Read Bilaspuri 1 तिमुथियुस 1 Bible Online

1 तिमुथियुस 1 - Bilaspuri bible

1 तिमुथियुस 1

¹हऊँ पौलुस, यीशु मसीह रा प्रेरित आ तिसजो जे अहांरे छुटकारा करने औल़े परमेशरे कने मसीह यीशु तिस पर जे अहें भरोसा कराँ ये अधिकार दित्तिरा,

²तिमुथियुस हऊँ ये चिट्ठी तिज्जो लिखिराँ कने तू मेरे खातर इक पुत्रा साई आ, काँह्भई तू यीशु मसीह पर विश्वास कराँ। हऊँ प्राथना कराँ भई पिता परमेशर, कने मसीह यीशु अहांरे प्रभु तिज्जो अनुग्रह, दया कने शान्ति देओ।

³हऊँ चाँह भई तू इफिसुस नगरा च रौ तियां जे मैं मकिदुनिया प्रदेशा जो जान्दे वगत तेरने विनती कित्ती थी, काँह्भई तित्थी किछ लोक झूट्ठी शिक्षां देई रायें कने तू तिन्हां लोकां जो हुक्म दे भई सै झूट्ठी शिक्षां नीं देओ,

⁴कने तिन्हांने बोल भई येढ़ि मन घड़न्त कहाणियां कने पूर्वजां रियां खत्म नीं हुणे औल़ियां कहाणियां पर मन नीं लगाओ, तिन्हांते जे सिर्फ विवाद इ पैदा हुआं ये। कने सै विवाद परमेशरा रिया योजना जो रोकां ये, सै जे तिन्हां लोकां रे जरिये इ हुई सक्कां सै जे परमेशरा पर विश्वास कराँ ये।

⁵तिज्जो ये हुक्म देणे रा मेरा मकसद येआ भई तू इक्की दूये जो साफ दिला ते कने शुद्ध अन्तरात्मा ने कने बिणा कपटा औल़े विश्वासा ते प्रेम करगा।

⁶इन्हांजो छड्डिने कितणे लोक फिरीने बेकारा रियां गल्लां च भटकीगे,

⁷कने सै व्यवस्थापक हूणा चांह ये, पर सै जे गल्लां बोलां ये कने तिन्हां विषयां जो मजबूतिया ने बोलां ये, तिन्हांजो सै समझदे बी नींये।

⁸अहें जाणाँ ये भई जे लोक व्यवस्था जो ठीक-ढंगा ने इस्तेमाल करो तां सै खरी।

⁹अहें ये बी जाणाँ ये भई व्यवस्था धर्मी माहणुये खातर नीं पर तिन्हांरे खातर इ सै जे परमेशरा रिया व्यवस्था जो नीं मनदे, भगती हिनां, पापियां, अपवित्र कने अशुद्ध माहणुआं, माता-पिता रा खून करने औल़यां, हत्यारयां,

¹⁰व्यभिचारियां, आदमी सै जे आदमियां ने शारीरिक रिश्ता रखां ये, माहणुये रे बेचणे औल़यां, झूट्ठ बोलणे औल़यां, कने झूट्ठी कसम खाणे औल़यां, कने इन्हांजो छड्डिने खरे उपदेशा रे सारे विरोधियां खातर बणाई गईरी।

¹¹ये सही शिक्षा अहांरे अदभुत परमेशरा री महिमा रिया तिस खुशखबरिया रे मुतावक आ सै जे मिन्जो सौंपी गईरी।

¹²हऊँ अहांरे प्रभु यीशु मसीह रा धन्यवाद कराँ, तिने जे मिन्जो सामर्थ दित्तिरी, भई तिने मिन्जो बफादार समझीने अपणिया सेवा खातर नियुक्त कित्या।

¹³हलाँकि हऊँ त पैहले मसीह री निंध्या करने औल़ा, विश्वासियां जो सताणे औल़ा, कने निर्दयी माहणु था; तां बी मसीह माह पर दया कित्ती, काँह्भई मैं अनजाणे च कने अविश्वावासा रिया वजह ने ये काम्म कित्ते थे।

¹⁴कने अहांरे प्रभुये रा अनुग्रह तिस विश्वास कने प्यारा सौगी सै जे मसीह यीशु चा, बौहत जादा माह पर हुया।

¹⁵ये गल्ल सच्च कने हर तरिके ने मनणे लायक इ भई मसीह यीशु पापियां रा छुटकारा करने खातर संसारा च आया, तिन्हां सब्बीं च हऊँ बड़ा पापी आ।

¹⁶पर माह पर इस खातर दया हुई भई मुझ सब ते बड़े पापिये च यीशु मसीह अपणी पूरी सहनशीलता दस्सो, भई सै जे लोक तिस पर अनन्त जीवना खातर विश्वास करगे तिन्हां खातर हऊँ इक आर्दश बणुँ।

¹⁷हुण अनन्तकाल रा राजा, सै जे हमेशा रे खातर जिवित आ, तिस्सो जे कोई नीं देक्खी सकदा, तिस इकमात्र कने सच्चे परमेशरा रा आदर कने महिमा जुगां-जुगां तक हुंदी रौ। आमीन।

¹⁸मेरे पुत्र तिमुथियुस, तिन्हां भविष्यवाणियां रे मुतावक सै जे पैहले तेरे बारे च कित्तियां गई रियां थिआं, हऊँ तिज्जो ये हुक्म देआं ताकि तू तिन्हांरे मुतावक खुशखबरिया रे खातर खरी लड़ाई लड़दा रै;

¹⁹कने तिज्जो मसीह पर लगातार विश्वास करना चाहिन्दा कने तू सैई कर सै जे तू जाणाँ भई ये सही आ। किछ लोकें इस पर ध्यान नीं दित्या तिसरा नतीजा जे ये हुया भई हुण सै मसीह पर विश्वास नीं करदे।

²⁰मैं तिन्हां चते हुमिनयुस कने सिकन्दर जो कलीसिया ते बाहर करित्या कने तिन्हांजो शैतान्ना जो सौपीत्या ताकि सै परमेशरा री निंध्या करना नीं सिखो।