Read Bilaspuri 1 थिस्सलुनीकियां 5 Bible Online

1 थिस्सलुनीकियां 5 - Bilaspuri bible

1 थिस्सलुनीकियां 5

¹साथी विश्वासियो, इसरी जरूरत नीं भई प्रभु यीशु मसीह रे वापस औणे रे वगता कने तारीका रे बारे च तुहांजो किछ लिखुं।

²काँह्भई तुहें खुद जाणाँ ये भई तियां जे राति जो चोर औआं, तियां इ प्रभु यीशुये रे वापस औणे रा दिन औणे औल़ा।

³तंजे लोक बोलदे हुणे, “सारे कुशल मंगल ये, कने किछ डर निआं, तां तिस वगत अचानक परमेशरा तिन्हांजो दर्दनाक सजा देणे खातर औणा! तियां जे भारहत्थिया जनाना जो पीड़ पौंई कने तदुआं तक जे सै बच्चा नीं जणी लैन्दी, तदुआं तक पीड़ नीं रुकदी; तियां इ विनाश औणा कने लोकां किसी रीति नीं बचणा।

⁴पर साथी विश्वासियो, तुहें त अन्धकारा रिया बुराईया च नींये भई सै दिन तुहां पर चोरा साई आई पौ।

⁵काँह्भई तुहें सारे ज्योति कने दिना री सन्तान ये; अहें नांत राति रे, नां अन्धेरे रे।

⁶इस खातर अहें होरसीं साई सुत्तीरे नीं रौ, पर जागदे कने सावधान रौ।

⁷काँह्भई सै जे सौआयें सै राति जोई सौआयें, कने सै जे मतवाले हुआं ये सै राति जोई मतवाले हुआं ये।

⁸पर अहें सै जे दिनां रे, विश्वास कने प्यारा जो रक्षा कवचा साई पैहना तियां जे इक फौजी अपणी रक्षा करने खातर पैहनां, कने अहांरी आशा अहौं टोपा साई बचाओ।

⁹काँह्भई परमेशरे अहौं अपणे गुस्से ते सजा देणे रे खातर अहाजों नीं चुणीरा, पर इस खातर चणीरा भई अहें अहांरे प्रभु यीशु मसीह रे जरिये छुटकारा पाओ।

¹⁰यीशु मसीह अहां खातर इस वजह ते मरया भई अहें चाये जिऊंदा ओ या मूईरे ओ, अहें सदा तिसने सौगी जी सको।

¹¹इस वजह ते इक्की दूये जो हौंसला देओ कने इक्की दूये जो परमेशरा पर विश्वास करने रे खातर मदद करो, तेढ़ा जे तुहें कराँ बी ये।”

¹²साथी विश्वासियो अहें तिन्हांरा आदर करने खातर तुहांजो विनती कराँ ये सै जे तुहांरे बिच कड़ी मेहणत कराँ ये, कने प्रभुये च तुहांरे अगुवे, कने तुहांजो सखांये।

¹³कने तिन्हारे कम्मां रिया वजह ते तिन्हांरे प्रति बौहत आदर कने प्रेम दस्सा। कने अप्पूँ चियें मेल-मिलापा ने रौ।

¹⁴साथी विश्वासियो, अहें तुहांजो विनती कराँ ये भई सै जे विश्वासी आलसी ये तिन्हाजो सावधान करा, कायराँ जो हौंसला देआ, सै जे कमजोर ये तिन्हांरी मदद करा, कने सारयां खा सहनशीलता दस्सा।

¹⁵ये ध्यान रखा भई कोई किसी ने बुराईयां रे बदले बुराई नीं करो; पर सदा अप्पूँ चियें कने सब्बीं ने भलाई करने री कोशिश करा।

¹⁶सदा खुश रौ।

¹⁷लगातार प्राथना करदे रौ।

¹⁸हरेक हालता च परमेशरा रा धन्यवाद करो; काँह्भई तुहां खातर मसीह यीशु च परमेशरा री येई इच्छा इ।

¹⁹पवित्र आत्मा रे कम्मा जो नीं रोका।

²⁰भविष्यवाणियां जो घटिया नीं जाणो।

²¹सब्बीं गल्लां जो परखो; सै जे खरियां इया तिन्हौं ग्रहण करीने तिन्हांरा पालन करा।

²²हरेक बुराईया ते बचीने रौआ।

²³हऊँ परमेशरा ने प्राथना कराँ सै जे शान्ति देआं भई सै तुहांजो पूरे तरिके ने पवित्र करो; कने तुहांरी आत्मा, प्राण कने देह अहांरे प्रभु यीशु मसीह रे वापस औणे तक पूरे तौर पर निर्दोष कने सुरक्षित रौआ।

²⁴काँह्भई तुहांरा सदणे औल़ा सच्चा, कने तिस येढ़ा इ करना।

²⁵साथी विश्ववासियो, अहां खातर प्राथना करो।

²⁶सब्बीं साथी विश्ववासियां जो गले लाईने नमस्कार करो।

²⁷हऊँ तुहांजो प्रभु यीशुये रे नौआं ते हुक्म देआं भई ये पत्री सारयां साथी विश्वासियां जो पढ़ीने सुणाई जाओ।

²⁸अहांरे प्रभु यीशु मसीह रा अनुग्रह तुहां सौगी बणी रौ।