Read Bilaspuri प्रकाशितवाक्य 12 Bible Online

प्रकाशितवाक्य 12 - Bilaspuri bible

प्रकाशितवाक्य 12

¹फेरी स्वर्गा च इक बड्डा नशाण दिख्या, यनि इक औरत थी तिसे जे सूरज ओडीरा था, कने चाँद तिसारे पैराँ हेठ था, कने तिसारे सिरा पर बारा तारयां रा मुकट था।

²कने सै भारहत्थी थी; कने अपणे बच्चे जो जणने औल़ी थी कने बौहत पीड़ा रिया वजह ते रड़ाया राँ थी।

³इक होर नशाण स्वर्गा च दिख्या; इक बड्डा जेआ लाल रंगा रा अजगर था, तिसरे सात्त सिर कने दस सिंग थे, कने सारयां सिराँ पर इक-इक मुकट था।

⁴तिने अपणिया फूंटिया ने अम्बरा रे तारयां रा इक तिहाई खिंज्जी ने धरतिया परा सट्टीत्या। सै अजगर तिसा औरता रे सामणे खड़ा हुईग्या सै जे बच्चे जो जणने औल़ी थी, ताकि ताहली जे सै बच्चा जणे तां अजगर बच्चे जो खाई सक्को।

⁵तिसे इक बालक जणया तिस जे लोहे री रौड़ लईने सारयां देशां पर राज करना, तिसा औरता रा बच्चा अचानक इ परमेशरा ले कने तिसरे संघासणा ले चक्की ने पहुँचाईत्या गया;

⁶कने सै औरत तिस सुनसान जगह पर नट्ठीने चलीगी तित्थी जे परमेशरा रिया तरफा ते तिसा खातर इक जगह त्यार कित्ती गई थी, ताकि तित्थी सै बारा सौ साठ दिनां तका पाल़ी जाओ।

⁷फेरी स्वर्गा च इक लड़ाई हुई, मीकाईल कने तिसरे स्वर्गदूत अजगरा ने लड़ने जो निकले; कने अजगर कने तिसरे दूत तिन्हांने लड़े,

⁸पर अजगर कने तिसरे दूत हारीगे, कने स्वर्गा च तिन्हां खातर कोई जगह नीं रैई।

⁹कने बड्डा अजगर यनि सैई पुराणा सर्प तिस्सो जे इबलिश कने शैतान बोलां ये कने सै जे सारे संसारा रा भरमाणे औल़ा। सै धरतिया पर तिसरे दूतां समेत सट्टि दित्या गया।

¹⁰फेरी मैं स्वर्गा च ऊच्चिया अवाज़ा च किसी जो ये बोलदे सुणया, “हुण अहांरे परमेशर रा छुटकारा, सामर्थ, राज कने तिसरे मसीह रा अधिकार प्रगट हुईरा; काँह्भई अहांरे साथी विश्वासियां पर दोष लगाणे औल़ा, सै जे अहांरे परमेशरा रे सामणे रात-दिन तिन्हां परा दोष लगान्दा रैआं था, थल्ले सट्टीत्या गईरा।

¹¹“तिन्हें मेमने रे खून्ना रिया वजह ते कने अपणिया गवाहिया रे बचना रिया वजह ते तिस पर जीत पाईरी, काँह्भई तिन्हें मरते दम तक अपणिया जानी री परवाह नीं कित्ती।

¹²इस खातर हे स्वर्गो कने तिन्हां च रैहणे औल़यो, मौज करा! पर हे धरती, कने समुद्र, तुहां परा लाणत इ! काँह्भई शैतान बड़े गुस्से सौगी तुहांले उतरी ने आईरा! काँह्भई सै जाणाँ भई तिसरा थोड़ा इ बगत होर बाकी आ।”

¹³ताहली जे अजगरे देख्या भई हऊँ धरतिया परा सटी तरा, तां सै तिसा औरता जो तिसे जे बालका जो जणया था, सताणे लगया।

¹⁴पर तिसा औरता जो बड़े ऊकाबा रे दो फंग दित्ते गये, भई सै सर्पा रे सामणे ते उडीने सुनसान जगह च तिसा जगह पुज्जी जाओ, तित्थी जे सै साडे तिन्न साल्लां तक पाल़ी जाओ।

¹⁵फेरी सर्पे औरता रे सामणे अपणे मुँआं ते नदिया साई पाणी बगाया ताकि तिसाजो इसा नदिया च हड़ाई दो।

¹⁶पर धरतिये तिसा औरता री मद्‌द कित्ती, धरतिये अपणा मुँह खोल्ली ने तिसा नदिया जो जे अजगरे अपणे मुँआं ते बगाया था, पी ल्या।

¹⁷फेरी अजगरा जो जनाना पर गुस्सा आया कने तिसारियां बाकी औल़ादां ते लड़ने जो गया, सै जे परमेशर रे हुक्मा जो मन्नां ये कने यीशुये री सही शिक्षां पर अटल ये।

¹⁸कने समुद्रा रे कनारे रिया रेता पर अजगर जाईने खड़ा हुया।