Read Bilaspuri प्रकाशितवाक्य 7 Bible Online

प्रकाशितवाक्य 7 - Bilaspuri bible

प्रकाशितवाक्य 7

¹इसते बाद मैं चार स्वर्गदूतां जो धरतिया रे चऊँ कुणयां पर खढ़िरे देख्या, सै धरतिया रियां चऊँ हवां जो थम्मीरे थे ताकि धरती, समुद्र या किसी डाल़ा पर हवा नीं चलो।

²फेरी मैं इक होर स्वर्गदूता जो जिऊंदा परमेशरा री सील लेईने पूरब ते ऊपर औन्दे देख्या। तिने तिन्हां चऊँ स्वर्गदूतां ने ऊच्चिया अवाज़ा च गलाया, तिन्हौं जे धरती कने समुद्रा रा नुक्शान करने रा अधिकार दित्या गया था,

³“तदुआं तका जे अहें अपणे परमेशरा रे दास्सां रे मत्थे पर सील नीं लाई लेईये, तदुआं तक धरती कने समुद्र कने डाल़ां रा नुक्शान नीं करना।”

⁴तिन्हां पर जे सील लाईती, मैं तिन्हांरी गिणती सुणी, भई इस्राएल रियां सन्तानां रे सब्बीं गोत्रा चते इक लाख चौताली हज़ार पर मोहर लाई गई:

⁵यहूदा रे गोत्रा चते बारा हज़ार पर मोहर लाई गई; रूबेना रे गोत्रा चते बारा हज़ार पर, कने गादा रे गोत्रा चते बारा हज़ार पर मोहर लाई गई,

⁶अशेर रे गोत्रा चते बारा हज़ार पर, नप्ताली रे गोत्रा चते बारा हज़ार पर, मनश्शे रे गोत्रा चते बारा हज़ार पर,

⁷शमौन रे गोत्रा चते बारा हज़ार पर, लेवी रे गोत्रा चते बारा हज़ार पर, इस्साकार रे गोत्रा चते बारा हज़ार पर,

⁸जबूलून रे गोत्रा चते बारा हज़ार पर, यूसुफ रे गोत्रा चते बारा हज़ार पर, कने बिन्यामीना रे गोत्रा चते बारा हज़ार पर सील लाई गई।

⁹इन्हां गल्लां रे बाद मैं हर इक जाति, कने कुल़, कने लोक, कने भाषा चते इक येढ़ि बड्डी भीड़ देक्खी, तिसाजो जे कोई गिणी नीं सकदा था। सै चिट्टे कपड़े पैहनीने कने अपणे हत्थां च खजूरा रियां डाल़ियां लेईरी संघासणा रे सामणे कने मेमने रे सामणे खढ़िरे;

¹⁰ये लोक ऊच्चिया अवाज़ च पुकारदे हुये गलाया राँये : “संघासणा पर बराजमान अहांरे परमेशर कने मेमने री जय-जयकार हो, काँह्भई इन्हांते इ अहांरा छुटकारा!”

¹¹कने सारे स्वर्गदूत, तिस संघासणा, कने प्राचीनां कने चऊँ जिऊंदेयां प्राणियां रे चऊँ पसयां खढ़िरे थे, सै सारे संघासणा रे सामणे धरतिया पर अपणे मुँआं रे भार पैईगे कने ये बोलदे हुये परमेशरा री अराधना कित्ती,

¹²“आमीन! अहांरे परमेशरा री स्तुति, महिमा, ज्ञान, धन्यवाद, आदर, सामर्थ कने शक्ति युगां-युगां तक बणीरी रौ। आमीन!”

¹³इस पर प्राचीनां चते इक्की मेरते पुच्छया, “ये चिट्टे कपड़े पैहनीरे लोक कुण ये? कने किति ते आईरे?”

¹⁴मैं तिसजो जबाब दित्या, “हे स्वामी, हऊँ नीं जाणदा, पर तूई जाणाँ।” तिने मेरने गलाया, ये सै लोक ये, सै जे तिस बड़े दुखा ते निकल़ीने आईरे; इन्हें अपणे कपड़े मेमने रे खून्ना ने धोईने चिट्टे कित्तिरे।

¹⁵इस वजह ते “ये परमेशरा रे संघासणा रे सामणे, कने तिसरे मन्दरा च दिन-रात तिसरी सेवा कराँ ये; कने सै जे संघासणा पर बैठिरा, तिस तिन्हां परा अपणे तम्बू ताणने।

¹⁶फेरी सै कदीं भुक्खे कने प्यासे नीं हुणे; सूरज कदीं तिन्हाजो जल़ाई नीं पांगा, कने नां कोई भयंकर गर्मी।

¹⁷काँह्भई मेमना सै जे संघासणा रे बिच आ, तिन्हांरी रखवाली करगा; कने तिस तिन्हांजो जिन्दगी देणे औल़े पाणिये रे सोते ला लेई जाया करना। कने परमेशरा तिन्हांरी आक्खीं ते सारे आँसू पुंजी देणे।”