Read Bilaspuri प्रकाशितवाक्य 1 Bible Online

प्रकाशितवाक्य 1 - Bilaspuri bible

प्रकाशितवाक्य 1

¹यीशु मसीह रा प्रकाशन, सै जे परमेशरे तिस्सो इस खातर दित्या ताकि सै अपणे सेवकां जो तिन्हां गल्लां जो दिखाओ, तिन्हांरा जे जल्दी हुणे रे खातर परमेशरे तैह कित्तिरा। यीशु मसीहे अपणा स्वर्गदूत भेज्जीने इन्हौं अपणे सेवक यूहन्ने जो दस्या,

²कने तिने जे परमेशरा रे वचन कने यीशु मसीह री गवाही, यनि जो किछ तिने देख्या था तिसरी गवाही दित्ति।

³परमेशरा तिन्हां सारयां माहणुआं जो आशीष देणी सै जे इन्हां भविष्यवाणियां रे वचनां जो पढ़ां ये, कने सै जे सुणां ये कने इसच लिखी रियां गल्लां रा पालन कराँ ये, काँह्भई इन्हां गल्लां रा पूरा हुणे रा बगत नेड़े आ।

⁴हऊँ यूहन्ना, ये आसिया प्रदेशा री सात्त कलीसियां जो लिख्या राँ: तिस परमेशरा रिया तरफा ते सै जे हाया, सै जे था, सै जे औणे औल़ा; कने तिन्हां सत्तां आत्मां रिया तरफा ते, सै जे तिसरे संघासणा रे सामणे इयां,

⁵कने यीशु मसीह रिया तरफा ते सै जे बफादार गवाह कने मूईरेयां चते जी उठणे औल़यां च पैहला कने धरतिया रे सारे राजयां रा प्रधान आ, तुहांजो अनुग्रह कने शान्ति मिलदी रौ। सै अहांने प्यार कराँ, कने तिने अपणे खून्ना ने अहांजो पापां ते छडवाईरा।

⁶इसा वजह ते अहें याजकां रा वंश बणीगरे सै जे तिसरे पिता परमेशरा री सेवा कराँ ये। इस खातर यीशु मसीह री महिमा कने राज युगां-युगां तक रौ! आमीन।

⁷देक्खा, मसीह बद्दल़ां सौगी आया रां, कने सारयां तिस्सो देखणा, येत्थी तक भई सै लोक बी तिन्हेंजे तिस्सो भाले ने बिन्हया था; तिन्हां बी तिसखा देखणा, कने संसारा रे सारयां लोकां तिसरिया वजह ते बिलकी-बिलकी ने रोणा। हाँ, ये हूणा। आमीन।

⁸प्रभु परमेशर बोलां, “हऊँ इ अल्फा कने ओमेगा। सर्वशक्तिमान इ हाया सै जे था, सै जे हया, कने सै जे औणे औल़ा।”[1]

⁹हऊँ यूहन्ना, तुहांरा साथी विश्वासी आ कने यीशु मसीह रे दुख, कने राज, कने धीरजा च तुहांरे सौगी आ। हऊँ पतमुस नौआं रे टापुये[2] च परमेशरा रे वचना कने यीशुये री गवाही देणे रिया वजह ते कैदी था।

¹⁰हफ्ते रे पैहले दिन मिन्जो परमेशरा रे आत्मे अपणे वशा च करील्या; कने अपणे पिछे ते तुरहिया साई ऊच्चिया अवाज़ा च ये बोलदे हुये सुणया,

¹¹“जो किछ तू देक्खां तिसजो कताबा च लिखीने सत्तां नगराँ रियां कलीसियां ले भेजी दे, यनिके इफिसुस, स्मुरना, पिरगमुन, थुआतीरा, सरदीस, फिलदिलफिया, कने लौदीकिया जो।”

¹²फेरी मैं मुड़ीने गलाणे औल़े जो देखणा चाया; तियां जे हऊँ मुड़या, मैं सोने रे सात्त दीपदान देक्खे;

¹³कने तिन्हां सात्त दीपदान्नां रे बिच माहणुये साई इक प्राणिये जो देख्या, तिने जे पैराँ तक कपड़ा पैहनीरा था, कने छातिया पर सोने री पट्टी बन्हीरा थी।

¹⁴तिसरे सिरा रे बाल़ ऊन्ना साई सफेद कने बर्फा साई चमकीले थे, तिसरियां आक्खीं अग्गी रियां लपटां साई चमकया राँ थिआं।

¹⁵तिसरे पैर भट्ठिया च तपाईरे चमकीरे पितला साई थे; कने तिसरी अवाज़ समुद्रा री भयानक लैहराँ साई थी।

¹⁶सै अपणे सज्जे हत्था च सात्त तारे लईरे था, कने तिसरे मुँआं ते दोधारी तेज तलवार निकल़ी राँ थी, तिसरा मुँह तियां चमकीरा था, तियां जे सूरज दोपैहरके बगत चमकां।

¹⁷ताहली जे मैं तिस्सो देख्या, तां हऊँ इकदम तिसरे पैराँ पर मुड़दयां साई पईग्या। फेरी तिने अपणा सज्जा हाथ मांह पर रखीने मेरने बोल्या, “डरदा मत; हऊँ इ पैहला कने आखिरी आ।

¹⁸हऊँ जिन्दगिया रा सोता; हऊँ मरी चुक्कीरा था, पर हुण हऊँ हमेशा खातर जीवित आ। मौत कने अधोलोका रियां चाबियाँ मेरले इयां।

¹⁹इस खातर सै गल्लां जे तैं देखियां कने सै गल्लां जे हुया राँईयां कने सै गल्लां जे इसते बाद हुणे औल़ियां इ, तिन्हां सब्बीं जो लिखी लै।

²⁰तिन्हां सत्तां तारयां रा मतलब तिन्हांजो जे तैं मेरे सज्जे हत्था देख्या था, कने तिन्हां सत्तां सोने रे दीपदान्ना रा मतलब येआ: सै सात्त तारे सत्तां कलीसियां रे दूत ये, कने सै सात्त दीपदान सात्त कलीसियां इ।”