Read Bilaspuri 1 पतरस 5 Bible Online

1 पतरस 5 - Bilaspuri bible

1 पतरस 5

¹हऊँ खुद सै जे इक प्राचीन आ, कलीसिया रे तिन्हां प्राचीनां ने विनती कराँ सै जे तुहांरे बिच ये। हऊँ मसीह रे दुखां रा इक गवाह कने प्रगट हुणे औल़ी महिमा च शामिल हूणा। हऊँ तुहांजो विनती कराँ,

²भई परमेशरा रे तिस झुण्डा री रखवाल़ी करा सै जे तुहांरे बिच आ; ये दबावा ने नीं पर परमेशरा रिया इच्छा रे मुतावक मौज्जा ने कने नीच कमाईया रे खातर नीं, पर मन लाईने करा।

³देख-रेख करने रे खातर सै लोक जे तुहांजो सौंपे गईरे, तिन्हां पर अधिकार नीं जतावा, बल्कि समूहा रे खातर इक आदर्श बणा।

⁴ताकि ताहली जे यीशु मसीह औणा सै जे अहांरे प्रधान रखवाल़े साई आ, तां तुहांजो महिमा रा मुकुट मिलणा, सै जे कदीं मुरझान्दा निआं।

⁵इस तरिके ने नौजबानो, तुहें बी अपणे बजुर्गां रे अधीन रौआ कने तुहें सारे नम्रता ने इक्की दुज्जे रिया सेवा खातर कमर बन्हीने रा त्यार रौआ, काँह्भई, “परमेशर घमण्डियां रा बरोध कराँ, पर नम्र लोकां पर अनुग्रह कराँ।”

⁶इस खातर अप्पूँजो परमेशरा रे सामणे नम्र करा सै जे सामर्थी आ, ताकि सै तुहांजो सही वगता पर आदर देओ।

⁷अपणी सारियां चिन्तां जो तिस पर छड्डा, काँह्भई तुहांरी देखभाल सैई कराँ।

⁸खुद अप्पूँजो काबुये च रखा कने सावधान रौआ, काँह्भई तुहांरा दुश्मण शैतान हुरन्गदे हुये शेरा साई इसा तलाशा च रैयां, भई किस जो अपणा शिकार बणाये।

⁹अपणे विश्वासा पर मजबूत रैईने तिसरा मुकाबला करा कने ये जाणी लो भई तुहांरे साथी विश्वासी सै जे इस संसारा चे, इस इ तरिके री पीड़ा सैई रायें।

¹⁰तुहांजो थोड़िया देरा रे कष्ट सैहणे ते बाद सारे अनुग्रह देणे औल़ा परमेशर तिने जे तुहांजो मसीह च अपणी युगानुयुगा री महिमा रे खातर सद्दीरा, खुद इ तुहांजो सिद्ध, मजबूत, बलवन्त कने स्थिर करी देंगा।

¹¹तिसरा राज युगां-युगां तक रौ। आमीन।

¹²मैं तुहांजो ये छोट्टी जेई चिट्ठी सिलवानुस रिया मददा ने लिखिरा, तिस्सो जे हऊँ बफादार विश्वासी समझां। हऊँ तुहांजो हौंसला देणा चांह कने विश्वास दिलां भई परमेशरा रा सच्चा अनुग्रह येई हाया। इस अनुग्रह च बणीरे रौआ।

¹³बेबीलोन नगरा री कलीसिया सै जे तुहां साई परमेशरा रे जरिये चुणीरी, तुहांजो नमस्कार बोलां ये। मरकुस बी तुहांजो नमस्कार बोलां सै जे मेरे खातर इक पुत्रा साई आ।

¹⁴तुहें लोक गल़े लगीने इक्की दूये जो नमस्कार करा। तुहां सब्बीं जो सै जे मसीह चे शान्ति मिलो।