Read Bilaspuri 2 तिमुथियुस 2 Bible Online

2 तिमुथियुस 2 - Bilaspuri bible

2 तिमुथियुस 2

¹इस खातर अरे मेरे पुत्र तिमुथियुस, मसीह यीशुये च मिलणे औल़े अनुग्रह ते मजबूत हुई जा।

²कने बौहत लोकां रे सामणे जो शिक्षायें तैं माहते सुणी रियां, तिन्हौं बफादार माहणुआं जो सौंपी दे सै जे दुज्यां जो बी सखाणे रे लायक हो।

³मसीह यीशुये रे इक अच्छे सिपाईये साई अहां सौगी दुख सै।

⁴येढ़ा कोई बी सै जे सपाईये साई सेवा करया राँ, अप्पूँजो सधारण जीवना च नीं फसाई लेंदा, काँह्भई सै अपणे बड्डे अफसरा जो खुश करना चांह।

⁵इस तरिके ने जे कोई किसी खेला रे मुकावले च भाग लेआं, पर खेल कूदा रे नियमा मुतावक मुकाबला नीं करदा तां सै विजय रा मुकुट नीं पाई सकदा।

⁶तिने करसाणे जे कड़ी मेहणत कित्तिरी तिसजो इ फसला रा पैहला हिस्सा मिलणा चाहिन्दा।

⁷सै जे हऊँ बोलां तिस पर सोच कने प्रभु तिज्जो इन्हां सारियां गल्लां जो समझणे रे खातर मदद करगा।

⁸यीशु मसीह जो याद कर सै जे मूईरयां चते जिऊंदा हुया कने सै जे राजा दाऊद रे बंशा रा। येई मेरी खुशखबरी तिस राजे हऊँ प्रचार कराँ,

⁹तिसरे खातर जे हऊँ अपराधिये साई दुख सैया राँ, येत्थी तक भई हऊँ जंजीरा च जकड़ी रा। पर कोई बी माहणु लोकां जो परमेशरा रे वचना रा प्रचार करने ते रोकी नीं सकदा।

¹⁰इस खातर परमेशरा रे चुणी रयां लोकां खातर हऊँ सब किछ सैयां ताकि सै बी मसीह यीशुये च मिलणे औल़े छुटकारे जो अनन्त महिमा सौगी पाई सक्को।

¹¹ये गल्ल सच्च इ भई, जे अहें तिस सौगी मरी चुक्कीरे, तां अहां तिस सौगी जीणा बी आ,

¹²जे अहें दुख सैयें तां तिस सौगी राज बी करना। जे अहें तिसरा इन्कार करगे, तां तिस बी अहांरा इन्कार करना,

¹³जे अहें बफादार नींये, तां बी तिस बफादार रैहणा, काँह्भई मसीह खुद अपणा इन्कार नीं करी सकदा।

¹⁴विश्वासियां जो इन्हां गल्लां री याद दिलान्दा रै कने तिन्हांजो परमेशरा रिया हजूरिया च चेतावनी दे भई सै शब्दां जो लईने झगड़ा नीं करो इसते कोई फायदा नीं हुन्दा, पर इसजो सुणने औल़े नाश हुई जांये।

¹⁵कड़ी मेहणत कर ताकि तू अप्पूँजो परमेशरा रिया नज़राँ च ग्रहण लायक माहणुये साई पेश करी सक्को कने येढ़ा काम्म करने औल़े साई बण सै जे अच्छा काम्म कराँ कने अपणे कम्मा रे बारे च शर्मिन्दा नीं हुन्दा, कने सै जे सच्चे सन्देशा जो ठीक ढंगा ने सखां।

¹⁶पर बेकार कने मूर्ख गल्लां ते दूर रै, काँह्भई ये गल्लां सिर्फ लोकां जो परमेशरा ते दूर लेई जांईयां।

¹⁷कने तिन्हांरी शिक्षा सड़ीरे जख्मा साई फैलदी जाणी कने आखिर च लोकां रे विश्वासा जो नाश करगी; हुमिनयुस कने फिलेतुस तिन्हां चते दो लोक ये सै जे इस तरिके री शिक्षा दें।

¹⁸तिन्हेंजे सच्चाईया जो छड्डीतरा, सै बोलां ये भई मूईरयां चते जिऊंदा हूणा हुई चुक्कीरा, कने सै किछ विश्वासियां रे विश्वासा जो नाश करी राँये।

¹⁹फेरी बी परमेशरे सै जे पक्की निऊं बणाईरी, सै मजबूत खढ़ीरी कने तिस पर ये लिखिरा : “प्रभु अपणे लोकां जो जाणाँ,” कने “सै जे कोई बोलां भई सै प्रभुये रा सै बुराईयां ते दूर रौ।”

²⁰इक्की बड्डे घरा च सिर्फ सोने-चाँदिया रेई बरतण नीं हुंदे, पर तिसच लकड़िया कने मिट्टिया रे भान्डे बी हुआं ये; किछ खास मौके पर इस्तेमाल कित्ते जांये कने किछ रोज के कम्मां खातर इस्तेमाल कित्ते जांये।

²¹इस खातर जे कोई विश्वासी अप्पूँजो बुराईयां ते पवित्र करी लो, तां तिस खास मौके पर इस्तेमाल हुणे औल़े बर्तणा साई बणी जाणा कने तिसरा जीवन पवित्र हूणा, तां तिसरा मालक तिस्सो इस्तेमाल करी सकगा कने तिस हर तरह रे भले काम्म करने खातर त्यार हूणा।

²²इस खातर तू ज्वानिया रिया बुरियां इच्छां ते दूर जा कने सै लोक जे साफ दिला ने प्रभुये जो पुकाराँ ये, तिन्हां सौगी मिलीने धार्मिकता, विश्वास, प्यार कने शान्तिया रे पिच्छे चल।

²³पर मूर्ख कने बेकार बैहसा ते दूर रै, काँह्भई तू जाणाँ भई तिन्हांते झगड़ा हुआं।

²⁴कने प्रभुये रे सेवका जो त झगड़ना इ नीं चहिन्दा, वल्कि तिस्सो त सब्बीं पर दया कने परमेशरा रे वचना जो ठीक ढंगा ने सखाणे रे काविल हूणा चाहिन्दा, तिस्सो सैहनशील हूणा चहिन्दा।

²⁵तिस्सो अपणे बरोधियां जो बी इसा आशा ने विनम्रता सौगी समझाणा चाहिन्दा भई परमेशरा तिन्हांरे मना जो बदलने च कने मसीह री सही शिक्षां जो बी जाणने च मदद करनी।

²⁶ताकि सै अपणे होशा च आईजो कने शैतान्ना रे कब्जे ते छुटी जाओ तिने जे तिन्हौं धोखा दित्तिरा कने अपणिया इच्छा पर चलने खातर मजबूर कित्या।