Read Bilaspuri इब्रानियों 13 Bible Online

इब्रानियों 13 - Bilaspuri bible

इब्रानियों 13

¹इक दूये जो भाई-भैणा साई प्यार करदे रौआ।

²अंजाण लोकां रा आदर करना नीं भूल्ला, काँह्भई येढ़ा करने रे जरिये किछ लोकें अनजाणे च स्वर्गदूतां रा आदर कित्तिरा।

³कैदियां रे प्रति तुहांरा व्यवहार येढ़ा ओ भई मन्नो तुहें खुद तिन्हां साई जेल्ला च ओ, कने तिन्हांने जे बुरा बर्ताव हुया राँ तिन्हांजो ये मन्नीने याद करा भई तुहां सौगी ये बुरा बर्ताव हुया राँ।

⁴ब्याह रा सब्बीं रे जरिये आदर हूणा चाहिन्दा, कने इक पति-पत्निया जो इक्की दूये रे इलावा किसी दुज्जे ने सम्बन्ध रखणा ठीक नींआ, काँह्भई परमेशर व्यभिचारियां, कने परस्त्रीगामियां रा न्याय करगा।

⁵अपणे जीवना जो धन-दौलता रे लालचा ते दूर रखा, कने जो किछ तुहांले आ तिस पर सन्तुष्ट रौ; काँह्भई परमेशरे खुद बोलीरा, “मांह तिज्जो कदीं मनीं छडणा, नां कदीं तिज्जो त्यागणा।”

⁶इस खातर अहें निडर हुईने बोलां ये, “प्रभु मेरा मदद करने औल़ा, मांह नीं डरना; माहणु मेरा क्या करी सक्कां?”

⁷सै जे तुहांरे अगुवे, कने तिन्हे जे तुहांजो परमेशरा रा वचन सुणाई रा, तिन्हांजो याद रखा; कने ध्याना ने सोच्चा भई सै किस तरिके रा जीवन जीये कने मरे कने तियां जे तिन्हे विश्वासा कित्या था तिस इ तरिके रा विश्वास तुहें बी दस्सा।

⁸यीशु मसीह कल कने आज्ज कने युगां-युगां तकौ इक्को जेआ इ हाया यनि सै कदीं नीं बदलदा।

⁹लग-लग किस्मा रे विचित्र उपदेशां ते नीं भरमाये जाओ, काँह्भई तुहांरे मना रे खातर ये बधिया भई सै परमेशरा रे अनुग्रह रे जरिये मजबूत बणे, नां की खाणे रे बारे च नियमां रा पालन करने रे जरिये। काँह्भई जितने लोक इस नियमा रा पालन कराँ ये सै अपणे खातर किछ बधिया नीं करदे।

¹⁰याजको सै जे यहूदियां री अराधना रियां जगह च सेवा कराँ ये तिन्हांजो प्रशंसा रे किसी बी बलिदान्ना च हिस्सेदार हुणे रा कोई अधिकार नींआ, तिस्सो जे अहें अपणिया बेदिया पर देआंये।

¹¹काँह्भई तिन्हां पशुआं रा लहू जे महायाजक पाप बल़िया खातर परमपवित्र जगह च लेई जां, तिन्हां पशुआं रा शरीर डेरे ते बाहर जल़ाया जां।

¹²इसा वजह ते, यीशुये बी लोकां जो अपणे इ लहूये रे जरिये पवित्र करने खातर यरूशलेम नगरा ते बाहर दुख सैया कने मरया।

¹³इस खातर औआ, यहूदी रीति-रिवाजां जो छड्डिने यीशुये पर विश्वास करिये कने तिस साई दुख कने निंध्या सैईये।

¹⁴काँह्भई ये संसार अहांरा पक्का घर नींआ, पर अहें येढ़े घरा जो पाणे री उम्मीद कराँ ये सै जे भविष्य च अहांरा हूणा।

¹⁵इस खातर अहें यीशुये रे जरिये लगातार स्तुति रुपी बलिदान परमेशरा जो भेन्ट करिये, यनि ताहली जे अहें अपणे शब्दां रे जरिये अंगीकार कराँ ये भई यीशु अहांरा प्रभु आ।

¹⁶भलाई करना कने इक्की दूये री मदद करना नीं भूल्लो, काँह्भई परमेशर येढ़े बलिदान्नां ते खुश हुआं।

¹⁷अपणे अगुवेयां रा हुक्म मन्नो कने तिन्हांरे अधीन रौ, काँह्भई ये तिन्हांरा फर्ज आ भई सै तुहांरे प्राणां री पहरेदारी करो, काँह्भई तिन्हांजो तुहांरे बारे च परमेशरा जो हिसाब देणे पौणा। जे तुहें तिन्हांरा हुक्म मनगे तां तिन्हां अपणा काम्म खुशिया ने करना, जे तुहें नीं मनगे तां तिन्हां दुखा ने करना, तां तुहांजो कोई फायदा नीं हूणा।

¹⁸अहांरे खातर प्राथना करदे रौआ, काँह्भई अहांजो भरोसा भई अहांरी अन्तरात्मा शुद्ध इ, कने अहें अपणिया जिन्दगिया री हरेक गल्लां च परमेशरा जो आदर देणा चाँये।

¹⁹प्राथना करने खातर हऊँ तुहांजो होर बी विनती कराँ भई हऊँ जल़द तुहांले फेरी आई सक्कूँ।

²⁰कने शान्ति देणे औल़ा परमेशर सै जे भेड्डां रा महान रखवाला यनि मसीह यीशु, अहांरे प्रभुये जो अनन्त वाचा रे लहूये रे जरिये मूईरयां चते जिऊंदा कित्या,

²¹तुहांजो हरेक भले कम्मां च सिद्ध करो, तिसते जे तुहें परमेशरा री इच्छा जो पूरा करी सक्को, सै जे किछ परमेशरा जो खुश कराँ तिस्सो यीशु मसीह रे जरिये अहां च करो। कने मसीह री महिमा युगां-युगां तकौ हुन्दी रौ। आमीन।

²²मेरे साथी विश्वासियो, हऊँ तुहांजो विनती कराँ भई इस उपदेशा रियां गल्लां जो मैं तुहांजो हौंसला देणे रे खातर लिखिरा धैर्य ने सुणी लौआ, काँह्भई ये चिट्ठी सै जे मैं लिखिरी ये बौहत लम्बी नीं।

²³तुहें ये जाणा भई तिमुथियुस अहांरा साथी विश्वासी जेल्ला ते छुट्टी गरा कने जे सै येत्थी छोड़े आओ, तां मांह तिसने सौगी आईने तुहांजो मिलणा।

²⁴अपणे सब अगुवेयां जो कने सब पवित्र लोकां जो अहांरा नमस्कार बोल्यों। इटली देशा रे विश्वासी तुहांजो नमस्कार बोलां ये।

²⁵तुहां सब्बीं पर परमेशरा रा अनुग्रह हुन्दा रौ। आमीन।