Read Bilaspuri इब्रानियों 8 Bible Online

इब्रानियों 8 - Bilaspuri bible

इब्रानियों 8

¹हुण सै जे गल्लां अहें गलाया रायें तिन्हां चते सब्बीं ते बड्डी गल्ल येई, भई अहांले येढ़ा महायाजक आ, सै जे स्वर्गा च परमेशरा रे महामहिमन संघासणा रे सज्जे पासे बैठिरा,

²कने सै जे महां पवित्र जगह कने स्वर्गा रे तिस सच्चे तम्बुये च सेवा कराँ तिस्सो जे किसी माहणुये नीं पर प्रभुये खड़ा कित्तिरा।

³काँह्भई हरेक महायाजक पापां रिया माफिया खातर भेंट कने बलिदान चढ़ाणे जो नियुक्त कित्या जां, इस वजह ते जरूरी आ, भई अहांरे महांयाजक (यीशुये) ले बी चढ़ाणे रे खातर किछ हो।

⁴कने जे मसीह धरतिया पर हुन्दा तां कदीं बी याजक नीं हुन्दा, काँह्भई मूसा रिया व्यवस्था रे मुतावक धरतिया पर भेंट चढ़ाणे औल़े याजक हाये।

⁵ये याजक सै जे काम्म कराँ ये सै सिर्फ स्वर्गा रिया चिज़ां री नकल कने परछाई ये। इस खातर ताहली जे मूसा तम्बू बनाणे जो त्यार था, तां परमेशरे तिस्सो ये चेतावनी दित्ति, “देख, सै जे नमुना तिज्जो पहाड़ा पर दस्या गईरा था, तिसरे मुतावक सब किछ बनाणा।”

⁶पर हुण जो याजकां री सेवा यीशुये जो दित्ति गईरी सै पुराणे याजकां रिया सेवा ते बी बधीने इ, काँह्भई सै तिसा वाचा रा जे बिचौल़िया सै पुराणिया वाचा ते उत्तम आ कने उत्तम वायदयां पर अधारित आ।

⁷काँह्भई जे, सै पैहली वाचा निर्दोष हुन्दी, तां दुज्जिया वाचा री जरूरत नीं हुन्दी।

⁸पर परमेशर लोकां पर दोष लाईने बोलां, “प्रभु बोलां, देक्खा, सै दिन आया रां, भई मांह इस्राएली लोकां ने कने यहूदा रे लोकां ने नई वाचा बन्हणी।

⁹ये वाचा तेढ़ी नीं हूणी, तेढ़ी जे मैं तिन्हांरे पूर्वजां सौगी तिस वगत बन्ही थी, ताहली जे मैं तिन्हांरा हात्थ पकड़ीने तिन्हांजो मिस्र देशा ते निकाल़या था; काँह्भई प्रभु बोलां, भई सै मेरिया वाचा रे प्रति विश्वास लायक नीं रै, इस खातर मैं तिन्हांरी तरफ कोई ध्यान नीं दित्या।

¹⁰फेरी प्रभु बोलां, भई ये वाचा मांह औणे औल़े दिनां च इस्राएली लोकां ने बन्हणी, भई मांह अपणी व्यवस्था तिन्हांरे मना च पाणी, कने तिन्हां व्यवस्था अपणे दिलां च रखणी, कने मांह तिन्हांरा परमेशर हूणा कने सै मेरे लोक हुणे।

¹¹कने हरेक अपणे पड़ोसिये जो कने अपणे रिश्तेदारा जो ये शिक्षा नीं देंगा, भई तू प्रभुये जो जाण, काँह्भई छोट्टे ते बड्डे तकौ सब्बीं मिन्जो जाणी लेणा।

¹²काँह्भई मांह तिन्हांरे अपराध माफ करने, कने तिन्हांरे पाप कदीं याद नीं करगा।”

¹³काँह्भई परमेशरे इसाजो नई वाचा बोल्या इस खातर तिने पैहली वाचा जो पुराणा बणाया; कने सै जे चीज़ पुराणी कने कमजोर हुई जाईं सै जल्दी खत्म हुई जाणी।