Read Bilaspuri 1 तिमुथियुस 6 Bible Online

1 तिमुथियुस 6 - Bilaspuri bible

1 तिमुथियुस 6

¹जितने विश्वासी लोक दास ये, तिन्हौं अपणे-अपणे मालका जो सारियां गल्लां च ईज्जत देणी चाहिन्दी, ताकि दुज्जे लोक परमेशरा री कने अहां रिया शिक्षां री निंध्या नीं करो।

²कने तिन्हांरे मालक जे विश्वासी ये, तिन्हांजो सै विश्वासी हुणे रिया वजह ते नीच नीं जाणो, वल्कि सै तिन्हांरी होर बी अच्छे तरिके ने सेवा करो, काँह्भई इसते फायदा लेणे औल़े विश्वासी ये कने परमेशर तिन्हांने प्रेम कराँ। इन्हां गल्लां रा उपदेश करया कर कने पालन करने रे खातर लोकां जो हौंसला दे।

³जे कोई झूट्ठी शिक्षा देआं, कने अहांरे प्रभु यीशु मसीह रे सही सन्देशा यनि परमेशरा रिया भगतिया रियां शिक्षा ते सहमत नीं हुन्दा,

⁴तां सै घमण्डी हुईगरा, कने सै किछ नीं समझदा। येढ़ा माहणु बैहसबाजी कने बेकार गल्लां कने शब्दां पर झगड़ा करना चांह, तिसरा नतीजा जे जल़ण, झगड़े, निंध्या रियां गल्लां, कने बुरे शक,

⁵कने इक्की दूये ने नीं खत्म हुणे औल़े झगड़े, कने तिन्हांरी बुद्धि भ्रष्ट हुईगरी, कने सै सच्चाईया जो नीं समझी सकदे, सै समझां ये भई परमेशरा री सेवा करना इ अमीर हुणे रा जरिया।

⁶पर ये अहांरे खातर भला भई अहें सैई करिये सै जे परमेशरा जो खुश कराँ, कने परमेशर जो किछ अहांजो देआं तिस पर अहें संतोख करो।

⁷काँह्भई अहें ताहली जे पैदा हुये थे, तां अहें संसारा च किछ बी लेईने नीं आये थे कने नां किछ इस संसारा ते लेई जाई सक्कां ये, ताहली जे अहांरी मौत हुआं इ।

⁸जे अहांले खाणे जो रोटी कने पैहनणे जो कपड़ा हो, तां अहांजो इन्हां पर इ सन्तोख करना चाहिन्दा।

⁹पर सै जे अमीर हूणा चांह ये, सै येढ़िया परीक्षा कने फन्दे कने बौहत सारियां बेकार कने नुक्शान करने औल़ियां लालसां च जानबरा साई फसां ये, सै जे माहणुआं जो बगाड़ी देआं इयां, कने पूरे तरिके ने नाश करी देईयां।

¹⁰काँह्भई पैसे रा लालच सारियां बुराँईयां री जड़ इ, किछ लोक तिस्सो पाणे रे खातर कोशिश करदे हुये विश्वासा ते भटकी चुक्कीरे कने तिन्हें अप्पूँजो कई तरीकयां ने दुखां च पाईलरा।

¹¹पर अरे परमेशरा रे माहणु तिमुथियुस, तू इन्हां गल्लां ते दूर हुई जा, कने सै जे सही आ तिसजो करने री हरेक कोशिश कर, कने परमेशर तेढ़ा जे चांह तू तियां बर्ताव कर, मसीह पर विश्वास कर, दुज्यां लोकां ने प्यार कर, मुशीवतां जो सैई लै कने लोकां सौगी गुस्सा नीं कर।

¹²तियां जे इक अच्छा सिपाही लड़ाईया च लड़ाई करना कदीं नीं छडदा तियां इ तिज्जो बी परमेशरा पर विश्वास करना कने तिसरे पिछे चलना कदीं नीं छडणा चाहिन्दा, ताकि तू अपणे ईनामा रे रुपा च अनन्त जीवन पाई सक्को, तिसरे खातर जे तिज्जो सद्दया गईरा, ताहली जे बौहत लोकां रे सामणे तैं साफ तौर पर बोल्या था भई तू मसीह पर विश्वास कराँ।

¹³परमेशरा जो गवाह मन्नीने सै जे सब्बीं जो जिन्दगी देआं, कने यीशु मसीह जो बी गवाह मन्नीने तिने जे पुन्तियुस पिलातुसा रे सामणे अपणे बारे च सच्च बोल्या था, हऊँ तिज्जो हुक्म देआं,

¹⁴भई तू अहांरे प्रभु यीशु मसीह रे दोबारा औणे तक सै सब कर तिस्सो जे पूरी तरह करने खातर परमेशरे तिज्जो हुक्म दित्तिरा, ताकि कोई बी तेरी निंध्या नीं करी सक्को भई तू गल़त करया राँ।

¹⁵मसीहे परमेशरा रे तैह कित्तिरे वगता पर औणा, परमेशर सै जे परमधन्य कने इकलौता शासक कने राजयां रा राजा कने प्रभुआं रा प्रभु आ,

¹⁶कने सिर्फ सैई हाया सै जे हमेशा जिऊंदा रैयां, कने सै बौहत तेज ज्योतिया च रैयां भई कोई तिसरे नेड़े जाई नीं सकदा, कने नां तिस्सो किसी माहणुये देख्या कने नां कदीं देखी सक्कां। तिसरा आदर कने सामर्थ हमेशा रे खातर रैहणा। आमीन।

¹⁷इस संसारा रे अमीर लोकां जो हुक्म देओ भई सै घमण्डी नीं हो कने सै धना पर आशा नीं रखो सै जे किछ वगता रे खातर आ, पर सै परमेशरा पर आशा रखो सै जे अहांरे सुखा खातर सब किछ ईमानदारिया ने अहांजो देआं।

¹⁸तिन्हांजो भले काम्म करने खातर हुक्म दे कने सै बौहत भले काम्म करो, कने उदारता पूर्वक दान देईने दुज्यां री मद्‌द करने जो त्यार रौ।

¹⁹इस तरिके ने सै अपणे भलयां कम्मां जो अपणे खातर धना साई कट्ठा करगे, सै जे स्वर्गा च तिन्हांरी भविष्य रे खातर इक मजबूत निऊँआ साई हूणा, ताकि सै सच्चा जीवन पाई सक्को सै जे हमेशा रे खातर आ।

²⁰अरे तिमुथियुस, तू ये निश्चा कर भई सै जे परमेशरे तिज्जो सौंपीरा तू सैई कराँ। कने तिन्हां लोकां री मत सुणयां सै जे लगातार मूर्ख गल्लां कराँ ये तिन्हांते जे परमेशरा रे खातर आदर नींआ कने बेकार च बैहस कराँ ये कने सै बोलां ये भई ये ज्ञान आ, पर सच्चीजो ये नींआ।

²¹काँह्भई किछ लोक इसजो ग्रहण करीने विश्वासा ते भटकी गरे। तुहां सब्बीं पर परमेशरा रा अनुग्रह हुन्दा रौ।