Read Bilaspuri प्रकाशितवाक्य 5 Bible Online

प्रकाशितवाक्य 5 - Bilaspuri bible

प्रकाशितवाक्य 5

¹कने सै जे संघासणा पर बैठिरा था, मैं तिसरे सज्जे हत्था च इक कताब देक्खी, सै जे अन्दर कने बाहर दुईं तरफा ते लिखिरी थी, कने सै सात्त सीलां लाईने बन्द कित्ती गई थी।

²फेरी मैं इक ताकतवर स्वर्गदूता जो देख्या, सै जे ऊच्चिया अवाज़ा च ये प्रचार कराँ था, “इस कताबा रियां सीलां तोड़ीने कने तिसाजो खोलणे रे लायक कुण आ?”

³पर नां स्वर्गा च, नां धरतिया पर, नां धरतिया ते थल्ले कोई तिसा कताबा जो खोलणे या तिस पर निगह पाणे लायक निकल़या।

⁴फेरी हऊँ फूटी-फूटी ने रोणे लगया, काँह्भई तिसा कताबा रे खोलणे, या तिसाजो देखणे लायक कोई माहणु नीं मिलया।

⁵फेरी तिन्हां प्राचीनां चते इक्की मेरने गलाया, “मत रो; देख यहूदा रे गोत्रा रा सै शेर, सै जे दाऊद रे वंशा रा मुल़ आ विजय हुया। कने सै इसा कताबा जो खोलणे कने तिसरियां सत्तां मोहराँ तोड़ने खातर सामर्थी आ।”

⁶फेरी मैं तिस संघासणा कने चऊँ प्राणियां कने तिन्हां प्राचीनां रे बिच्च, मन्नो इक बध कित्तिरा मेमना खड़ा देख्या। तिसरे सात्त सिंग कने सात्त आक्खीं थिआं; ये परमेशरा रियां सात्त आत्मा ईं, सै जे सारिया धरतिया पर भेज्जी गईयां।

⁷मेमने आईने सै जे संघासणा पर बैठिरा था, तिसरे सज्जे हत्था ते सै कताब लेई ली।

⁸ताहली जे तिने कताब लेई ली, तां सै चारों प्राणी कने चौबी प्राचीनें तिस मेमने रे सामणे धरतिया पर मुँआ रे भार पैईने प्रणाम कित्या। तिन्हां चते हरेक रे हत्था च वीणा कने धूपा ने भरीरे सोने रे कटोरे थे, ये परमेशरा रे लोकां रियां प्राथनां इयां।

⁹कने सै ये नया गीत गाणे लगे भई, “तू इसा कताबा जो लेणे, कने इस रियां सीलां खोलणे लायक आ; काँह्भई तैं बध हुईने अपणे खून्ना ने हरेक कुल़, भाषा, लोक कने जातियां चते परमेशरा खातर लोकां जो खरीदी लरा,

¹⁰कने तैं तिन्हाजो राजा बणाईरा कने अहांरे परमेशरा री सेवा रे खातर याजकां जो बणाईरा; कने तिन्हां धरतिया पर राज करना।”

¹¹फेरी मैं देख्या, तां तिस संघासणा कने तिन्हां प्राणियां कने तिन्हां प्राचीनां रे चऊँ पासयां बौहत सारे स्वर्गदूतां री अवाज़ सुणी, तिन्हांरी गिणती जे लखां कने करोड़ां च थी।

¹²तिन्हें ऊच्चिया अवाज़ा च गाया, “बध कित्तिरा मेमना इ सामर्थ, धन, ज्ञान, शक्ति, आदर, महिमा कने स्तुति रे लायक आ।”

¹³फेरी मैं स्वर्गा च कने धरतिया पर कने धरतिया रे थल्ले कने समुद्रा रियां सब बणाई रियां चिज़ां जो, कने सब्बीं किजि जो सै जे तिस चा, ये गान्दे हुये सुणया, “सै जे संघासणा पर बैठिरा, तिसरा कने मेमने री स्तुति, आदर, महिमा कने राज युगां-युगां तक रौ!”

¹⁴फेरी चऊँ जिऊंदे प्राणियें आमीन बोल्या, कने प्राचीनें धरतिया पर मुँआं रे भार पैईने अराधना कित्ती।