Read Bilaspuri 2 तिमुथियुस 4 Bible Online

2 तिमुथियुस 4 - Bilaspuri bible

2 तिमुथियुस 4

¹परमेशर कने मसीह यीशुये रिया हजूरिया च तिस जे जिऊंदेयां कने मूईरयां रा न्याय करना, तिसरे दोवारा औणे कने तिसरे राज्जा रे बारे च ध्यान रखदे हुये हऊँ तिज्जो ये हुक्म देआं

²भई तू परमेशरा रे वचना रा प्रचार कर हालात चाये ठीक हो या नीं हो वचन प्रचार करने खातर त्यार रै। तिज्जो लोकां जो ये दसणा जरूरी आ भई तिन्हें क्या गल़ती कित्तिरी कने तू तिन्हांरे पापां रे खातर तिन्हौं डान्ट। पर तिज्जो लोकां जो हौंसला बी देणा चाहिन्दा तियां जे तू धीरजा ने तिन्हांजो शिक्षा देआं।

³काँह्भई येढ़ा बगत औणा, ताहली जे लोकां सही शिक्षां जो नीं सुणना, पर तिन्हां अपणिया इच्छा पर चलना कने तिन्हां बौहत सारे येढ़े शिक्षकां जो कट्ठा करना तिन्हां सैई बोलणा जो किछ ये लोक सुणना चांये।

⁴तिन्हां परमेशरा रे सही वचनां जो नीं सुणना वल्कि मन गढ़ंत कहाणियां जो सुणना।

⁵पर तिज्जो हर हालता च अप्पूँजो काबुये च रखणा चाहिन्दा, दुख सै कने खुशखबरिया रा प्रचार कर कने अपणी जिम्मेवारिया जो पूरा कर सै जे प्रभुये तिज्जो दित्तिरी।

⁶हऊँ तिज्जो ये हुक्म देआं, काँह्भई मेरा जीवन अर्घा साई बेदिया पर लट्टया जाई चुक्कीरा, इसरा मतलब मेरिया मौती रा बगत आई चुक्कीरा।

⁷मैं मसीह रे खातर कड़ी मेहणत कित्तिरी तियां जे भई मैं ठीक ढंगा ने कुश्ती लड़ीरी कने हऊँ सै काम्म पूरा करी चुक्कीरा सै जे यीशु मसीह मिन्जो करने खातर दित्या कने हऊँ आखिर तक बफादार रैया।

⁸हुण जीता रा मुकुट स्वर्गा च मेरे खातर इन्तजार करया राँ, काँह्भई मैं परमेशरा जो खुश कित्तिरा। प्रभु सै जे न्याय ने सारयां लोकां रा न्याय कराँ तिस न्याय रे दिन मिन्जो ये मुकट देणा, मिन्जो इ नीं वल्कि तिन्हां सारयां लोकां जो बी देणा सै जे तिसरे दोवारा औणे रा बेशबरिया ने इन्तजार करया राँये।

⁹तिमुथियुस, तू मेरले जल्दी औणे खातर पूरी कोशिश कर।

¹⁰काँह्भई देमास मिन्जो छड्डिने थिस्सलुनीके नगरा जो जाई चुक्कीरा, काँह्भई सै इस संसारा रिया चीजां जो प्रेम कराँ। क्रेसकेंस बी गलातिया प्रदेशा जो कने तीतुस दलमतिया प्रदेशा जो चलीगरे।

¹¹सिर्फ लूका इ मेरेले आ। ताहली जे तू औआं मरकुस जो बी अप्पूँ सौगी ल्यायां, काँह्भई सै मेरिया सेवकाईया च मेरी मदद करी सक्कां।

¹²तुखिकुसा जो हऊँ इफिसुस नगरा जो भेज्जी चुक्कीरा।

¹³ताहली जे तू आओ, तां तिस कोटा जो ली आयां तिस्सो जे मैं त्रोआसा नगरा च करपुस रे घरा च छड्डी आईरा था। मेरियां कताबां जो, खास करीने चर्म-पत्राँ जो बी ली आयां।

¹⁴सिकन्दर सै जे ठठेरा तिने कई तरीकयां ने मेरा बड़ा नुक्शान कित्तिरा। प्रभुये तिस्सो तिसरे बुरे कम्मा रे मुतावक सजा देणी।

¹⁵तू बी तिसते सावधान रै, काँह्भई तिने अहां रियां शिक्षां रा कड़ा बरोध कित्या था।

¹⁶ताहली जे मिन्जो पैहली बार अदालता च सफाई देणी पैई; तां किन्हिये बी मेरा साथ नीं दित्या, पर सारयां मिन्जो छडित्या था। हऊँ प्राथना कराँ भई परमेशर इस कम्मा रे खातर तिन्हांजो माफ करो।

¹⁷पर प्रभुये मेरा साथ दित्या कने मिन्जो सामर्थ दित्ति, ताकि मेरे जरिये साफ तौर पर खुशखबरिया रा प्रचार हुई सक्को कने सब अन्यजातियां रे लोक सुणी सक्को; कने प्रभुये मिन्जो मौती ते बचाया।

¹⁸प्रभुये मिन्जो हरेक बुराईया ते बचाणा सै जे मेरा नुक्शान करना चाईयां कने तिस मिन्जो अपणे स्वर्ग राज्जा च हिफाज़ता ने लेई जाणा। तिसरी महिमा सदा हुन्दी रौ। आमीन।

¹⁹प्रिस्का कने तिसारा पति अक्विला कने उनेसिफुरुस रे परिवारा जो मेरा नमस्कार।

²⁰इरास्तुस कुरिन्थुस नगरा च रुकी गरा। मैं त्रुफिमुस जो बमारिया रिया वजह ते मिलेतुस नगरा च छड्डीतरा।

²¹ठण्ड हुणे ते पैहले औणे री पूरी कोशिश करयां। यूबुलुस, पूदेंस, लिनुस कने क्लौदिया कने सारे विश्वासियां रा तिज्जो नमस्कार।

²²हऊँ प्राथना कराँ भई प्रभु तेरे सौगी रौ कने परमेशरा रा अनुग्रह तुहां सब्बीं पर बणीरा रौ।