Read Bilaspuri 1 तिमुथियुस 5 Bible Online

1 तिमुथियुस 5 - Bilaspuri bible

1 तिमुथियुस 5

¹किसी सयाणे जो नीं थिड़क, पर तिस्सो अपणे पिता साई जाणीने प्यार कने आदरा ने समझाई दे, कने जवानां जो अपणे भाईये साई जाणीने;

²सयाणियां औरतां जो अपणिया माता साई जाणीने; जवान औरतां जो पूरिया पवित्रता ते अपणी बैहण जाणीने प्यार कने आदरा ने समझाई दे।

³तिन्हां विधवां रा, तिन्हांरी देखभाल करने औल़ा कोई बी नीं हो तिन्हांरा आदर करा।

⁴पर जे किसी विधवा रे बच्चे या नाती-पोते हो, तां सै पैहले अपणे परिवारा रे प्रति अपणी जिम्मेवारी निभाणा सिखो तियां जे इक मसीह विश्वासिये जो करना चाहिन्दा, कने ये करने रे जरिये सै अपणे माता-पिता कने दादा-दादिया रे उपकारा जो चुकाई सक्कां ये, काँह्भई ये परमेशरा जो खरा लगां।

⁵तिसा विधवा रा, तिसारी देखभाल करने औल़ा जे कोई बी नींआ, सै परमेशरा पर इ आशा रखां इ, कने मददा रे खातर रात-दिन परमेशरा ने विनती कने प्राथना करने च लगीरी रैईं;

⁶पर सै जे विधवा भोग विलासा रे खातर जीआं इ, सै मूईरे माहणुये साई, हलाँकि सै जिऊंदा इ।

⁷इन्हां गल्लां रा बी विश्वासिये जो हुक्म देआ कर ताकि सै निर्दोष रौ।

⁸पर जे कोई अपणयां रिस्तेदाराँ रा खास करीने अपणे परिवारा रा ख्याल नीं रखो, तां सै विश्वासा ते मुकरी गरा कने अविश्वासिये ते बी बुरा बणी गरा।

⁹विधवां रिया सूचिया च तिसा राई नौं लिख्या जाओ तिसारी उम्र जे साट्ठ साल्लां ते ऊपर हो, कने सै जे अपणे पतिये रे परति बफादार रैई हो,

¹⁰कने भलयां कम्मां च तिसारा नौं हो, तियां जे बच्चयां रा पाल़ण-पोषण; मेहमान्नां री सेवा कित्ती हो, पवित्र लोकां री इक दासिया साई सेवा कित्ती हो, दुखियां री मद्‌द कित्ती हो, कने हरेक भले कम्मां च मन लाया हो।

¹¹पर जवान विधवां रा नौं सूचिया च मत लिखयां, काँह्भई ताहली जे तिन्हांरियां भोग-विलासा रियां इच्छां बधी जाईयां, तां सै भीं ते ब्याह करना चाईयां कने मसीह ते दूर हुई जाईयां,

¹²कने इस तरिके ने सै दोषी बणां इयां, काँह्भई तिन्हें फेरी भीं ब्याह नीं करने रा अपणा पैहला वायदा तोड़ीत्या।

¹³कने इसते इलावा तिन्हांजो घरें-घरें फिरीने आलसी हुणे री आदत पैई जाईं, कने सिर्फ आलसी ही नीं पर बक-बक करदी रैईयां कने दुज्यां रे कम्मां च विघन बी पाईयां कने गल़त गल्लां बोलां इयां सै जे तिन्हांजो नीं बोलणियां चाहिन्दियां।

¹⁴इस खातर हऊँ ये चांह भई जवान विधवां ब्याह करो, कने बच्चे जणो, कने घर-बार सम्भालो, कने किसी दुश्मणा जो बदनाम करने रा मौका नीं देओ।

¹⁵काँह्भई किछ विधवां त मुड़ीने शैतान्ना रे पिच्छे हुई चुक्की रियां।

¹⁶जे किसी विश्वासिनी रे परिवारा च विधवा हो, तां सैई तिन्हांरी मद्‌द करो भई कलीसिया पर बोझ नीं हो, ताकि कलीसिया तिन्हांरी मद्‌द करी सक्को तिन्हां विधवां रा, तिन्हांरी जे देखभाल करने औल़ा कोई बी नीं हो।

¹⁷सै प्राचीन जे कलीसिया रे कम्मां जो ठीक-ढंगा ने कराँ ये, विशेष करीने सै जे वचन सुनाणे कने सखाणे च मेहणत कराँ ये, सै दो गुणा आदरा रे लायक समझे जाओ।

¹⁸काँह्भई पवित्रशास्त्र बोलां, “गाहण गाहन्दे वगत बैला रा मुँह नीं बन्हणा,” कने दुज्जिया जगह पवित्रशास्त्र बोलां “मज़दूर अपणी मज़दूरिया रा हकदार आ।”

¹⁹किसी बी कलीसिया रे प्राचीना रे खलाफ दो या तिन्न गवांह ते बिणा कोई बी आरोप नीं सुणा।

²⁰पाप करने औल़यां जो सब्बीं रे सामणे डान्ट, ताकि होर लोक बी डरो।

²¹परमेशर कने मसीह यीशु कने चुणीरे स्वर्गदूतां जो हाजर जाणीने हऊँ तिज्जो हुक्म देआं भई तू बिणा भेदभावा ते इन्हां गल्लां जो मन्नया कर, कने कोई काम्म भेदभावा ने नीं कर।

²²किसी पर इकदम हाथ रखीने अगुवे नीं बणायां, कने जे तू ये कराँ, तां तू तिसरे पापां रा जिम्मेवार हूणा; अप्पूँजो पवित्र बणाई रख।

²³सिर्फ पाणी ही नां पीआं, पर अपणे पेट्टा रे कने बार-बार बमार हुणे रिया वजह ते थोड़ा-थोड़ा अंगूरां रा रस बी इस्तेमाल कर।

²⁴हऊँ तिज्जो किसी जो जल्दी प्राचीना रे रुपा च चुणने खातर इस खातर नीं बोल्या राँ, काँह्भई किछ लोक खुल्हेआम पाप कराँ ये। सै तिन्हांरा न्याय हुणे ते पैहले इ विश्वासियां रे सामणे साफ तौर पर दोषी ये, पर किछ लोकां रे पाप बाद बिच दिखां ये।

²⁵तियां इ किछ लोकां रे भले काम्म साफ तौर पर दिखां ये; कने सै जे साफ तौर पर नीं दिखाई देआंये, सै भले काम्म बी छुपी नीं सकदे।