Read Bilaspuri प्रकाशितवाक्य 21 Bible Online

प्रकाशितवाक्य 21 - Bilaspuri bible

प्रकाशितवाक्य 21

¹फेरी मैं इक नये अकाश कने नई धरतिया जो देख्या, काँह्भई पैहलका अकाश कने पैहलकी धरती खत्म हुई चुक्कीरे थे, कने समुद्र बी नीं रैया।

²फेरी मैं पवित्र नगर नये यरूशलेम जो अपणे दुल्हे रे खातर त्यार दुल्हना रे रुपा च स्वर्गा ते परमेशरा रे नेड़े ते थल्ले उतरदे देख्या।

³फेरी मैं किसी जो संघासणा चते ऊच्चिया अवाज़ा च ये बोलदे सुणया, “देख, परमेशरा रा वास लोकां रे बिच आ कने तिस तिन्हां सौगी वास करना, कने सै तिसरे लोक होणे; कने परमेशरा खुद तिन्हां सौगी रैहणा; कने तिस तिन्हांरे परमेशर हूणा।

⁴कने तिस तिन्हांरियां आक्खीं ते सारे आंसु पुंजी देणे; इसते बाद मौत नीं रैहणी, कने नां दुख, नां वलाप, नां पीड़ा रैहणी; काँह्भई पुराणियां गल्लां बीती गियां।”

⁵सै जे संघासणा पर बैट्ठया था, तिने बोल्या, “हऊँ सब किछ नया करी देआं।” फेरी तिने बोल्या, “लिखी लै, काँह्भई ये वचन विश्वास करने लायक कने सच्चा।”

⁶फेरी तिने मेरने बोल्या, “सब किछ पूरा हुईगरा। हऊँ अल्फा कने ओमेगा, शुरु कने अन्त आ। सै जे प्यासा, तिसजो मांह जीवना रे पाणिये रे सोते चते मुफ्त प्याणा।

⁷सै जे जय पाओ सैई तिन्हां चिज़ां रा बारस हूणा; कने मांह तिसरे परमेशर हूणा, कने सै मेरा पुत्र हूणा।

⁸पर डरपोकां, अविश्वासियां, घिनौनयां, हत्यारयां, व्यभिचारियां, जादूगराँ, मूर्तीपूजकां, कने सब्बीं झुट्ठयां रा हिस्सा तिसा नदिया च मिलणा, सै जे अग्गी कने गन्धका ते भखदी रैयांई: ये दुज्जी मौत इ।”

⁹फेरी तिन्हां सत्तां स्वर्गदूतां ले जे सात्त आखरी मुशीवतां ने भरीरे सात्त कटोरे थे, तिन्हां चते इक मेरले आया कने मेरने गल्लां करीने बोल्या, “येत्थी औ, मांह तिज्जो दुल्हन यनि मेमने री जनाना दसणी।”

¹⁰कने परमेशरा रे आत्मे मिन्जो अपणे वशा च करील्या कने स्वर्गदूत मिन्जो इक बड्डे कने ऊच्चे पहाड़ा परा लईग्या, कने मिन्जो पवित्र नगर यरूशलेम जो स्वर्गा ते परमेशरा रे सामणे ते उतरदे दिखाया।

¹¹परमेशरा री महिमा तिसच थी, कने तिसरी ज्योति बौहत इ कीमती पत्थर, यनि बिलौरा साई यशबा रे बराबर साफ थी।

¹²कने तिसरी शहरपनाह बौहत ऊच्ची थी, कने बारा फाटक, कने फाटकां पर बारा स्वर्गदूत थे। कने तिन्हां फाटकां पर इस्राएलियां रे बाराँ गोत्राँ रे नौं लिखिरे थे।

¹³पूर्वा रे पासे तिन्न फाटक, उत्तरा रे पासे तिन्न फाटक, दखणा रे पासे तिन्न फाटक, कने पश्चमा रे पासे तिन्न फाटक थे।

¹⁴कने नगरा री शहरपनाह री बारा निऊंआं थिआं, कने तिन्हां पर मेमने रे बारा प्रेरितां रे नौं लिखे थे।

¹⁵सै जे स्वर्गदूत मेरे सौगी गल्लां करीराँ था, तिसले नगर कने तिसरे फाटकां कने तिसरी शहरपनाह जो नापणे रे खातर इक सोने रा गज था।

¹⁶सै नगर चौकोर आकारा च बस्सीरा था कने तिसरी लंबाई, चौड़ाईया रे बराबर थी; कने तिने तिस गजा ने नगरा जो नापया, तां सै दो हजार चार सौ किलोमीटर निकल़या: तिसरी लंबाई, चौड़ाई कने उँच्चाई बराबर थी।

¹⁷कने तिने तिसरी शहरपनाह जो माहणुआं रे, यनि स्वर्गदूता रे नापा ने नापया, तां दो सौ सोलह फुट मोटा पाया।

¹⁸तिसरी शहरपनाह यशब री बणीरी थी, कने नगर येढ़े शुद्ध सोने रा था सै जे साफ कच्चा साई हो।

¹⁹तिस नगरा री निऊंआं रे पत्थर हरेक किस्मा रे कीमती पत्थराँ ने स्वारी री थी; निऊंआ रा पैहला पत्थर यशब, दुज्जा नीलम, तिज्जा लालड़ी, चौथा मरकत,

²⁰पंजवा गोमेद, छेवां माणिक्य, सतवां पीतमणि, अठवां पेरोज, नौआं पुखराज, दसवां लहसनिया, ग्यारवां धुम्रकान्त, कने बाहरवां याकूत री थी।

²¹बारा फाटक बाराँ मोतियां रे थे; इक-इक फाटक इक-इक मोतिये रा बणीरा था। नगरा री सड़क साफ कच्चा साई शुद्ध सोने री थी।

²²मैं नगरा च कोई मन्दर नीं देख्या, काँह्भई सर्वशक्तिमान प्रभु परमेशर कने मेमना तिसरा मन्दर आ।

²³कने तिस नगरा च सूरज कने चन्द्रमे रिया रोशनिया री जरूरत नीं, काँह्भई परमेशरा रे तेजा ने तिसच उजियाला हुया राँ, कने मेमना तिसरा दीपक आ,

²⁴जाति-जाति रे लोकां तिसरिया जोतिया च चलना कने धरतिया रे राजयां अपणी-अपणी धन-दौलत इस नगरा च ल्यौणी।

²⁵तिसरे फाटक दिनां रे वगत कदीं बन्द नीं हुणे, काँह्भई रात तित्थी नीं हूणी।

²⁶जाति-जाति रे लोकां बी अपणी धन-दौलत तिसच लेईने औणा।

²⁷कने तिसच कोई बी अपवित्र चीज या गन्दा काम्म करने औल़ा, झूट्ठ बोलणे औल़ा, किसी बी तरिके ने नीं औणा, पर सिर्फ सै लोक तिन्हांरे नौं जे मेमने रिया जीवना रिया कताबा च लिखिरे।