Read Bilaspuri प्रकाशितवाक्य 22 Bible Online

प्रकाशितवाक्य 22 - Bilaspuri bible

प्रकाशितवाक्य 22

¹फेरी स्वर्गदूते मिन्जो बिल्लौर साई साफ जीवना रे पाणिये री इक नदी दस्सी, सै जे परमेशर कने मेमने रे संघासणा ते निकल़ीने,

²तिस नगरा रिया सड़कां रे बिच्चो-बिच बैयां थी। नदिया रे इस पार कने तिस पार जीवना रा डाल़ था; तिन्हां डाल़ां पर बाराँ किस्मा रे फल़ लगां थे कने सै हर महीने फल़ां था; कने तिस डाल़ा रे पत्तयां ते जाति-जाति रे लोक ठीक हुआं थे।

³फेरी तित्थी कोई श्राप नीं हूणा कने परमेशर कने मेमने रा संघासण तिस नगरा च हूणा कने तिसरे दास्सां तिसरी अराधना करनी।

⁴तिन्हां तिसरा मुँह देखणा, कने तिसरा नौं तिन्हांरे मत्थे पर लिखिरा हूणा।

⁵कने फेरी तित्थी रात नीं हूणी, कने तिन्हांजो दिऊए कने सूरजा रे उजाले री जरूरत नीं हूणी, काँह्भई प्रभु परमेशरा तिन्हांजो रोशनी देणी, कने तिन्हां युगां-युगां तक राज करना।

⁶फेरी स्वर्गदूते मेरने गलाया, “ये गल्लां विश्वास रे लायक कने सच्चियां इ। कने प्रभुये सै जे भविष्यवक्तयां री आत्मां रा परमेशर आ, अपणे स्वर्गदूता जो इस खातर भेज्या भई अपणे दास्सां जो ये गल्लां दस्सो तिन्हांरा जे जल्दी पूरा हूणा जरूरी आ।”

⁷यीशुये बोल्या, “कने देख, हऊँ जल्दी औणे औल़ा! आशीषित सै आ, सै जे इसा कताबा रियां भविष्यवाणिया रियां गल्लां जो मन्नां।”

⁸हऊँ सैई यूहन्ना, तिने जे ये गल्लां सुणी कने देक्खी। कने ताहली जे मैं सुणया कने देख्या, तां सै जे स्वर्गदूत मिन्जो ये गल्लां दिखां था, हऊँ तिसरे पैरा पर अराधना करने खातर मुँआं रे भार पैईग्या।

⁹पर तिने मेरने बोल्या, “देख, येढ़ा मत कर; काँह्भई हऊँ तेरा कने तेरे साथी विश्वासी भविष्यवक्तयां कने इसा कताबा रियां गल्लां रे मनणे औल़यां रा साथी दास आ, परमेशरा री ही अराधना कर।”

¹⁰फेरी तिने मेरने गलाया, “इसा कताबा री भविष्यवाणिया रियां गल्लां पर सील मत लगा; काँह्भई वगत नजदीक आ।

¹¹सै जे अन्याय कराँ, सै अन्याय इ करदा रौ; कने सै जे गन्दा, सै गन्दा इ बणीरा रौ; सै जे धर्मी आ, सै धर्मी बणीरा रौ; कने सै जे पवित्र आ, सै पवित्र बणीरा रौ।”

¹²यीशुये बोल्या, देख, हऊँ जल्द औणे औल़ा; कने हर इक्की रे कम्मां रे मुतावक बदला देणे रे खातर ईनाम मेरले आ।

¹³“हऊँ अल्फा कने ओमेगा, पैहला कने आखरी आ, आदी कने अन्त।”

¹⁴“आशीषित सैये, सै जे अपणे कपड़े धोई लें, ताकि तिन्हांजो जीवना रे डाला ले औणे रा अधिकार मिलणा, कने तिन्हां फाटकां ते हुईने नगरा च प्रवेश करना।

¹⁵पर कुत्ते, जादूगर, व्यभिचारी, हत्यारे, मूर्त्तिपूजक, कने हरेक झूट्ठा रा चाहणे औल़ा कने झुट्ठियां गल्लां बनाणे औल़ा बाहर रैहणा।

¹⁶“मैं यीशुये अपणे स्वर्गदूता जो इस खातर भेज्या, भई तुहांरे अग्गे कलीसियां रे बारे च इन्हां गल्लां री गवाही देओ। हऊँ दाऊद रा मूल कने वंश, कने चमकदा हुआ तड़के रा तारा।”

¹⁷कने परमेशरा रा आत्मा कने दुल्हन दोन्नो बोलां ये, “औ!” कने सुणने औल़ा बी बोल्लो, “औ!” कने सै जे प्यासा हो, सै आओ कने सै जे कोई चाओ, सै जीवना रा पाणी मुफ्ता च लेओ।

¹⁸हऊँ हरेक जो, सै जे इसा कताबा रिया भविष्यवाणिया रियां गल्लां जो सुणां, चेतावनी देआं जे कोई माहणु इन्हां गल्लां च किछ बधाओ तां परमेशर तिन्हां विपत्तियां जो, सै जे इसा कताबा च लिखी रियां, तिस पर बधांगा।

¹⁹जे कोई इसा भविष्यवाणिया री कताबा रिया गल्लां चते किछ निकाल़ी दो, तां परमेशरा तिस जीवना रे डाला कने तिस पवित्र नगरा चते, तिसारा बखान जे इसा कताबा चा तिसरा हिस्सा निकाल़ी देंगा।

²⁰सै जे इन्हां गल्लां री गवाही देआं, सै ये बोलां, “हाँ, हऊँ जल्दी औणे औल़ा।” आमीन। हे प्रभु यीशु औ!

²¹प्रभु यीशुये रा अनुग्रह परमेशरा रे लोकां सौगी रौ। आमीन।