Read Bilaspuri 2 तिमुथियुस 3 Bible Online

2 तिमुथियुस 3 - Bilaspuri bible

2 तिमुथियुस 3

¹तिमुथियुस हऊँ चांह भई तू ये जाणी ले, संसारा रे आखरी दिनां च बौहत बुरा बगत हूणा।

²काँह्भई लोकां सिर्फ अप्पूँजो प्यार करना, पैसे ने प्यार करना, डींग मारना, घमण्डी हुणे, निंध्या करने औल़े हुणे, अपणे माता-पिता रा हुक्म नीं मनणे औल़े, नमकहराम, अपवित्र हुणे,

³दुज्यां ने प्यार नीं करने औल़े, माफ नीं करने औल़े, दोष लाणे औल़े, अपणिया इच्छां पर काबू नीं करने औल़े, बेरैहम, भलाईया ते नफरत करने औल़े,

⁴विश्वासघाती, लापरवाह, घमण्डी कने सै परमेशरा ने प्यार करने री बजाय सुखा जो चाहणे औल़े हुणे।

⁵तिन्हां भगत हुणे रा नाटक करना, पर परमेशरा रिया सामर्था रा इन्कार करना; येढ़यां लोकां ते दूर रौआ।

⁶इन्हां चते किछ येढ़े लोक ये सै जे घराँ च घुसां ये कने मूर्ख औरतां जो अपणे बशा च करी लैं, ये औरतां अपणे पापां रे बोझे च दबोईने हर तरिके रियां बुरी इच्छां रे बशा चियां।

⁷ये औरतां हमेशा नई-नई गल्लां सिक्खां इयां, पर सै कदीं सच्चाईया जो समझी नीं पान्दियां।

⁸तियां जे यन्नेस कने यम्ब्रेसे मूसा रा बरोध कित्या था, तियां इ ये झूट्ठे शिक्षक बी सच्चाईया रा बरोध कराँ ये। इन्हां लोकां री बुद्धि भ्रष्ट इ कने सै हकीकत च मसीह पर विश्वास नीं करदे।

⁹पर ये लोक बौहत वगता तक लोकां जो धोखा नीं देई सकगे, काँह्भई तियां जे लोकें यन्नेस कने यम्ब्रेस री मूर्खता जो पछयाणील्या था, तियां इ सारयां लोकां तिन्हां रिया मूर्खता जो पछयाणी लेणा।

¹⁰किछ बी हो, तू मेरिया शिक्षा जो जाणाँ, मेरा जीणे रा ढंग, जीणे रा मकसद, मेरा विश्वास, मेरी सैहणे री ताकत, मेरा प्यार, मेरा धीरज

¹¹कने मेरे सताव, मेरे दुखा रे बगता तैं मेरा साथ दित्तिरा। तू त जाणाँ भई अन्ताकिया, इकुनियुम कने लुस्त्रा नगराँ च मिन्जो किस तरिके री यातना दित्ति थी तिन्हौं जे मैं सहील्या, पर प्रभुये मिन्जो तिन्हां सब्बीं ते बचाईल्या।

¹²असल च, जो बी मसीह यीशुये च भगतिया रा जीवन जीणा चांये सै सारे सताये जाणे।

¹³पर बुरे लोक कने बैहकाणे औल़यां होर जादा बुरा काम्म करना, तिन्हां लोकां जो धोखा देणा कने खुद तिन्हां दुज्यां रे जरिये धोखा खाणा।

¹⁴पर तिमुथियुस तैं तिन्हां गल्लां जो जे सिखीरा कने मजबूतिया ने विश्वास कराँ, तिन्हां पर लगातार विश्वास करदा रैयां, काँह्भई तू तिन्हांजो जाणाँ भई तिज्जो किने इसा सच्चाईया जो सखाईरा।

¹⁵कने तू बचपना तेई पवित्रशास्त्रा जो जाणाँ, सै जे मसीह यीशुये पर विश्वास करने कने छुटकारा पाणे खातर तिज्जो बुद्धि देई सक्कां।

¹⁶सारा पवित्रशास्त्र परमेशरा री प्रेरणा ते रचया गईरा कने सै लोकां जो सच्चाईया री शिक्षा देणे, डांटणे, गल़तियां सुधारने च उपयोगी, कने धार्मिक जीवन जीणे खातर निर्देश देआं।

¹⁷ताकि परमेशरा रा माहणु हर तरिके रा भला काम्म करने रे खातर पूरा त्यार कने लायक बणी जाओ।