Read Bilaspuri इब्रानियों 3 Bible Online

इब्रानियों 3 - Bilaspuri bible

इब्रानियों 3

¹मेरे पवित्र साथी विश्वासियो, तुहें सै जे परमेशरा रे जरिये सद्दे गईरे, इस खातर मसीह यीशुये रे बारे च सोच्चा सै जे अहांरे खातर परमेशरा रा सनेहा ल्यौणे औल़ा कने महायाजक बी आ, तिस राजे अहें अंगीकार कराँ ये कने विश्वास बी कराँ ये।

²यीशु परमेशरा रे प्रति बफादार था, तिस्सो जे ये काम्म करने खातर तिने चुणीरा था, तियां जे मूसा बी परमेशरा रे सारे लोकां री सेवा करने च बफादार था।

³पर यीशु मसीह मूसा ते बधीने महिमा रे लायक आ, तियां जे घर बनाणे औल़े घरा ते बधीने आदरा रे लायक हुआं ये।

⁴काँह्भई हर इक घरा रा कोई न कोई बनाणे औल़ा हुआं, पर तिने जे सब किछ बणाया सै परमेशर आ।

⁵मूसा त परमेशरा रे लोकां रे खातर सेवका साई बफादार था कने तिने तिसा गल्ला रा वर्णन कित्या सै जे परमेशर भविष्य च बोलणे औल़ा था।

⁶पर मसीह पुत्रा साई परमेशरा रे लोकां खातर बफादार आ; कने सै अहें लोक ये। जे अहें लगातार हिम्मत रखिये कने आशा रे बारे च घमण्ड करो।

⁷इस खातर तेढ़ा जे पवित्र आत्मा बोलां, “जे तुहें आज्ज परमेशरा री अवाज़ सुणो,

⁸तां अपणे पूर्वजां साई तिसरा पालन करने ते इन्कार नीं करयां, ताहली जे तिन्हें परमेशरा रे बिरुद्ध बिद्रोह कित्या, कने तियां जे तिस दिन तुहांरे पूर्वज सुनसान जगह च थे ताहली जे तिन्हें परमेशरा जो परीक्षा च पाया था।

⁹तित्थी तुहांरे पूर्वजें मेरे धैर्य जो परखया, हलाँकि तिन्हें मेरे अदभुत कम्मां जो चाल़ियां साल्लां तकौ देख्या।

¹⁰इस वजह ते हऊँ तिन्हां लोकां ते गुस्से था, कने गलाया, इन्हांरे मन सदा भटकदे रैं, कने इन्हें मेरे हुक्मा रा पालन करने ते इन्कार कित्या।

¹¹तां मैं गुस्सा हुईने ये कस्म खाद्दि, भई सै तिसा जगह च कदीं प्रवेश नीं करगे तित्थी जे हऊँ तिन्हांजो आराम देआं।”

¹²साथी विश्वासियो, चौकन्ने रौआ भई तुहां च येढ़ा बुरा कने अविश्वासी मन नीं हो, सै जे तुहांजो जिऊंदा परमेशरा ते दूर करी दो।

¹³पर तदुआं तक जे सै दिन तिसजो जे आज्ज बोल्या जां, हर रोज इक्की दुज्जे जो हौंसला देन्दे रौआ, येढ़ा नीं हो भई तुहां चते कोई माहणु पापां रे धोखे च आईने परमेशरा रे हुक्मां जो मनणे ते इन्कार नीं करी दो।

¹⁴काँह्भई जे अहें अपणे पैहले विश्वासा पर अपणिया मौती तक लगातार मजबूत रै, तां अहें इकट्ठा काम्म करने च मसीह ने सौगी जुड़ी जायें।

¹⁵तियां जे पवित्रशास्त्रा च ये लिखिरा, “जे तुहें आज्ज परमेशरा री अवाज़ सुणो, तां अपणे पूर्वजां साई तिसरा पालन करने ते इन्कार नीं करयां, ताहली जे तिन्हें परमेशरा रे बिरुद्ध बिद्रोह कित्या।”

¹⁶सै लोक कुण थे तिन्हेंजे परमेशरा री अवाज़ सुणीने बी तिसरे खिलाफ बिद्रोह कित्या? ये सारे मूसा रे जरिये मिस्र देशा ते निकल़ीरे लोक थे।

¹⁷कने परमेशर चाल़ियां साल्लां तकौ किन्हां लोकां ने गुस्से रैया? तिन्हां लोकां ने तिन्हें जे पाप कित्या, कने सै जे सुनसान जगह च मरीगे।

¹⁸ताहली जे परमेशरे गुस्सा हुईने ये कस्म खाद्दि, भई सै तिसा जगह च कदीं प्रवेश नीं करगे तित्थी जे हऊँ तिन्हांजो आराम देआं, हकीकत च सै तिन्हांरे बारे च बोल्या राँ था तिन्हें जे हुक्म नीं मन्नया।

¹⁹इस खातर अहें समझीगे भई सै अविश्वावासा रिया वजह ते नीं प्रवेश करी सक्के।