Read Bilaspuri इब्रानियों 9 Bible Online

इब्रानियों 9 - Bilaspuri bible

इब्रानियों 9

¹हुण पैहलिया वाचा जो बणाये रखणे रे खातर लोकां जो किछ नियमा रे मुतावक परमेशरा री अराधना करनी थी, कने अराधना करने रे खातर धरतिया पर इक तम्बू बणाया गया था।

²तिस तम्बुये रे दो हिस्से थे पैहले हिस्से च दीपदान कने मेज था, कने भेंटा रियां रोटियां थिआं; तिस्सो पवित्रस्थान बोलां थे।

³दुज्जा हिस्सा परदे रे पिच्छे था, तिस्सो जे परम पवित्रस्थान बोलां ये।

⁴तिसच खुशबुदार सामग्रिया जो जल़ाणे रे खातर सोने री बेदी, कने सोने ने मढ़ीरा वाचा रा सन्दूक था। इस सन्दूका च मन्ने ने भरीरा सोने रा बर्तण था, कने हारून रा सै सोठू था तिस पर जे पत्ते निकल़ीरे थे कने दो पत्थरा रियां पट्टियां थिआं तिन्हां पर जे परमेशरा रे हुक्म लिखिरे थे।

⁵सन्दूका रे ऊपर करुब[4] बणीरे थे सै जे परमेशरा रिया मौजूदगिया जो दस्सां थे। सै अपणे फंगा ने तिसा जगह पर छाया करी रां थे तित्थी जे पाप माफ कित्ते गये थे। पर हुण इन्हां गल्लां री चर्चा अहें बिस्तारा ने नीं करी सकदे।

⁶सब्बीं किजि रे इस तरिके ने त्यार हुणे ते बाद याजक तम्बुये रे पैहले हिस्से च हर रोज जाईने अपणिया सेवा रा काम्म कराँ थे,

⁷पर परमपवित्र स्थाना च सिर्फ महायाजक साल्ला च सिर्फ इक बार जां था। सै बिणा तिस खून्ना ते कदीं अन्दर नीं जान्दा था तिस्सो जे सै खुद अपणे जरिये कने लोकां रे जरिये अनजाणे च कित्‍तीरे पापां खातर परमेशरा जो भेन्ट चढ़ां था।

⁸इस नियमा रे जरिये पवित्र आत्मा ये दस्सां भई तदुआं तकौ जे हल्तियें पैहला तम्बू खढ़िरा, तदुआं तक परमपवित्र जगह रा रस्ता दिखाई नीं देन्दा।

⁹ये सब अहांजो आज्ज के वगता रे बारे च किछ दस्सां ये; इस सारे रा मतलब येआ भई भेन्टां कने बलिदान तिन्हौं जे याजकें परमेशरा जो चढ़ाया, अराधना करने औल़े रिया अन्तरात्मा जो शुद्ध नीं करी सकदे।

¹⁰परमेशरा जो चढ़ाये जाणे औल़ियां चीजां त सिर्फ खाणे-पीणे कने कई तरह रियां शुद्धीकरण रियां विधियां नेई मतलब रखां। ये सिर्फ शारीरिक नियम ये, ये तदुआं तक लागू हुआं ये तदुआं तक जे परमेशर नया नियम नीं बणाई देन्दा।

¹¹पर ताहली जे मसीह अहांरा महायाजका बणीने आया, तां सै खरियां चीजां जो लेईने आया सै जे हुण मौजूद ईं। कने मसीह स्वर्गा च परमेशरा रिया हजूरिया च गया कने सै जगह इक बड़े कने सिद्ध तम्बुये साई सै जे माहणुआं रे हत्थां रा बणाईरा नींआ यनि सृष्टिया रा नींआ।

¹²बकरयां कने बछड़यां रे खून्ना जो लेईने मसीहे प्रवेश नीं कित्या था वल्कि हमेशा-हमेशा रे खातर भेन्टा रे रुपा च अपणे इ लहूये जो लेईने परमपवित्र स्थाना च प्रवेश हुया था। ये करने रे जरिये तिने अहांजो अहांरे पापां ते सदा खातर छडवाया।

¹³काँह्भई ताहली जे बकरयां कने बछड़यां रा खून कने बच्छुये री स्वाह रा अपवित्र लोकां पर छिड़कया जाणा शरीरा री शुद्धता खातर तिन्हांजो शुद्ध कराँ,

¹⁴तां मसीह रा खून तिने जे अप्पूँजो अनन्त आत्मा रे जरिये परमेशरा रे सामणे निर्दोष बल़िया रे रुपा च चढ़ाया, तां अहां रिया अन्तरात्मा जो पापी कम्मां ते काँह नीं शुद्ध करगा? ताकि अहें जिऊंदा परमेशरा री सेवा करी सक्को।

¹⁵इस वजह ते मसीह नई वाचा रा बिचौल़िया, ताकि तिन्हांजो जे परमेशरा रे जरिये सद्दया गईरे, सै अनन्त आशीष पाई सक्को तिस राजे परमेशरे वायदा कित्तिरा था। काँह्भई पैहले वाचा रे अधीन कित्ते गईरे पापां ते तिन्हांजो अजाद कराणे रे खातर मसीह फिरौतिया रे रुपा च सै अपणे प्राण देई चुक्कीरा।

¹⁶तित्थी तक जे बसीयता रा स्वाल आ, तां तिसरे खातर तिने जे तिस्सो लिखिरा, तिसरिया मौती जो साबित कित्या जाणा जरूरी आ,

¹⁷काँह्भई कोई बसीयत सिर्फ तांई काम्म कराँ इ ताहली जे तिसजो लिखणे औल़े री मौत हुई जांई। तदुआं तकौ जे बसीयत लिखणे औल़ा जिऊंदा रैयां, तदुआं तकौ बसीयत कम्मां री नीं हुन्दी।

¹⁸इस इ खातर पैहली वाचा बी खून्ना रे जरिये इ बन्ही गई।

¹⁹काँह्भई ताहली जे मूसे इस्राएली लोकां जो व्यवस्था रा हर इक हुक्म सुणाया था, तां तिने बकरयां कने बछड़यां रे खून्ना जो पाणिये च मिलाया कने जूफा[5] रियां डाल़ियां तिस पर जे लाल ऊन बन्हीरी थी तिस्सो इस्तेमाल करीने व्यवस्था रिया कताबा पर कने सारयां लोकां पर छिड़की दित्या था।

²⁰कने तिने बोल्या था, “ये तिसा वाचा रा लहू आ, तिसरा पालन करने रा हुक्म जे परमेशरे तुहांजो दित्तिरा।”

²¹मूसे तिस इ तरिके ने तम्बू कने अराधना च काम्म औणे औल़ी हर चीज़ा पर लहू छिड़कया था।

²²हकीकत च व्यवस्था रे मुतावक हरेक चीज़ा जो लहूये ने शुद्ध करना जरूरी आ। कने बगैर लहू बहाये किसी बी पापा री माफी नीं।

²³सै चीजां जे सिर्फ स्वर्गा रियां चीजां री नकल थिआं, जे तिन्हारा शुद्धीकरण इस तरिके रियां विधियां ने हुणे री जरूरत थी, तां खुद स्वर्गा रियां चिज़ां रे खातर इक उत्तम बलिदान्ना री जरूरत इ।

²⁴मसीहे माहणुआं रे बणाईरे तिस परमपवित्र स्थाना च प्रवेश नीं कित्या, सै जे सच्चे परमपवित्र स्थाना री सिर्फ इक नकल थी। पर तिने त खुद स्वर्गा ची प्रवेश कित्तिरा ताकि हुण सै अहांरे खातर अप्पूँजो परमेशरा रे सामणे मौजूद करो।

²⁵यहूदी महायाजक हर साल जानबराँ रा लहू लेईने परमपवित्र स्थाना च प्रवेश कराँ, पर मसीहे अप्पूँजो बार-बार बलिदान चढ़ाणे खातर स्वर्गा च प्रवेश नीं कित्या,

²⁶नैत फेरी मसीह जो संसारा रिया सृष्टिया तेई कई बार दुख सैहणे पौन्दे। पर हुण आखिरी वगता पर अपणे बलिदान्ना रे जरिये पापां रा अन्त करने रे खातर मसीह हमेशा-हमेशा जो इक इ बार प्रगट हुईगरा।

²⁷तियां जे माहणुये रे खातर इक बार मरना कने तिसते बाद न्याय रा सामना करना तैह आ,

²⁸इस खातर तियां इ मसीह इक इ बार कई माहणुआं रे पापां जो दूर करने खातर बलिदान हुया था। कने सै पापां जो दूर करने रे खातर नीं, पर तिन्हां लोकां रा छुटकारा करने रे खातर मसीहे दोवारा औणा, सै जे तिसरा बेसब्रिया ने इन्तजार करया राँये।