Read Bilaspuri 2 थिस्सलुनीकियां 3 Bible Online

2 थिस्सलुनीकियां 3 - Bilaspuri bible

2 थिस्सलुनीकियां 3

¹आखिर च, अरे साथी विश्वासियो, अहां खातर प्राथना करा भई प्रभुये रा वचन येढ़ा जल्दी फैल्लो कने महिमा पाओ तियां जे तुहां सौगी हुया था।

²कने प्राथना करा भई अहें टेढे कने दुष्ट माहणुआं ते बचीरे रौ काँह्भई सारे लोक विश्वास नीं करदे।

³पर प्रभु बफादार आ; तिस तुहांजो मजबूत करना कने तिस शैतान्ना ते बचाणे।

⁴कने अहांजो प्रभुये च तुहां पर भरोसा भई जो किछ अहें तुहांजो करने जो बोल्या, तुहें तियां इ करया राँये, कने करदयां रैहणा।

⁵परमेशरा रा प्यार कने मसीह रे धीरजा जो समझणे खातर प्रभु तुहांरी अगुवाई करो।

⁶अरे साथी विश्वासियो, अहें तुहांजो अपणे प्रभु यीशु मसीह रे अधिकारा ते हुक्म देआंये भई तुहें हरेक येढ़े विश्वासिये ते लग रौआ सै जे आलसी आ कने सै जे शिक्षा तिन्हें अहांते पाई तिसरे मुतावक नीं चलदे।

⁷तुहें खुद इ बौहत अच्छे तरीके ने जाणाँ यें भई तुहांजो तियां इ जीणा चाहिन्दा तियां जे अहें जीआं थे, काँह्भई ताहली जे अहें तुहांरे बिच थे तां अहें आलसी नीं थे पर काम्म करां थे,

⁸कने किसी ले मुफ्ता च रोटी नीं खाद्दि; बल्कि अहें कड़िया मेहणता ने रात-दिन काम्म करदे रै, ताकि अहांजो अपणियां जरूरतां रे खातर तुहां चते किसी पर बि निर्भर होणा नीं पौ।

⁹अहें कड़ी मेहणत कित्ती इस खातर नीं भई अहांजो तुहांते मदद पाणे रा अधिकार निआं; बल्कि अहें तुहांरे सामणे इक आदर्श रखणा चाँह थे, ताकि तुहें तिसरा पालन करी सक्को।

¹⁰काँह्भई अहें ताहली जे तुहां सौगी थे, तां बी ये हुक्म देआं थे भई “जे कोई काम्म करना नीं चाओ तां सै रोटी बी नीं खाओ।”

¹¹हुण अहांरे सुणने च औआं भई तुहां बिच किछ लोक आलसी जीवन जीआं ये, सै खुद काम्म नीं करदे, पर सै लगातार दुज्यां लोकां रे कम्मा च दखलंदाजी करां ये।

¹²अहें येढ़यां लोकां जो प्रभु यीशु मसीह रे अधिकारा ने ये हुक्म देआंये कने तिन्हांते विनती कराँ ये भई शाँतिया ने काम्म करदे रौआ कने अपणी कमाईया री रोटी खाया करा।

¹³साथी विश्वासियो, कांहभई तुहें निराश हुई चुक्कीरे इस खातर सै जे ठीक आ तिस्सो करना मत छड्डा।

¹⁴जे कोई अहां रिया इसा चिट्ठिया रियां गल्लां जो नीं मन्नो तां तिस पर नज़र रखा, कने तिसरी संगती नीं करा ताकि सै शर्मिन्दा हुई सक्को।

¹⁵तां बी तुहें तिस्सो दुश्मण नीं समझा, पर विश्वासी जाणीने खबरदार करा।

¹⁶हुण शान्ति देणे औल़ा प्रभु खुद तुहांजो हमेशा हर तरिके ने शान्ति देओ, प्रभु तुहां सब्बीं सौगी रौ।

¹⁷हऊँ, पौलुस, अपणे हत्था ते ये नमस्कार लिखां। हरेक चिट्ठिया च हऊँ इस तरिके ने लिखां, ताकि सारे लोक जाणी सक्को भई ये चिट्ठी मेरिया तरफा तेई।

¹⁸अहांरे प्रभु यीशु मसीह रा अनुग्रह तुहां सब्बीं पर हुन्दा रौ।