Read Bilaspuri इब्रानियों 10 Bible Online

इब्रानियों 10 - Bilaspuri bible

इब्रानियों 10

¹मूसा री व्यवस्था त औणे औल़ियां गल्लां री सिर्फ परछाई। पर तिसरा असली रुप निआं, इस खातर तिन्हां इक्को जेईयां बल़ियां रे जरिये तिन्हौं जे हर साल लगातार चढ़ाई जाईयां, तिन्हां लोकां जो सै जे परमेशरा ले अराधना करने खातर औआं ये तिन्हांजो कदीं बी सिद्ध नीं करी सकदियां।

²जे सै लोकां जो सिद्ध करी देन्दी तां बल़ि चढ़ाणा खत्म हुई जान्दा, काँह्भई तां अराधना करने औल़े इक्की बारिया च हमेशा खातर पवित्र हुई जान्दे। कने अपणे पापां रे खातर फेरी कदी अप्पूँजो अपराधी नीं समझदे।

³पर ये बल़ियां त हर साल लोकां जो अपणे पापां रे बारे च याद दिलां इयां।

⁴काँह्भई बकरयां कने बछड़यां रा लहू पापां जो कदीं दूर नीं करी सकदा।

⁵इस खातर ताहली जे मसीह इस संसारा च औणे औल़ा था, तां तिने परमेशरा ने बोल्या, बलिदान कने भेंट तैं नीं चाही, पर तैं मिन्जो इक शरीर दित्तिरा।

⁶होम बल़ियां कने पाप बल़ियां ते तू खुश नींआ।

⁷तां फेरी मसीह ने बोल्या, हे परमेशर, तेरी इच्छा पूरी करने जो हऊँ येत्थी आ, “तियां जे ये पवित्रशास्त्रा च मेरे बारे च लिखिरा।”

⁸तिने पैहले बोल्या था, “बल़ियां कने भेन्टां, होम बल़ियां कने पाप बल़ियां नांत तू चाँह कने नांई तू तिसते खुश हुआं।” (हलांकि मूसा री व्यवस्था ये चाँई भई सै चढ़ाये जायें।)

⁹फेरी तिने बोल्या, “परमेशर, तेरी इच्छा पूरी करने जो हऊँ येत्थी आ।” तां परमेशर सारे पुराणे बलिदान्नां जो हटाईने तिन्हां रिया जगह पर मसीह रे बलिदान्ना जो रखां।

¹⁰इस खातर परमेशरा रिया इच्छा ते यीशु मसीह रे इक इ बार बलिदान चढ़ाये जाणे रे जरिये अहें पवित्र कित्ते गईरे।

¹¹हरेक याजक खड़ा हुईने हर रोज अपणे धार्मिक कम्मां जो पूरा कराँ। सै बार-बार इक जेईयां बल़ियां चढ़ां सै जे पापां जो कदी दूर नीं करी सकदियां।

¹²पर मसीहे अप्पूँजो पापां रे खातर बलिदान्ना रे रुपा च इक्को इ बार हमेशा खातर चढ़ाया, कने परमेशरा रे सज्जे पासे आदरा रिया जगह जाई बैट्ठया।

¹³कने तिस इ बगता ते मसीह इन्तजार करया राँ भई परमेशर तिसरे दुश्मणां जो तिसरे बशा च करी दो।

¹⁴काँह्भई मसीहे अप्पूँजो इक बार बलिदान करने रे जरिये तिन्हां लोकां जो शुद्ध कित्तिरा, सै जे परमेशरा रे प्रति समर्पित ये।

¹⁵इसरे खातर पवित्र आत्मा बी अहांजो इस बारे च बोलां; पैहले सै बोलां,

¹⁶“प्रभु बोलां, मांह तिन्हांने औणे औल़े दिनां च सै वाचा जे बन्हणी सै येई भई, मांह अपणी व्यवस्था तिन्हांरे मना च पाणी, कने तिन्हां व्यवस्था अपणे दिलां च रखणी।”

¹⁷सै ये बी बोलां, “तिन्हांरे पापां कने तिन्हांरे अधर्मा रे कम्मां जो होर हुण मांह कदीं याद नीं रखणा।”

¹⁸कने फेरी ताहली जे पाप माफ करी दित्ते गये, तां पापां रे खातर किसी बल़िया री कोई जरूरत नीं हुन्दी।

¹⁹इस खातर हे मेरे साथी विश्वासियों, पूरे भरोसे ने अहें यीशुये रे लहूये रे जरिये स्वर्गा री परमपवित्र जगह च प्रवेश करी सक्कां ये।

²⁰काँह्भई यीशुये पड़दे चींये हुईने यनि अप्पूँजो बलिदान करने रे जरिये अहांरे खातर इक नया कने जिऊंदा रस्ता खोलीत्या।

²¹कने काँह्भई हुण अहांले इक येढ़ा महान याजक आ, सै जे स्वर्गा च परमेशरा रे घराने रा अधिकारी आ।

²²इस खातर औआ, अहें सच्चे दिला ने कने पूरे विश्वासा ने, अन्तरात्मा रे दोषा जो दूर करदे हुये, शुद्ध दिला ने कने अपणे शरीरा जो शुद्ध पाणिये ने धोकर परमेशरा रे सामणे जाईये।

²³औआ, अहें लगातार अपणिया आशा जो मजबूतिया ने थम्मी रखिये सै जे अहें अंगीकार कित्तिरा, काँह्भई अहें जाणाँ ये भई सै काम्म जे परमेशरे करने रे खातर वायदा कित्तिरा तिस्सो सै करगा।

²⁴औआ अहें इस बारे च सोचिये भई कियां इक्की दूये जो, इक्की दूये रे प्रति प्यार जताणे कने मदद करने जो हिम्मत देईये,

²⁵कने इक्की दूये सौगी कट्ठा हूणा नीं छड्डा, तियां जे किछ लोक कट्ठे नीं हुन्दे। पर इक्की दूये जो जादा ते जादा हिम्मत देन्दे रौआ; काँह्भई तुहें जाणाँ ये भई प्रभुये रे न्याय रा दिन जल़द औणे औल़ा।

²⁶काँह्भई सच्चाईया रा ज्ञान पाणे ते बाद बी जे अहें जाणी बुझीने पाप करदे रैं, तां फेरी पापां रे खातर कोई बलिदान बाकी निआं।

²⁷पर इक इ गल्ल अहें करी सक्कां ये भई अहें परमेशरा रे न्याय रे दिना रा डरा ने इन्तजार करिये, जिस दिन परमेशरा अपणे दुश्मणां जो भड़कदिया अग्गी च भस्म करी देणा।

²⁸ताहली जे मूसा री व्यवस्था जो नीं मनणे औल़ा, दुईं या तिन्नां माहणुआं रिया गवाहिया पर, बिणा दया कित्ते मारी दित्या जां,

²⁹तां सोच्चा भई इक्की माहणुये जो कितणी भयानक सजा मिलणी, सै जे परमेशरा रे पुत्रा ने नफरत कराँ, कने परमेशरा रिया वाचा रा लहू तिसरे जरिये जे सै पवित्र बणाया गया तिस्सो अपवित्र मन्नां, कने सै तिस आत्मा री बेज्जति कराँ तिसते जे तिने अनुग्रह पाईरा।

³⁰काँह्भई अहें जाणाँ ये भई ये परमेशरे बोल्या था, “पलटा लेणा मेरा काम्म आ, माह इ बदला लेणा।” कने फेरी ये भई “मांह इ अपणयां लोकां रा न्याय करना।”

³¹किसी रा जिऊंदे परमेशरा रिया सामर्था रे अधीन हूणा इक खतरनाक गल्ल इ।

³²पर तिन्हां शुरु रे दिनां जो याद करा ताहली जे खुशखबरिया पर विश्वास करने ते बाद तुहें बौहत दुख सैया, पर विश्वासा च मजबूत रै।

³³कोई वगत था ताहली जे लोक, लोकां रे सामणे तुहांरा अपमान कराँ थे कने दुख देआं थे। कने कदीं तिन्हां सौगी जे येढ़ा बर्ताव कित्या जाया राँ था, तुहें तिन्हांरी मदद कित्ती।

³⁴काँह्भई तुहें कैदियां सौगी दुख सैया, कने ताहली जे अधिकारियें तुहांरी सम्पत्ति जफ्त कित्ती थी तिस्सो बी तुहें खुशिया ने सैईल्या। काँह्भई तुहें जाणाँ थे भई तुहें सै सम्पत्ति पाईरी तिस राजे परमेशरे वायदा कित्तिरा, सै जे उत्तम इ कने हमेशा रे खातर इ।

³⁵इस खातर अपणी हिम्मत नीं छड्डा, काँह्भई जे तुहें लगातार हिम्मत रखगे तां तुहां बड्डा ईनाम पाणा।

³⁶काँह्भई तुहांजो धैर्य रखणा जरूरी आ, ताकि परमेशरा री इच्छा जो पूरी करी सक्को कने वायदे रा ईनाम पाई सक्को।

³⁷“काँह्भई तियां जे पवित्रशास्त्र बोलां, बौहत इ थोड़े वगता च, सै जे आया रां तिस औणा कने देर नीं करनी।

³⁸पर मेरे धर्मी लोकां विश्वासा ते जिऊंदा रैहणां। कने जे कोई पिच्छे हटि जाओ तां मांह तिन्हांते खुश नीं हूणा।”

³⁹पर अहें हटणे औल़यां चते नींये सै जे नाश हुई चुक्कीरे। पर अहें तिन्हां चते सै जे परमेशरा पर विश्वास कराँ ये कने छुटकारा पाई चुक्कीरे।