Read Bilaspuri 1 तिमुथियुस 4 Bible Online

1 तिमुथियुस 4 - Bilaspuri bible

1 तिमुथियुस 4

¹पवित्र आत्मा साफ-साफ बोलां भई आखिरी दिनां च किछ लोकां मसीह रिया शिक्षा पर विश्वास करना छड्डिने दुष्टात्मां री शिक्षा पर विश्वास करना, तिन्हां भटकाणे औलियां बुरीआत्मां जो अपनाणा।

²सै लोक जे ये झुट्ठियां शिक्षां देआं थे सै झूट्ठे लोक ये कने तिन्हांरी अन्तरात्मा मरी चुक्कीरी तियां जे भई गर्म लोहे तिन्हांजो जल़ाई तरा हो,

³येढ़े लोक ये सखायें भई ब्याह करना कने किछ किस्मा रा भोजन खाणा गल़त आ। पर परमेशरे ये खाणा विश्वासी लोकां खातर बणाईरा सै जे सच्चिया शिक्षा जो जाणाँ ये भई परमेशरा रा धन्यवाद करीने खाया जाओ।

⁴काँह्भई परमेशरा री बणाईरी हर इक चीज़ बधिया इ कने अहें सब किछ खाई सक्कां ये; पर ये भई धन्यवाद करीने खाई जाओ,

⁵काँह्भई ये सब किछ परमेशरा रे वचन कने प्राथना रे जरिये शुद्ध हुई जां।

⁶जे तू विश्वासियां जो लगातार इन्हां गल्लां री याद दिलान्दा रैहंगा, कने विश्वास कने तिस खरे उपदेशा रियां गल्लां ते, तिन्हांजो जे तू मनदा आईरा तेरा पालन पोषण कराँ, तां तू मसीह यीशुये रा इक खरा सेवक हूणा।

⁷पर मन घड़न्त कने बेकार कहाणियां ते दूर रैयां तिन्हांते जे परमेशरा जो आदर नीं मिलदा, बल्कि भगतिया रा जीवन जीणे खातर खुद लगातार मेहणत कर।

⁸काँह्भई शरीरा रिया वर्जिशा रा किछ इ फायदा मिलां, पर आत्मिक वर्जिश सारियां गल्लां खातर फायदेमन्द इ, काँह्भई ये इक्की माहणुये रे जिऊंदा रैहन्दे हुये बी कने मरने ते बाद बी तिसरी मदद कराँ इ।

⁹ये गल्ल सच्च कने हर तरिके ने मनणे लायक इ।

¹⁰अहें मेहणत कने कोशिश इस इ खातर कराँ ये भई अहांरी आशा तिस जीवते परमेशरा पर इ सै जे सब माहणुआं रा कने खास कर विश्वासियां रा छुटकारा करने औल़ा।

¹¹विश्वासियां जो इन्हां गल्लां रा हुक्म दे कने सखा।

¹²कोई तेरिया ज्वानिया जो बेकार नीं समझणे पाओ; पर वचन, कने चाल-चल़ण कने प्यार कने विश्वास, कने पवित्रता च विश्वासियां खातर आदर्श बणी जा।

¹³तदुआं तका जे हऊँ नीं आऊं, तदुआं तका वचन पढ़ने कने उपदेश देणे कने सखाणे रा काम्म कर।

¹⁴सै वरदान्न सै जे भविष्यवाणिया रे दवारा तूह पर प्राचीनां रे हाथ रखदे बगता तिज्जो मिलया था, तिस्सो लगातार तिज्जो इस्तेमाल करना चाहिन्दा।

¹⁵इन्हां गल्लां जो करदा रै कने इन्हां गल्लां पर अपणा ध्यान लगाईने रख, ताकि तेरी तरक्की सारे देखी सक्को।

¹⁶इस बारे च सावधान रै भई तू कियां जीं कराँ कने क्या सखाया राँ। इन्हां गल्लां जो लगातार करदा रै काँह्भई जे येढ़ा करदा रैंहगा, तां तू अपणा कने तिज्जो सुणने औल़यां रा बी छुटकारा करगा।