Read Bilaspuri 1 थिस्सलुनीकियां 4 Bible Online

1 थिस्सलुनीकियां 4 - Bilaspuri bible

1 थिस्सलुनीकियां 4

¹भाईयो, अहें तुहांते विनती कराँ ये कने तुहांजो प्रभु यीशुये च समझावांये भई तेढ़ा जे तुहें अहांते ठीक चाल चलना कने परमेशरा जो खुश करना सिखी रा, कने तेढ़े जे चलां बी ये, तेढ़े इ होर बी तरक्की करदे जाओ।

²काँह्भई तुहें जाणाँ ये भई अहें प्रभु यीशुये रे अधिकारा ने तुहौं क्या सिखाया था।

³काँह्भई परमेशरा री इच्छा येई भई तुहें पवित्र बणा: यनिके तुहें व्यभिचार मत करा,

⁴काँह्भई तुहां चते हरेक जो पवित्रता कने आदरा सौगी अपणे शरीरा[2] जो बशा च करना सिखणे री जरूरत इ।

⁵कने तुहांजो ये काम्म अन्यजातियां साई बासना रिया इच्छा ते नीं करना चाहिन्दा, सै जे परमेशरा जो नीं जाणदे,

⁶भई इसा गल्ला च कोई अपणे विश्वासी भाईये रे बरोधा च पाप नीं करो, कने नां तिसरा गल़त फायदा लौ, काँह्भई प्रभु यीशुये तिन्हां सारयां जो सजा देणी सै जे इस तरिके रे काम्म कराँ ये; तियां जे भई अहें तुहां लोकां जो साफ शब्दां च समझाई चुक्कीरे।

⁷काँह्भई परमेशरे अहांजो अपवित्र जीवन जीणे रे खातर नीं, पर पवित्र जीवन जीणे खातर सद्दीरा।

⁸इस वजह ते सै जे इसा शिक्षा जो बेकार जाणाँ, सै माहणुये जो नीं पर परमेशरा जो बेकार जाणाँ, सै जे अपणा पवित्र आत्मा तुहांजो देआं।

⁹पर अहौं तुहांजो इक दूये विश्वासी भाईयां ने प्रेम करने रे महत्व रे बारे च लिखणे री जरूरत नीं, काँह्भई परमेशरे खुद इक दूये ने प्रेम करने रे खातर तुहांजो सखाईरा।

¹⁰कने मकिदुनिया प्रदेशा रे सरयां विश्वासी भाई-भैणां रे खातर तुहें प्रेम दस्सी चुक्कीरे। पर भाईयो, अहें तुहांजो विनती कराँ भई इसच होर बी बधदे जाओ,

¹¹कने तेढ़ा जे अहें तुहांजो हुक्म दित्तिरा, तियां इ शान्ति पूर्वक जीवन जीआ कने अपणा-अपणा काम्म-काज करीने अपणे-अपणे हत्था ते कमाणे रा जतन करा;

¹²इस तरीके रा बर्ताव करने ते अविश्वासी लोक तुहांरा आदर करगे, कने तिसा चीजा री जे तुहांजो जरूरत इ तिसा रे खातर तुहांजो किसी पर बी निर्भर नीं रहणे पौणा।

¹³मेरे साथी विश्वासियो अहें चायें भई तुहें ये जाणी लो भई तिन्हां विश्वासियां सौगी क्या हुणा सै जे पैहले इ मरी चुक्कीरे, अंजाण रौआ; किति येढ़ा नीं हो भई तुहें अविश्वासी लोकां साई दुख मनाओ, कांहभई तिन्हाजो आशा नीं भई मरने ते बाद सै दोबारा जिन्दा हुइ जाणे।

¹⁴काँह्भई जे अहें विश्वास कराँ ये भई यीशु मरया कने जी बी उट्ठया, तां तियां इ परमेशर तिन्हौं बी सै जे यीशुये च मरी चुक्कीरे, यीशुये सौगी स्वर्गा च नेणे।

¹⁵काँह्भई अहें प्रभु यीशुये रे वचना रे मुतावक तुहांजो येढ़ा बोलां ये भई अहें त जिऊंदा ये कने प्रभु यीशुये रे वापस औणे तक बची रयां रैहणा, तां पक्का सै तिन्हां विश्वासियां ते पैहले तिसने नीं मिलणे सै जे पहले मरी चुक्कीरे।

¹⁶काँह्भई प्रभु यीशुये अप्पूँ इ स्वर्गा ते उतरना; तिस बगत ललकार, कने प्रधान दूतां री अवाज़ सुणाई देणी, कने परमेशरा रिया तुरहियां बजणियां; कने सै जे मसीह च मरीरे, तिन्हां पैहले जिऊंदेयां हूणा।

¹⁷तां अहें सै जे हुण बी जिऊंदा ये कने बाकी बचीरे तिन्हां सौगी बद्दल़ां पर ऊठाईने ले जाये जाणे भई अम्बरा च प्रभुये ने मिलो; कने तिस वगता ते अहां सदा प्रभुये ने सौगी रैहणा।

¹⁸इयां इ इन्हां गल्लां ते इक्की दूये जो हौंसला देआ करा।