Read Bilaspuri 2 पतरस 1 Bible Online

2 पतरस 1 - Bilaspuri bible

2 पतरस 1

¹हऊँ शमौन पतरस, यीशु मसीह रा सेबक कने प्रेरित आ। हऊँ ये चिट्ठी तुहां सब्बीं जो लिखया राँ तिन्हें जे अहांरे परमेशर कने छुटकारा करने औल़े यीशु मसीह रिया धार्मिकता रे जरिये अहां साई बौहत कीमती विश्वास पाईरा।

²हऊँ प्राथना कराँ भई परमेशर तुहांजो जादा ते जादा अनुग्रह कने शान्ति देओ, तियां जे तुहें परमेशर कने अहांरे प्रभु यीशु रे ज्ञाना च बधदे जाँएं।

³परमेशरा री अलौकिक सामर्थे अहांजो सब किछ दित्या, धार्मिक जीवन जीणे री तिसरी जे अहांजो जरूरत इ। ये हुई सक्कां, काँह्भई अहें परमेशरा जो जाणाँ ये, सैई हाया तिने जे अहांजो अपणी महिमा कने अच्छे गुणां च शामिल हुणे खातर सद्दीरा।

⁴इन्हां सब्बीं रे जरिये परमेशरे अहांजो बौहत महान कने बौहत कीमती बरदान दित्ते, तिन्हांजो देणे रा जे तिने वायदा कित्या था, ताकि इन्हां बरदान्नां रे जरिये तुहें संसारा रियां बुरियां इच्छां ते बची सक्को सै जे लोकां जो नाश कराँ इयां कने तुहें परमेशरा रे अपणे स्वभावा च शामिल हुणे खातर आई सक्को।

⁵इस खातर सिर्फ तुहांजो मसीह पर इ विश्वास नीं करना चाहिन्दा, बल्कि हमेशा सै जे खरा, तुहांजो सैई करने खातर बी कड़ी मेहणत करनी चाहिन्दी, नांई तुहांजो सै जे सही आ सैई करना चाहिन्दा, बल्कि तुहांजो येढ़े लोक बी बणना चाहिन्दे तिस्सो पता हो भई बुद्धिया ने कियां बर्ताव करना चाहिन्दा।

⁶तुहांजो सिर्फ बुद्धिमानिया ने बर्ताव करने रे बारे ची पता नीं हूणा चाहिन्दा, बल्कि तुहांजो अप्पूँजो बी काबुये च करना चाहिन्दा, तुहांजो नां सिर्फ अप्पूँजो काबुये च करना चाहिन्दा बल्कि तुहांजो परेशानिया च बी धीरज रखणा चाहिन्दा, नांई तुहांजो धीरज रखणा चाहिन्दा, बल्कि इस तरिके ने जीणा चाहिन्दा सै जे परमेशरा जो खुश कराँ।

⁷नांई तुहांजो इस तरिके ने जीणा चाहिन्दा सै जे परमेशरा जो खुश कराँ, बल्कि अपणे परिवारा रे सदस्या साई बी साथी विश्वासियां ने प्रेम करना चाहिन्दा, नांई तुहांजो अपणे परिवारा रे सदस्या साई इक्की दूये जो प्रेम करना चाहिन्दा, बल्कि तुहांजो सारयां लोकां जो प्रेम करना चाहिन्दा।

⁸जे तुहें इस तरिके ने जादा ते जादा जींगे, तां तुहें अहांरे प्रभु यीशु मसीह जो इस तरिके ने जाणगे सै जे तुहांजो उपयोगी कने फल़ देणे लायक बणां।

⁹पर तिस माहणुये च जे ये गुण नींये, सै माहणु धुँधला देखणे औल़ा कने अन्हे साई आ; कने सै ये बी भुल्ली चुक्कीरा भई परमेशर तिसरे पुराणे पाप माफ करी चुक्कीरे।

¹⁰इस खातर मेरे साथी विश्वासियो, परमेशरे तुहांजो चुणीरा कने तुहांजो सद्दीरा इसजो दसणे री होर बी जादा कोशिश करा, काँह्भई जे तुहें ये गल्लां कराँ ये, तां तुहां कदीं अपणा विश्वास नीं छडणा।

¹¹कने परमेशरा तुहांजो दिला ते राज्जा च स्वागत करना, तित्थी जे यीशु मसीह सै जे अहांरा प्रभु कने अहांरा छुटकारा देणे औल़े सदा खातर राज्ज करना।

¹²हलाँकि तुहें लोक पैहले तेई ये गल्लां जाणाँ ये कने सखाई री सही शिक्षां च मजबूतिया ने टिक्कीरे, फेरी बी हऊँ लगातार इन्हांरे बारे च याद कराँगा।

¹³हऊँ ये सोच्चां भई ये ठीक बी आ भई तदुआं तक जे हऊँ जीवित आ, तदुआं तक तुहौं लगातार इन्हा गल्लां री याद दिलान्दे रैहणा तिसते जे तुहें तिन्हांजो भुलगे नीं।

¹⁴काँह्भई हऊँ ये जाणाँ भई इसा दुनिया ते मेरे जाणे रा वगत नजदीक आईग्या, तियां जे अहांरे प्रभु यीशु मसीहे मिन्जो साफ तौर पर बोलीरा।

¹⁵इस खातर हऊँ ये सब दसणे खातर बौहत कोशिश करया राँ, ताकि मेरे मरने ते बाद बी तुहें इन्हां गल्लां जो हमेशा याद रक्खी सक्को।

¹⁶ताहली जे अहें तुहांजो अहांरे प्रभु यीशु मसीह री सामर्थ कने तिसरे दोवारा औणे रे बारे च दस्या था, तां अहें तुहांजो चलाकिया ने बणाईरी किछ कहाणियां नीं दस्यारां थे, पर अहें त तिसरिया महिमा रे चश्मदीद गवाह थे।

¹⁷ताहली जे यीशु मसीहे परमेशर पिता ते आदर कने महिमा पाई, तां अहें पवित्र पहाड़ा पर तिस सौगी थे। तिस वगत परमेशरा ते सै जे सब्बीं ते महान आ ये अवाज़ आई, “ये मेरा प्यारा पुत्र आ, तिसते जे हऊँ खुश आ।” अहें खुद इसा अवाज़ा जो स्वर्गा ते औन्दे हुये सुणया।

¹⁹इस खातर भविष्यवक्तयां रे वचन होर जादा भरोसे लायक हुईगरे। ये वचन अँधेरे च जल़दे हुये दिऊए साई ये, सै जो सबेरे तक चमकां ये कने मसीह री ज्योति तुहांरे दिला च चमकां इ, तियां जे सबेरे रा तारा संसारा रे खातर उजियाले जो ल्यौआं। जे तुहें इस वचना री तरफ ध्यान देआंये, तां तुहें भला कराँ ये।

²⁰पर सब्बीं ते बड्डी गल्ल येई भई तुहांजो ये जाणी लेणा चाहिन्दा भई पवित्रशास्त्रा री कोई बी भविष्यवाणी भविष्यवक्तयां रे अपणे विचार नींये।

²¹काँह्भई कोई बी भविष्यवाणी माहणुआं रिया इच्छा ते नीं हुई, पर माहणु पवित्र आत्मा रिया अगुवाईया ते बोलां थे सै जे परमेशर तिन्हांजो दसणा चांह था।