई तुहें अहांरे प्यारे बणीगरे।

⁹काँह्भई हे भाईयो, तुहें अहांरी कड़ी मेहणता कने कठिनाईयां जो याद रखा सै जे अहें दिन-रात इस खातर किति ताकि अहें परमेशरा रिया खुशखबरिया जो सुणान्दे हुये तुहां पर बोझ नीं बणो।

¹⁰तुहें खुद इ गवाह ये, कने परमेशर बी गवाह भई तुहां सारयां विश्वासियां ने अहांरा स्वाभाव कितना सच्चा, धर्मी कने निर्दोष था।

¹¹तुहें जाणदे इ हाये भई तियां जे इक पिता अपणे बच्चयां ने बर्ताव कराँ, तियां इ अहें तुहां चते हर इक्की जो उपदेश करदे, शान्ति देन्दे, कने समझान्दे थे,

¹²भई तुहांरा चाल-चल़ण परमेशरा रे लायक हो, सै जे तुहांजो अपणे राज्जा कने महिमा च सद्दां।

¹³कने इस खातर अहें परमेशरा रा धन्यवाद हमेशा करदे रैं, काँह्भई ताहली जे तुहें अहांते वचन सुणया, तां तिस्सो माहणुआं रिया खुशखबरिया रे रुपा च नीं, बल्कि परमेशरा रिया खुशखबरिया रे रुपा च ग्रहण कित्या; कने तियां जे सै सच्च आ, कने तुहां विश्वासियां पर तिसरा असर बी आ।

¹⁴इस खातर तुहें, हे भाईयो, परमेशरा रे तिन्हां विश्वासियां री चाल चलने लगे सै जे यहूदिया प्रदेशा च मसीह यीशुये चे, काँह्भई तुहें बी अपणे लोकां ते तेढ़ा इ दुख पाया तेढ़ा जे तिन्हें यहूदियां ते पाया था,

¹⁵तिन्हें जे प्रभु यीशुये जो मारया कने भविष्यवक्तयां जो बाहर खदेड़ीत्या, कने अहांजो सताया, सै परमेशरा जो नीं खुश करदे, कने सै सारे माहणुआं रा वरोध कराँ ये।

¹⁶कने सै अन्यजातियां जो खुशखबरिया रा उपदेश देणे च मुश्कल खढ़ी कराँ ये भई किति तिन्हां लोकां रा छुटकारा नीं हुईजो। इन्हां गल्लां ते सै हर वगत अपणे पापां रा घड़ा भरदे रैयें; पर हुण तिन्हां पर परमेशरा रा कोप पौणे औल़ा।

¹⁷हे भाईयो, तित्थी तक जे अहांरी गल्ल इ, अहें थोड़े बगता खातर तुहांते बिछड़ी गरे थे, विचाराँ ते नीं, सिर्फ शरीरा ते, इस खातर अहें तुहांजो मिलणे जो बड़े काहल़े हुईगरे अहांरी लालसा बधी गरी।

¹⁸इस खातर अहें यनि मैं पौलुसे इक बार नीं बल्कि बौहत बार तुहांले औणा चाहया, पर शैताने अहांजो रोकी रखया।

¹⁹भला अहांरी आशा या अहांरी मौज या अहां रिया बडयाईया रा मुकुट कुण आ? तिस पर जे अहांजो इतणा गर्व आ; क्या अहांरे प्रभु यीशुये रे सामणे तिसरे औणे रे वगत तुहां इ नीं हूणा?

²⁰अहांरी बडयाई कने मौज तुहें इ हाये।