Read Bilua Matiu 11 Bible Online

Matiu 11 - Bilua bible

Matiu 11

¹Ni vo Jisu ta o paikake kai pesipesito koa voko nianiiekato o ṉaviko toni omuqa disaipeli madu kasi, ni vota o vaekake koa zae, ni ota olake nianiiekatole ni bazubazutole Qalili zavaṉa poso kale.

²Ni vo Jone Bapitaiso ta pirito pade kale obeta eva keru nio vota o viqake Karisito ko aqasiele ama iruruputo ni vota o soroekake omuqa voko disaipeli kidi vokasi,

³ni nioqata eri kiqolake, “Jisu, ṉota bazueṉela eṉe, ṉo inio voa maba ṉa Jone o kaseveni vo eri va kioveni, mainio kala opa kilou va kioveni, kio? Ma eṉeta mata ṉe darevou kala edolola?” kiqolake.

⁴Ni vo Jisu ta o kati tiorikake nioqa ni eri kiolake, “Qeta vaitoko ni bazuevoko vo Jone ko quli qeqe viqako ni qe keako quli,

⁵se leqa kamu ta keta keazata, ni se raiqo amu ta keta talia, ni se pokupoku amu ta keta urika, ni se qiqili amu ta keta viqaviqazata, ni se voumu ta mata ke tova saeva, ni ko Uri ama Bazu ta ko kaseiva se olaquamu kasi. Ako aṉa inio a erekani lala ko quli.

⁶Ni qeta qe bazuevou vo Jone, voa maba vo pui niuniala olai evani aṉa ta maurumauru ala!”[12] kiolake.

⁷Ni vo Jone o soroekeni nioqa qo vaeva keru vo Jisu inio Jisu ta ovai bazubazutake vo Jone koa matuma vaki kasi, ni eri kiolake, “So keru meme qeve keru lealea kama zaekale viqole Jone ko bazubazu ta noni ala maba inio me meba velou va kimeveni? Kala lekuleku ala maba, seulele ko leko jari ala ko ururu ko viliviliekako? Pui!

⁸Sole noni ala maba inio me meva keveni velole? Kala maba batiro ala uri ama sabosabo sala? Pui! Se soama sabosabo samu ta pui lealea kama zaekale ke evani nio melai seta raura kama maba poso ko pade kale inio ke evakoi!

⁹Bazuelomo, noni ala maba inio me meba velou va kimeveni? Kala poropita, kio? Tuvevo, vota kala poropita inio, melai vo Jone vo me mebe veveni inio matu qulepo ala kiadama poropita madu azo.

¹⁰Ako Jone inio ko kaseveni ko Tabu ama Riki ko eri kikovema, ‘Baṉara ta eri kiolake, Aṉata a joroevou aṉavo talitalio ko maba ṉoko kuleto tu oṉa inainaekou ṉoko keve.’ ”

¹¹Ni Jisu ta obeta olake pesio ni eri kiolake, “Aṉata a bazuemela me, vo Jone ta raura kala kiadama maba poso ke alilani peuru ma peuru kale, melai vo matu zara kala maba Baṉara ko lekasa puo kale ala ta ovai paloasa vo,” kiolake.[13]

¹²“Ko tanitanila kale Jone o bazubazute keru ti kobeta baroa vairutu ta koa nianiiekato vo Baṉara ko lekasa puo ko ta ke kanaekake ni keka zariake niumaeko.

¹³Se poropita madu ko riki poso ni vo Mosese ko Bazu melai ko kaseke vo Baṉara ko lekasa puo, ti kobeta baroi vo Jone ko taku kale.

¹⁴Ni meta me duvevo puekou se kikovevo, ta nea Jone inio ke kaseveni seko eri kio kale, ‘Vo Ilaija ta mata ota vaitou,’ va kikeveni.

¹⁵Meta paqumukomo ko quli meme viqako quli!

¹⁶“Se vairutu ama maba poso ta se sasa rusu ke papuani tatabarao ko zaekale jari amu inio, seke nokaemani edoloma poukale amu, ni eri kikelani,

¹⁷‘Eṉeta lula ṉe mela kelaeke me ko vivo melai meta pui meba pekaovi! Ni eṉeta ṉeqai keraovi ko mutazato ko kera melai meta pui meba ziavi!’ kikelani. Soa kaseqelo inio ke evani se maba poso aṉa ni Jone sole.

¹⁸Ako vo Jone ta o kuevi ni vota o tabutabuake voko pui kuo kale kama sailao ni vaini ko ju, nio seta eri kikelake, ‘Ziolo kovai onobata!’ va kikelake.

¹⁹Ni aṉa maba a eveni lala ta a quevi ni aṉata a quani lala kiada keru ama sailao ni a nozuekani lala ko vaini ko ju kiadama maba poso jari, nio seta eri la kikela, ‘Vemo nea maba! Vota kala olavo ala ni vaini ko ju ko nozuto ko maba, vota se takisi ke koani ni se ruqe amu vo baerebaere!’ la kikela. Melai vo Baṉara ko nianiio sama nakanakati ta sea kiadamu se ko ke ṉeamukani ke puratikako epa kale inio me qelou koko tuveano,” kiolake vo Jisu.

²⁰Ni koa matu peuru kale ama maba poso sai Jisu o erekekoi voko matu kubo aqasiele ama iruruputo ta pui ke liliziake seko ruqe kale azo, so sole Jisu ta o riqaemake se koa matu peuru kale amu ni eri ma kiolake,

²¹“Matuma tapata kio ko melai barolou mea Korazini peuru kale amu mela! Ni mata me Betiseida mu mela ko melai barolou! Ako koa aqasiele ama iruruputo koko ereima mekasi ta ko erei pui Jiu amu kasi Taea ni Saidoni peuru kale tea, koa omuqa peuru kale ama maba poso ta lulavo inio keta papu ni ke kiako ko baeke sabosabo ni kekai raibizio ko pari ke tupu topi, tu kasa ke iko seko sarueko kale azo ama lilizio.

²²Tuvevo avole aṉata a bazuemela me, titizato ko ṉaniu kale vo Baṉara ta o koqotaemelou me matuvole kokai paloasou ko Taea ni Saidoni peuru kale ke evani pui Jiu amu ke kovo ama koqotato, se pui ke keani koa aqasiele ama iruruputo ko meme qeako jari ama.

²³Ni me Keponeami peuru kale amu mela ta raura kamela ta be kimela kio, melai meta me risailou heli kale! Ako koa aqasiele ama iruruputo koko ereivake mekasi ta ko erei Sodomo amu kasi tea, koa peuru ta kobeta elo inio vairutu.

²⁴Aṉata a bazuemela me, koa matuma ṉaniu titizato ko kale ta vo Baṉara ta o matu koqotaemelou me, kokai paloasou Sodomo peuru kale amu ke kovo ama koqotato,” kiolake vo Jisu.

²⁵Nio koa taku keru inio Jisu ta eri kiolake, “Mama, au ni miduku ko Lekasa ṉa! Aṉata a qaseka aṉako uriavo ṉokasi, ako ṉota lula kasa ṉoma ika se lezumato pide amu kasi ko quli ṉo ṉoda ma mutakako se nianiiomu ni seke lezumatani.

²⁶Tuvevo Mama, ko ikio ṉoko zario tu kota so ko kalo ni ṉota ṉoqai zoleiva sole.

²⁷“Aṉavo Mama ta lula o katile aṉa kiadama nianiio ni pizato. Puliala ta olai nianiia aṉa vovo Meqora lala inio kio, melai aṉavo Mama o kiada inio olai nianiia aṉa, ni puliala ta ovai nianiia aṉavo Mama melai aṉa vovo Meqora lala inio avai nianiia vo ni sea poso aṉa vovo Meqora lala a bitoemani tu kasa a ivo vo.

²⁸Kuemo mea kiada mela aṉa kasi, meme jairokani mela meko boriko meko duki ama bouro poso, tu aṉata a qatimelo ko mamazo.

²⁹Meta lekasa puelomo aṉa, tu aṉata a nianiiekimelo me, ako aṉata a zarazaraivani lala ni inobea lala auvana kale sole, ni meta me qovou ko mamazo.

³⁰Ako aṉako nianiiekato ta pui tapata kama, ni aṉa a qatimelo ama bouro ta aukozo ama sole,” kiolake vo Jisu.