Read Bilaspuri इब्रानियों 1 Bible Online

इब्रानियों 1 - Bilaspuri bible

इब्रानियों 1

¹बौहत पैहले परमेशरे अहांरे पूर्वजां ने कई बार लग-लग तरीकयां ने भविष्यवक्तयां रे जरिये गल्लां कित्तियां,

²इन्हां दिनां रे आखिर च परमेशरे अहांने अपणे पुत्रा रे जरिये गल्लां कित्तियां, तिसजो जे परमेशरे सारियां चिज़ां रा बारस बणाया कने तिसरे जरिये जे परमेशरे सारे संसारा जो रचीरी।

³पुत्र इ तिसरिया महिमा रा तेज आ कने सै हर तरह ते परमेशरा साई आ, सैई अपणे सामर्था रे वचना ने सारी सृष्टिया जो सम्भाल़ां। सै लोकां रे पापां जो माफ करीने आदर कने अधिकारा रिया जगह सै जे स्वर्गा च पिता परमेशरा रे सज्जे पासे जाई बैट्ठीरा।

⁴ये करने रे जरिये परमेशरे पुत्रा जो स्वर्गदूतां ते महान बणाया, कने सै नौं जे तिस्सो दित्या सै स्वर्गदूतां ते महान आ।

⁵काँह्भई परमेशरे कदीं किसी स्वर्गदूता जो ये नीं बोल्या भई, “तू मेरा पुत्र आ; आज्ज हऊँ ये घोषित करा भई तू मेरा पुत्र आ” कने फेरी परमेशरे किसी स्वर्गदूता जो ये नीं बोल्या “मांह तिसरा पिता हूणा, कने सै मेरा पुत्र हूणा।”

⁶कने फेरी परमेशरे अपणे पैहलौठे पुत्रा जो संसारा च भेजणे ते पैहले ये बोल्या, “परमेशरा रे सब स्वर्गदूत तिसरे अग्गे मत्था टेक्कें।”

⁷कने स्वर्गदूतां रे बारे च परमेशर ये बोलां, “सै अपणयां दूतां जो हवा साई बणां, कने अपणयां सेवकां जो भड़की रिया अग्गी साई बणां।”

⁸पर परमेशर पुत्रा रे बारे च बोलां, “परमेशर, तेरा संघासण युगां-युगां तकौ रैहणा: कने तुहां न्याय ने राज करना।

⁹सै जे ठीक आ तिस्सो करने ते तू प्यार कराँ कने सै जे गल़त आ तिस्सो करने ते तू नफरत कराँ; इसा वजह ने तेरे परमेशरे तिज्जो चुणीरा कने तेरे साथियां ते बधीने महान आदर कने आनन्द दित्तिरा।”

¹⁰कने परमेशर ये बी बोलां भई, “प्रभु, तैं सब्बीं ते पैहले धरतिया री सृष्टि कित्ती कने स्वर्गा री बी सृष्टि कित्तिरी।

¹¹सै त नाश हुई जाणे; कने पुराणे कपड़े साई सै बेकार हुई जाणे, पर तू सदा रैहणा

¹²कने तू तिन्हौ चादरी साई लपेटणा, कने तिन्हांजो कपड़यां साई बदलना पर तू कदीं नीं बदलदा कने तू कदीं नीं मरदा।”

¹³कने परमेशरे कदीं किसी स्वर्गदूता जो ये नीं बोल्या, “तू मेरे सज्जे पास्से आदर कने अधिकारा रिया जगह बैठ, तदुआं तकौ जे हऊँ तेरे बैरियां जो पूरी तरह तेरे बशा च नीं करी दूँ।”

¹⁴तां स्वर्गदूत क्या कराँ ये? सै सारे सिर्फ परमेशरा रेई सेवक ये तिसजो जे परमेशर छुटकारा पाणे औल़यां रा ख्याल रखणे खातर भेज्जां।