Read Bilaspuri 1 यूहन्ना 3 Bible Online

1 यूहन्ना 3 - Bilaspuri bible

1 यूहन्ना 3

¹बचार करीने देक्खा, भई परमेशर पिता अहांने केढ़ा प्यार कित्या, भई अहें परमेशरा रे बच्चे बणी सक्को, कने सै सच्चमुच अहें हाये बी ये, इसा वजह ने संसारा रे लोक अहांजो नीं जाणदे, काँह्भई तिन्हें परमेशर पिता जो बी नीं जाणया।

²मेरे प्यारे मित्रो, हुण अहें परमेशरा री सन्तान ये कने हल्तियां तक ये प्रगट रुपा च नीं आईरा भई भविष्य च अहें क्या हुणे! जो बी हो, अहें ये जाणाँ ये भई ताहली जे मसीहे प्रगट हूणा, तां अहां बी तिसरे बराबर हूणा, काँह्भई अहां तिसजो तियां इ देखणा, तेढ़ा जे सै हाया।

³कने सै जे कोई यीशु मसीह पर ये आशा रक्खां, सै खुद अप्पूँजो तियां इ पवित्र कराँ, तिआं जे मसीह पवित्र आ।

⁴सै जे कोई पाप कराँ, सै परमेशरा रिया व्यवस्था जो तोड़ां, काँह्भई व्यवस्था जो तोड़ना इ पाप आ।

⁵कने तुहें त जाणाँ ये, भई मसीह लोकां रे पापां जो हरने रे खातर इ प्रगट हुया, कने तिसरे स्वभावा च पाप निआं।

⁶सै जे कोई मसीह च बणीरा रैयां, सै पाप नीं करदा; कने सै जे पाप कराँ, तिने न त तिसरे दर्शण कीतिरे, कने नई कदीं मसीह जो जाणया।

⁷प्यारे बच्चो, किसी रे भरमाणे च नीं आयों; सै जे धर्मा रे काम्म कराँ, सैई धर्मी आ, ठीक तियां इ तियां जे मसीह धर्मी आ।

⁸सै माहणु जे पाप कराँ, सै शैतान्ना रिया तरफा ते आ, काँह्भई शैतान शुरु तेई पाप करदा आया; इस खातर परमेशरा रा पुत्र प्रगट हुया, भई सै शैतान्ना रे कम्मां जो नाश करो।

⁹सै जे कोई परमेशरा रा बच्चा, सै पाप नीं करदा; काँह्भई परमेशरा रा स्वाभाव तिसच बणीरा रैयां: इस खातर सै पाप करी नीं सकदा, काँह्भई सै परमेशरा रा बच्चा।

¹⁰इसते अहें जाणाँ ये भई कुण परमेशरा री सन्तान इ कने कुण शैतान्ना री सन्तान इ; सै माहणु जे धर्मा रे काम्म नीं करदा सै परमेशरा रा निआं, कने नांई सै अपणे साथी विश्वासिये ने कोई प्यार रखदा।

¹¹सै खुशखबरी जे तुहें शुरु ते सुणी, सै येई भई अहें इक-दूये ने प्यार रखिये।

¹²कने आदम रे पुत्र कैना साई नीं बणा, सै जे शैतान्ना ते था, कने तिने जे अपणे भाईये री हत्या कित्ती; कने तिने अपणे भाईये जो किसा वजह ने मारया? तिसरी ये वजह थी भई तिसरे काम्म बुरे थे, कने तिसरे भाईये रे काम्म भलाईया रे थे।

¹³मेरे साथी विश्वासियो, जे इस संसारा रे लोक तुहांजो नफरत करो, तां चम्भा नीं करयों।

¹⁴अहांजो पता भई अहें मौती ते अजाद हुईने हुण अहांजो अनन्त जीवना मिलीरा; काँह्भई अहें अपणे साथी विश्वासियां ने प्यार रखां ये: सै जे प्यार नीं रखदा, सै आत्मिक रितिया ने मरी चुक्कीरा।

¹⁵सै कोई जे अपणे साथी विश्वासिये ने दुश्मणी रखां, सै हत्यारा हुया; कने तुहें त जाणाँ ये, भई किसी हत्यारे च अनन्त जीवन नीं रैहन्दा।

¹⁶यीशु मसीह अहांरे खातर अपणिया जिन्दगिया रा त्याग करित्या; इसते अहें जाणाँ ये भई प्यार क्या; इस खातर अहांजो बी अपणे साथी विश्वासियां रे खातर अपणे प्राणां रा त्याग करना चाहिन्दा।

¹⁷पर जिस किसी ले संसारिक धन-दौलत हो कने सै अपणे साथी विश्वासिये जो जरूरत मन्द देखीने तिस पर तरस नीं खाओ, तां तिसच परमेशरा रा प्यार कियां बणीने रैई सक्कां?

¹⁸मेरे प्यारे बच्चो, अहांरा प्यार सिर्फ मुँआं ते गलाई रियां गल्लां तक इ सीमित नीं रैहणा चाहिन्दा, पर कर्म करने औल़ा कने सच्चा हूणा चाहिन्दा।

¹⁹ताहली जे अहें दुज्यां ने प्रेम कराँ ये तां अहां जाणना भई अहें सच्चाईया री सन्तान ये; कने तिसा गल्ला खातर जे अहांरा मन अहांजो दोष देंगा, तिस बारे च अहें परमेशरा रे सामणे अपणे दिलां जो हौंसला देई सकगे;

²⁰काँह्भई परमेशर अहांरे मना ते बड्डा, कने सै सब किछ जाणाँ।

²¹प्यारे बच्चो, जे अहांरा मन अहांजो दोष नीं देओ, तां अहें परमेशरा रे सामणे आत्म विश्वासा ने आई सक्कां ये।

²²कने सै किछ जे अहें परमेशरा ते मंगां ये, सै अहांजो तिसते मिलां; काँह्भई अहें तिसरे हुक्मां जो मन्नां यें, कने सै जे किछ तिस्सो ठीक लगां अहें सैई कराँ ये।

²³कने तिसरा हुक्म येआ: भई अहें तिसरे पुत्र यीशु मसीह रे नौआं पर विश्वास करिये कने तियां जे तिने अहांजो हुक्म दित्या तिसरे मुतावक अहें इक दुज्जे ने प्यार रखिये।

²⁴कने सै जे तिसरयां हुक्मां रा पालन कराँ, सै परमेशरा ने संगती रखां, कने परमेशर तिसच बास हुआं। कने इसते इ यनि तिस पवित्र आत्मा ते सै जे तिने अहांजो दित्या, अहें जाणाँ ये, भई परमेशर अहांरे अन्दर बास कराँ।