Read Bilaspuri प्रकाशितवाक्य 2 Bible Online

प्रकाशितवाक्य 2 - Bilaspuri bible

प्रकाशितवाक्य 2

¹तिने बी मिन्जो बोल्या, “इफिसुस नगरा रिया कलीसिया रे दूता जो ये सन्देश लिख: मैं सात्त तारे अपणे हत्था च लईरे, कने हऊँ सोन्ने रे सत्तां दीपदान्नां रे बिच चलां फिराँ, हऊँ ये बोलां भई :

²हऊँ तेरे काम्म, कने तेरी मेहणत, कने तेरे धीरजा जो जाणाँ। कने ये बी भई तू बुरयां लोकां जो सैहण नीं करी सकदा, कने सै जे अप्पूँजो प्रेरित बोलां ये, पर हये नींये तिन्हांजो तैं परखीने झूट्ठा पाया।

³हऊँ जाणाँ भई तैं मेरे नौआं रे खातर धीरजा ने दुख सैया, फेरी बी तैं विश्वास नीं छड्डया।

⁴पर मिन्जो तेरे खलाफ ये शकैत इ : भई तैं अपणा पैहले साई प्यार करना छड्डीतरा।

⁵याद रख तू गिरने ते पैहले कित्ती था। पापां ते मन फिरा कने सैई कर सै जे तू पैहले कराँ था। जे तू मन नीं फिराँगा, तां मांह तेरले औणा कने तेरे दीपदान्ना जो तिसरिया जगह ते हटाई देणा।

⁶पर हाँ, तूह च ये खरी गल्ल इ : भई तू नीकुलईयां[3] रे कम्मां ते नफरत कराँ, तिन्हांते जे हऊँ बी नफरत कराँ।

⁷सै जे मेरी गल्ल समझणा चाँह, सै ध्यान देईने सुणो भई परमेशरा रा आत्मा कलीसियां ने क्या बोलां। सै जे जय पाओ तिस्सो मांह जिन्दगिया रे डाल़ा चते सै जे परमेशरा रे स्वर्ग लोका[4] चा, फल़ खाणे जो देणा।”

⁸तिने बी मिन्जो बोल्या, “स्मुरना नगरा रिया कलीसिया रे दूता जो ये सन्देश लिख: हऊँ पैहला कने आखरी आ; हऊँ मरीग्या था कने हुण जिऊंदा हुईगरा, हऊँ ये बोलां:

⁹हऊँ तेरे दुख, कने तेरी गरीबिया जो जाणाँ, पर तू अमीर आ! कने हऊँ तिन्हां रिया निंध्या जो बी जाणाँ सै लोक जे अप्पूँजो यहूदी बोलां ये, कने हये नींये, पर शैतान्ना री सभा ये।

¹⁰सै दुख जे तिज्जो झलणे पौणे, तिन्हांते मत डर; काँह्भई, शैतान दुज्जे किछ लोकां रे जरिये तुहांजो परखणे खातर तुहां चते किछ लोकां जो जेल्ला च पाई देणा; कने तुहौं दस्सां दिनां तक दुख सैहणे पौणा। आखरी सांस तक बफादार बणीने रै, फेरी मांह तिज्जो जीवना रा मुकट देणा।

¹¹सै जे मेरी गल्ल समझणा चाँह सै ध्यान देईने सुणो भई परमेशरा रा आत्मा कलीसियां ने क्या बोलां। सै जे जय पाओ, तिस्सो दुज्जिया मौता[5] ते नुक्शान नीं हूणा।”

¹²तिने बी मिन्जो बोल्या, “पिरगमुन नगरा रिया कलीसिया रे दूता जो ये सन्देश लिख: मेरले दोधारी कने तेज तलवार इ, हऊँ ये बोलां:

¹³हऊँ येत जाणाँ, भई तू ओत्थी रैआं तित्थी जे शैतान राज कराँ; कने तू मांह पर लगातार मजबूतिया ने विश्वास कराँ कने तैं तिन्हां दिनां च बी मांह पर विश्वास करना नीं छड्डया, ताहली जे मेरा बफादार गवाह अन्तिपास तिसा जगह मारया गया, तित्थी जे शैतान वास कराँ।

¹⁴पर मेरले तेरे खलाफ किछ शकैतां इ : तेरे बिच किछ येढ़े लोक ये सै जे बिलाम भविष्यवक्ते रिया शिक्षा जो मन्नां ये; तिने जे राजा बालाक जो इस्राएलियां जो बेहकाणे खातर सखाया भई सै मूरतां पर चढ़ाईरा प्रसाद खाणे ते कने व्यभिचार करने ते पाप करो।

¹⁵तियां इ तेरे बिच किछ येढ़े लोक ये, सै जे नीकुलईयां री शिक्षां जो मन्नां ये।

¹⁶इस खातर पापां ते मन फिरा, नैंत मांह तेरले जल्द आईने, अपणे मुँआं रिया तलवारा ने तिन्हां सौगी लड़ना।

¹⁷सै जे मेरी गल्ल समझणा चाँह सै ध्यान देईने सुणो, भई परमेशरा रा आत्मा कलीसियां ने क्या बोलणा चांह। सै जे जय पाओ, तिस्सो मांह गुप्त मन्ने चते देणा कने तिस्सो इक सफेद पत्थर बी देणा कने तिस पत्थरा पर इक नौं लिखिरा हूणा, तिसजो जे पाणे औल़े ते इलावा होर कोई नीं जाणी पांगा।”

¹⁸तिने बी मिन्जो बोल्या, थुआतीरा नगरा रिया कलीसिया रे दूता जो ये सन्देश लिख: “हऊँ परमेशरा रा पुत्र आ कने मेरियां आक्खीं अग्गी रिया लपटा साई चमकी रियां, कने मेरे पैर चमकदे पितला साई ये, हऊँ ये बोलां:

¹⁹हऊँ तेरे कम्मां, प्यार, विश्वास, सेवा कने धीरजा, जो जाणाँ कने ये बी हऊँ जाणाँ भई तेरे हुणके काम्म पैहलकयां कम्मां ते जादा ये यनि ताहली जे तैं मांह पर विश्वास करने ते बाद कित्या था।

²⁰पर मिन्जो तेरे खलाफ ये शकैत इ : भई तू तिसा जनाना ईजेबेल जो अपणे बिच रैहणे देआं, सै जे अप्पूँजो भविष्यवक्तिन बोलां इ। कने सै अपणिया शिक्षा ते मेरे दास्सां जो व्यभिचार करने, कने मूर्तियां रे अग्गे चढ़ाईरे प्रसादा जो खाणा सखाई ने भरमांई।

²¹मैं तिसाजो तिसारे व्यभिचारा ते मन फिराणे रा वगत दित्तिरा, पर सै मन नीं फिराणा चाहन्दी।

²²देख, मांह तिसा जनाना जो बमारिया रे बिस्तरे च पाई देणा कने सै जे तिसाने व्याभिचार कराँ ये, जे सै बी तिसारे साई कम्मां ते मन नीं फिराँगे, तां मांह तिन्हां सब्बीं जो बौहत पीड़ा च पाई देणा।

²³मांह तिसारे बच्चयां जो मारी देणा; फेरी सारी कलीसियां ये जाणी लेणा भई दिल कने मना रा परखणे औल़ा हऊँ इ हाया; कने मांह तुहां चते हरेक जो तिसरयां कम्मां रे मुतावक ईनाम देणा।

²⁴पर तुहां थुआतीरा नगरा रे बाकी लोकां ने, जितने जे तिसरिया शिक्षां जो नीं मनदे कने तिन्हां गल्लां जो तिन्हौं जे शैतान्ना रियां गैहरियां गल्लां बोलां ये नीं जाणदे, हऊँ ये बोलां भई मांह तुहां पर होर बोझ नीं पाणा।

²⁵पर हाँ, सै जे तुहांले आ, तिस्सो मेरे औणे तक मजबूतिया ने थम्मी रखा।

²⁶सै जे जय पाओ, कने आखिर तक मेरियां इच्छां जो पूरा करदा रौ, मांह तिस्सो सारी जातियां रे लोकां पर अधिकार देणा।

²⁷तेढ़ा अधिकार जे मैं अपणे पिता ते पाईरा तेढ़ा इ अधिकार मांह तिस्सो देणा, तिस लोहे री रौड़ लईने तिन्हां परा राज करना, कने तिस तिन्हांजो चिक्का रे भाण्डया साई चकनाचूर करना।

²⁸कने मांह तिस्सो तिसरी विजय दसणे खातर सबेरके जुन्ना रा तारा देणा।

²⁹सै जे मेरी गल्ल समझणा चाँह सै ध्यान देईने सुणो भई परमेशरा रा आत्मा कलीसियां ने क्या बोलां।”