Read Bilaspuri 1 तिमुथियुस 2 Bible Online

1 तिमुथियुस 2 - Bilaspuri bible

1 तिमुथियुस 2

¹हुण हऊँ सब्बीं ते पैहले तेरने ये अर्ज कराँ भई तू सब्बीं माहणुआं रे खातर निवेदन, प्राथना, विनती कने धन्यवाद कर।

²राजयां कने सब्बीं अधिकारियां रे खातर प्राथना कर ताकि अहें आराम कने चैना सौगी परमेशरा रे प्रति सारी भगतिया कने ठीक बर्तावा ने जिन्दगी जी सक्को।

³इस तरिके री प्राथना अहांरे छुटकारा करने औल़े परमेशरा जो खरी लगां इ कने खुश बी कराँ इ,

⁴सै जे ये चांह भई सब्बीं माहणुआं रा छुटकारा हो, कने सै सच्चाईया जो ठीक-ढंगा ने पछयाणी लो।

⁵काँह्भई परमेशर इक इ हाया, कने परमेशर कने माहणुआं रे बिच इक इ बिचौल़िया यनि यीशु मसीह सै जे माहणु बणीने इस संसारा च आया।

⁶तिने जे अपणिया जिन्दगिया जो सब्बीं माहणुआं रे छुटकारे रे खातर कीमता रे रुपा च बल़ि करित्या, कने तिसरिया मौती रे जरिये परमेशरे सही वगता पर ये सबूत दित्या भई सै चांह भई सारे लोक छुटकारा पाओ।

⁷हऊँ सच्च बोलां, झूट्ठ नीं बोलदा, भई हऊँ इसा इ वजह ने प्रचारक, प्रेरित कने अन्यजातियां खातर विश्वास कने सच्चाईया रा उपदेशक चुणया गईरा।

⁸हऊँ चांह भई हर जगह मर्द, बिणा गुस्से कने बिणा बैहसा ते कने सै जे पवित्र जीवन जीयें सै अपणे हत्थां जो चक्कीने प्राथना करया करो।

⁹तियां इ हऊँ बी चांह भई जनानां बी ठीक ढंगा रे बधिया कपड़े पैहनीने अप्पूँजो स्वारो; नां की किसी रा ध्यान खिंजणे रे खातर बाल बनाणा कने सोने कने मोतियां कने मैहंगे कपड़यां ते,

¹⁰पर भलयां कम्मां ते, काँह्भई परमेशरा री भगती करने औलियां औरतां जो येई शोभा देआं।

¹¹ताहली जे मर्द तिन्हांजो सखांये, तां सारियां औरतां जो मर्दां रे पूरे अधिकारा जो जाणदे हुये चुपचाप सुणीने सिखणा चाहिन्दा।

¹²हऊँ अनुमति नीं देन्दा भई औरतां मर्दां जो शिक्षा देओ कने नां मर्दा पर राज करो, पर सभां च चुप-चाप रौ।

¹³काँह्भई परमेशरे पैहले आदम जो बणाया कने बाद बिच हव्वा जो;

¹⁴कने आदम शैतान्ना रे जरिये बहकाया नीं गया, पर औरते बैहकावे च आईने परमेशरा रे हुक्मा जो तोड़या।

¹⁵पर औरतां जन्म देंदे वगत खतरे ते बचाई लेई जाईयां, जे सै सब्र रखीने विश्वास, प्यार, कने पवित्रता च मजबूत रौ।