Read Bilaspuri प्रकाशितवाक्य 19 Bible Online

प्रकाशितवाक्य 19 - Bilaspuri bible

प्रकाशितवाक्य 19

¹इसते बाद मैं स्वर्गा च मन्नो बडिया भीड़ा जो ऊच्चिया अवाज़ा ते ये बोलदे सुणया, “हालेलूय्याह! छुटकारा, महिमा कने सामर्थ सिर्फ अहांरे परमेशरा री हई।

²काँह्भई तिसरे न्याय सच्चे कने ठीक ये, इस खातर भई तिने तिसा बड्डिया वेश्या रा न्याय कित्या, सै जे सारिया धरतिया जो अपणे व्यभिचारा ने गुमराह कराँ थी, कने तिसाते अपणे दास्सां रे खून्ना रा बदला लित्या।”

³फेरी दुज्जी बार तिन्हें पुकारी ने बोल्या, “हालेलूय्याह! तिसारे फुखणे रा धूँ युग-युग तक उठदा रैहणा।”

⁴कने चौबी प्राचीनें कने चऊँ जिऊंदे प्राणियें मुँआ रे भार धरतिया पर पैईने परमेशर री अराधना कित्ती सै जे संघासणा पर बैठिरा था, कने बोल्या, “आमीन! हालेलूय्याह!”

⁵कने संघासणा चते इक अवाज़ निकली, “हे अहांरे परमेशरा ते सारे डरने औल़े सेबको, क्या छोट्टे, क्या बड्डे; तुहें सारे तिसरी स्तुति करा।”

⁶फेरी मिन्जो बौहत भीड़ा साई कने मते पाणिये रे बगणे साई अवाज़, कने गर्जना साई बौहत अवाज़ सुणी, “हालेलूय्याह! काँह्भई प्रभु अहांरा सर्वशक्तिमान परमेशर राज कराँ।

⁷औआ, अहें खुश कने मगन हुईगे, कने तिसरी स्तुति करिये, काँह्भई मेमने रे ब्याह रा वगत आई गरा, कने तिसरिये दुल्हने अप्पूँजो त्यार करी लरा।

⁸पैहनणे रे खातर तिस्सो अच्छिया किस्मा री साफ कने चमकदी मलमल दित्ति गई, काँह्भई अच्छिया किस्मा री मलमल रा मतलब परमेशरा रे लोकां रे धर्मा रे काम्म ये।”

⁹फेरी स्वर्गदूते मेरने गलाया, “ये लिख, भई आशीषित सै ये, तिन्हौं जे मेमने रे ब्याह रिया धाम्मा च सद्दया गया।” फेरी तिने मेरने गलाया, “ये वचन परमेशरा रे सच्चे वचन ये।”

¹⁰फेरी तिसरी अराधना करने खातर हऊँ तिसरे पैराँ पर पैईग्या। तिने मेरने गलाया, “देख, येढ़ा मत करा! हऊँ तेरा कने तेरे साथी विश्वासियां साई इक दास इ हाया, सै जे यीशुये री गवाही देणे पर मजबूत आ। परमेशरा री अराधना कर; काँह्भई यीशु मसीह री गवाही भविष्यवाणिया री आत्मा इ।”

¹¹फेरी मैं स्वर्गा जो खुल्हीरा देख्या, कने तित्थी मेरे सामणे इक चिट्टा घोड़ा था; तिस पर इक स्वार आ, सै जे बफादार आ कने सच्चा कहलाया जां; कने सै धार्मिकता ने न्याय कने लड़ाई कराँ।

¹²तिसरियां आक्खीं अग्गी रियां लपटां साई, कने तिसरे सिरा पर बौहत सारे मुकुट ये। कने तिसरा इक नौं तिस पर लिख्या हुया, तिसजो जे तिसते इलावा होर कोई नीं जाणदा।

¹³तिने येढ़े कपड़े पैहनीरे सै जे खून्ना च डुबोईरे, कने तिसरा नौं परमेशरा रा वचन आ।

¹⁴कने स्वर्गा री सेना चिट्टयां घोड़यां पर स्वार कने चिट्टे साफ कने बड़िया मलमला रे कपड़े पैहनीरे तिसरे पिच्छे-पिच्छे चलीरे।

¹⁵जाति-जाति जो मारने खातर तिसरे मुँआं ते तेज धार तलवार निकल़ां इ। तिस तिन्हांरे ऊपर लोहे री रौड़ा ने राज करना। तिस सर्वशक्तिमान परमेशरा रे भयानक गुस्से री जलजलाहटा री मदिरा रे कुण्डा च अंगूरां जो पीहणा।

¹⁶कने तिसरे कपड़े कने लत्ता पर ये नौं लिखिरा : “राजयां रा राजा कने प्रभुआं रा प्रभु।”

¹⁷फेरी मैं इक्की स्वर्गदूता जो सूरजा पर खढ़िरे देख्या, तिने बौहत जोरा रिया अवाज़ा च हाक्क पाईने अम्बरा च उडणे औल़े सारे पंछियां ने गलाया, “औआ, कने परमेशरा रे बड्डे भोज्जा च कट्ठे हुई जावा,

¹⁸ताकि तुहें राजयां, प्रधानां, कने ताकतवर लोकां, घोड़यां, तिन्हांरे स्वाराँ कने सब तरह रे लोक; क्या अजाद, गुलाम, छोट्टयां कने बड्डयां रा माँस खाई सक्को।”

¹⁹फेरी मैं तिस पशुये कने धरतिया रे राजयां कने तिन्हां रिया सेना जो घोड़े पर बैठिरे स्वार कने तिसरिया सेना ने लड़ने खातर कट्ठे हुईरे देख्या।

²⁰सै पशु कने झूट्ठे भविष्यवक्ते जो सै जे तिसरे सामणे येढ़े नशाण दस्से थे, तिन्हांरे जरिये तिने तिन्हांजो भरमाया, तिन्हां पर जे पशुये री छाप थी, कने सै जे तिसरी मूर्तियां री पूजा कराँ थे। इन्हां दुईं जो जीते जी तिसा अग्गी रिया झीला च, सै जे गन्धका ने जल़ां इ, पाये गये।

²¹कने बाकी लोकां जो घोड़े रे स्वारा रिया तलवारा ने सै जे तिसरे मुँआं ते निकल़ां थी मारे गये; कने सब पंछी तिन्हांरे माँसा ते रज्जीगे।