Read Bilaspuri 1 यूहन्ना 5 Bible Online

1 यूहन्ना 5 - Bilaspuri bible

1 यूहन्ना 5

¹सै जे कोई ये विश्वास करां भई यीशु इ मसीह आ, सै परमेशरा रा बच्चा; कने सै जे कोई पिता परमेशरा ने प्यार रक्खां, सै तिसने बी प्यार रक्खां, सै जे तिसरा बच्चा।

²ताहली जे अहें परमेशरा ने प्यार रक्खां ये, कने तिसरे हुक्मां रा पालन कराँ ये, तां अहें जाणी लें भई अहें परमेशरा रिया सन्तानां ने बी प्यार रक्खां ये।

³कने परमेशरा रा प्यार येआ, भई अहें तिसरे हुक्मां रा पालन करिये, सै जे मुश्कल नींये।

⁴काँह्भई परमेशरा रा हरेक बच्चा संसारा पर जय पाई लेआं, कने सै विजय तिसते जे संसारा पर जीत मिलां इ, सै अहांरा विश्वास आ।

⁵सै जे ये विश्वास कराँ भई यीशु इ परमेशरा रा पुत्र आ, सिर्फ सैई संसारा पर जीत पां।

⁶ये सैई यीशु मसीह आ तिसजो जे परमेशरे संसारा च भेज्या, कने तिने पाणिये ते बपतिस्मा लैया कने बाद बिच ताहली जे सै मरया तां तिसरा खून बहाया गया। न सिर्फ तिने बपतिस्मा लैया पर क्रूसा पर खून बहाई ने मरया।

⁷कने सै जे गवाही देआं, सै पवित्र आत्मा; काँह्भई पवित्र आत्मा सच्च बोलां।

⁸कने गवाही देणे औल़े तिन्न ये; आत्मा, पाणी कने खून कने ये तिन्नो इक्की गल्ला पर अप्पूँ चियें सहमत ये।

⁹ताहली जे अहें माहणुये रिया दित्ति रिया गवाहिया पर विश्वास करी लैं, तां परमेशरा री दितिरी गवाही त इसते बी बधीने इ; कने परमेशरा री गवाही येई भई तिने अपणे पुत्रा रे बारे च गवाही दित्ति।

¹⁰सै जे परमेशरा रे पुत्रा पर विश्वास कराँ, सै अपणे दिला च तिसा गवाहिया जो रक्खां; तिने जे परमेशरा पर विश्वास नीं कित्या, सै परमेशरा जो झूट्ठा बणां; काँह्भई तिने तिसा गवाहिया पर विश्वास नीं कित्या, सै जे परमेशरे अपणे पुत्रा रे बारे च दितिरी,

¹¹कने सै गवाही येई भई परमेशरे अहांजो अपणे पुत्रा रे जरिये अनन्त जीवन दित्या।

¹²सै जे कोई तिसरे पुत्रा ने गैहरा सलबन्ध रखां तिसले अनन्त जीवन आ; कने सै जे परमेशरा रे पुत्रा ने गैहरा सलबन्ध नीं रखदा, तिसले अनन्त जीवन बी निआं।

¹³परमेशरा रे पुत्रा पर विश्वास रखणे औल़यो, ये गल्लां तुहांजो हऊँ इस खातर लिखिराँ तिसते जे तुहें ये जाणी लो, भई अनन्त जीवन तुहांरा।

¹⁴कने अहांरा परमेशरा च ये आत्मविश्वास आ भई जे अहें तिसरिया इच्छा रे मुतावक तिसते विनती करिये, तां सै अहांरी सुणां,

¹⁵कने ताहली जे अहें जाणाँ ये भई चाये अहें तिसते किछ बी मंग्गो, सै अहांरी सुणां, तां अहें ये बी जाणाँ ये, भई सै किछ जे अहें तिसते मंगीरा, सै अहें पाईरा।

¹⁶जे कोई अपणे साथी विश्वासिये जो येढ़ा पाप करदे देक्खो, तिसरा नतीजा जे मौत नीं हो, तां अपणे साथी विश्वासिये रे खातर प्राथना करा; कने तिन्हां रिया वजह ने परमेशरा तिस्सो जीवन देणा, तिन्हें जे येढ़ा पाप कित्या, जिसरा नतीजा जे मौत नीं हो। पाप येढ़ा बी हुआं तिसरा नतीजा जे मौत आ: हऊँ इसरे बारे च विनती करने खातर नीं बोलां।

¹⁷सारे बुरे काम्म त पाप हुया, पर येढ़ा पाप बी आ, तिसरा नतीजा जे मौत निआं।

¹⁸अहें जाणाँ ये भई सै जे कोई परमेशरा बच्चा, सै पाप नीं करदा; पर परमेशरा रा पुत्र यीशु मसीह तिसजो बचाईने रक्खां, कने शैतान तिसजो छुई नीं पान्दा।

¹⁹अहें जाणाँ ये भई अहें परमेशरा रे बच्चे, कने सारा संसार तिस शैतान्ना रे बशा चा।

²⁰पर अहांजो पता भई परमेशरा रा पुत्र यीशु मसीह संसारा च आईरा कने तिने अहांजो ये समझाईतरा भई अहें तिस सच्चे परमेशरा जो पछयाणी लो; कने अहें तिस चे सै जे सच्चा, यनि तिसरे पुत्र यीशु मसीह च रैं, सैई सच्चा परमेशर कने अनन्त जीवन आ।

²¹मेरे बच्चो, येढ़ी हर इक चीजा ते दूर रौआ सै जे तुहांरे दिलां च परमेशरा री जगह लेई लैंई।