Read Bilua Matiu 13 Bible Online

Matiu 13 - Bilua bible

Matiu 13

¹Koa omadeuma ṉaniu kale inio Jisu ta o vaekake koa pade ni ota olake Qalili toupa ko keta vozavoza kale. Ni vota o papuake sai ni o nianiiekatake.

²Ni matuma vaki ta ko aramuvake vo, so sole vota ota zazuke vaka topi ni ota papuake sai ni koa matuma vaki ta ke lojoake keta kale.

³Ni vo Jisu ta omai bazuekake se matu kubo quli podepodeti kale, ni eri kiolake, “Omadeu taku inio vo sisu o risarisaekani maba ta ota olake ni o risarisaekake ko vuiti ko sisu voko kiaro kale.

⁴Ni so keru vo o risarisaeka keru koa rui kiaro kale, kama ta kota piake keve tona, ni ko okate ama bianabiana ta ko kuevake ni ko kuake koa sisu.

⁵Ni kama ta ko piake lado poro kale puliama kubo miduku sakoi. Ni koa sisu ta kapiavole kota qotupa, ako pui mota kama koa miduku sole.

⁶Melai vo ṉaniu ta o peata, ni vota o vualavualaekake koa qotuqotu ni kota kota kajaoke ako koko raki ta pui vaṉa ko ola sole.

⁷Ni kama rui ta ko piake rikosasana ko qotupakoi, ni ko rikosasana ta omadeu qotupo ko kati evake ni ko lupikake ni ko vouvaekake ko.

⁸Melai kama sisu ta ko piake uri ama miduku kale, ni kota ko uria qotupake ni ko velokake ni kota uria epamatake, ni kama koko epa ko rurururu ta omadeu paizana sisu sama, ni kama ta varimuja toni ni kama ta zouke toni sama.”

⁹Ni Jisu ta o paikake koa nianiiekato ni eri kiolake, “Meta paqumukomo ko quli meme viqako quli,” kiolake.

¹⁰Nio se disaipeli madu ta ke kuevake Jisu kasi ni ke kuimaevake vo ni eri kikelake, “Noi sole inio ṉota podepodeti kale ko kiada ṉo nianiiekima maba poso?” kikelake.

¹¹Ni Jisu ta o mati tiorikake se ni eri kiolake sekasi, “Vo Baṉara ta kasa o mela ika me voko lekasa puo ko mutamuta kama nianiio, melai vota pui opa katime koa nianiio edoloma maba poso.

¹²Ako voa maba vo lula o koani koa nianiio ta vo Baṉara ta o kativou mata kama, melai vo puliama sala ta vo Baṉara ta ota va parakikou koa silo pala nianiio kobe evako vo tona.

¹³Sokale avo inio aṉata aqai nianiiekata komia podepodeti poso sekasi ako seta ke toiritoirizata melai pulia quli ke kea, ni seta ke viqa melai pui ke patapataeka.

¹⁴So inio vo Baṉara kiovevo vo poropita Aisea ko riki kalela tuvevo ko eva, ko eri ka kiovema, ‘Nia maba poso ta ke viqa melai pulia quli ke paqumuka, ni seta ke toiritoirizata melai pui ke kea.

¹⁵Ako seko kerukeru ta kutumana ni seko taliṉa ta tibutibuli ni seko vilu ta imaimadi sole. Melai seta pui so ke kava tea seko vilu ta ko keazatou ni seko taliṉa ta ko viqaviqazatou ni seko kerukeru ta ko paqumukou ni ke titiziovou ni ke kilou aṉa kasi tu aṉata a urikimou se,’ ka kiovema.

¹⁶Melai meta me zoleilou ako meko vilu ta ko keazata sole ni meko taliṉa ta ko viqaviqazata sole.

¹⁷Melai tuvevo avole aṉata a bazuemela me, ko quli kubo poropita madu ni se Baṉara ko maba madu kekai zariovima kelo ikio meta me qea, melai seta pui kepa roveovi kelo, ni se kekai zariovima viqo ikio meta me viqa, melai seta pui kepa roveovi viqo,” kiolake.

¹⁸“Meta didielomo aṉa, ni kai nianiimo koa sisu o risarisaekani ko podepodeti.

¹⁹Koa sisu koko piako keve tona ta ko mamola puema sea maba poso seke viqani ko bazu vo Baṉara ko lekasa puo ko, melai pui ke paqumukani. Nio vo Setani ta o kueva ni ota ma ṉamuka koa bazu koko piako seko bulo kale.

²⁰Ni ko sisu koko piako lado poro kale ta ko mamola puema sea maba poso se taukavole ni zoleilo kale ke koani ko bazubazu seko didiano kale.

²¹Melai ko bazu ta pui ko matu saqora seko kerukeru kale, sole pui tu ko keuva. Nio tapata ni naqunaquto komai baroa keru koa bazu kale avo seta ke vaeka seko oqu.

²²Ni koa sisu koko piako rikosasana ko qotupakoi ta ko mamola puema seke viqani koa bazubazu melai seko riteraite kai elo komia miduku kale ama saevo ni seko roqueko ko batiro ta ko pirieka ko bazu, omadeuvo rikosasana ko pirieka ko sisu jari, so sole koa bazubazu ta pui ko rovea qotupo ni pui ko epamata.

²³Melai koa sisu koko piako uri ama miduku kale ta ko mamola puema sea maba poso seke viqani koa bazu ni ke paqumukani, ako koa bazu ta ko puratika matu kubo uri ama iruruputo seko saevo kale, omadeuvo kama koa sisu ta ko puratika omadeu paizana sisu sama rurururu, ni kama ta varimuja toni sama, ni kama ta zouke toni sisu sama rurururu.”

²⁴Vo Jisu ta o mati nianiiekikake kama pado podepodeti ni eri kiolake sekasi, “Vo Baṉara ko lekasa puo ta omadeuvo kala maba jari, vo o papakani uri ama sisu voko kiaro kale.

²⁵Melai omadeu ipu sea kiadamu ko maroṉo keru, vovo kana ta o olake ni o papaka ko rabu voko vuiti kiaro ko poro kale ni ota olake.

²⁶Ni koa papapapa ta kota qotupa ni vuiti ta kota pujomata ni ko rabu melai kota puṉaza koilo.

²⁷Ni voa maba ko nabulu madu ta ke olake vokasi ni eri kikelake, ‘Lekasa, uri ama rui ko ṉoṉo bapakema ṉoko kiaro kale, melai lai kazo inio koa rabu ko kuevani?’ kikelake.

²⁸Ni vota eri kiolake sekasi, ‘Kala aṉavo kana inio o ereka ko quli,’ kiolake. Sole seta eri kikelake vokasi, ‘Sole zarieṉela eṉe tu ṉeba rabueko koa rabu,’ kikelake.

²⁹Melai voa lekasa ta o mati tiorikake ni eri kiolake, ‘Pui, ako pui uri tu meta me rabuekou koko rabu ni koa rabu sate meta me rabueko kale sole ko vuiti.

³⁰Melai vaeka tu koa vuiti ni rabu ti omadeu koilo kobeta elo ti kobeta barolou kajoro ko taku. So keru inio aṉata a bazuemou kajoro ko maba poso tu ke rabuekou ko rabu kuleto ni ke tuboekou ni ke siqaekou, sai kazo inio ke padoekou ko vuiti ni ke vaekou modo sapera topi,’ ” kiolake.

³¹Ni vo Jisu ta mata o mati nianiiekikake mata kama pado podepodeti ni eri kiolake sekasi, “Vo Baṉara ko lekasa puo ta omadeuvo matu silo ama masitadi ore ko sisu jari, vo maba o papakako voko kiaro kale,

³²ni koko sisu ta matu mina kama komia peuru ma peuru kale ama ore ko sisu azo. Melai koko rapuko keru kota matuma papapapa kiadama papapapa azo. Ni kota matuma ore ni ko akazako biaṉabiaṉa poso ta ke ereka seko ere koko kata poso topi,” kiolake vo Jisu.

³³Ni vo Jisu ta mata omai bazubazuekake ka pado podepodeti, ni eri kiolake, “Vo Baṉara ko lekasa puo ta eri jari. Kama pado rekoreko ta ko koa kama isiti ni ko kati valuvalueka matuma baeke palava ti kobeta koiva inio koa pado ama volevole,” kiolake.[17]

³⁴Kiadama vo Jisu ko bazubazu ta okai bazutake podepodeti kale sea vaki kasi, ni puliama voko bazubazu ta podepodeti pide ama.

³⁵Vota o erekake ko quli tu vo poropita kiovevo ta tuvevo ko elou, ko eri kikovema, “Aṉata aqai pesiovou ko podepodeti so keru aṉa a besiovou keru sekasi. Ni aṉata ama kasekou ko quli puliala opa kai nianiima quli komia peuru ma peuru ko tanitanila keru azo,” kikovema.

³⁶Vo Jisu ta o vaemake sea vaki ni ota vaitake pade kasi, nio o ṉaviko disaipeli madu ta kevai kuevake vo ni eri kikelake, “Ṉelai bazubazueka koa podepodeti rabu kiaro kale ama ko kalo.”

³⁷Nio vo Jisu ta eri kiolake sekasi, “Voa maba vo o papakani uri ama rui ta vo inio vo maba o eveni.

³⁸Ni ko kiaro ta ko mamola pueka komia peuru ma peuru, ni ko uri ama rui ta sea maba poso vo Baṉara ko lekasa puo kale amu, ni ko rabu ta ko mamola puema se maba poso seke luluekani vo Setani ko vatolo.

³⁹Ni vo kana, vo o papakani ko rabu, ta vo inio o mamola pueva vo Setani, ni koa kajoro ko taku ta ko mamola pueka komia peuru ma peuru ko paitopaito ko taku, ni se kajoro ko maba madu ta ke mamola puema se mateana madu.

⁴⁰Ni ko rabu koko tuboivako ni ko siqaivako uza kale ta so jari inio tovatovama ṉaniu ko kalo avo.

⁴¹Ni vo maba o eveni ta o soroemou voko mateana madu tu seta omadeu saqorimo kepa elou Baṉara ko lekasa puo kale azo, sea kiadamu seke zolizoliemani se maba poso tu ke sarueko ni mata sea kiadamu seke erekani ko ruqe ama quli,

⁴²ni seta ke risaemou se heli ko uza kale, sai seke zialoa koi, ni sai taka ke roinaroinaekoa koi.

⁴³Ni vo Baṉara ko maba madu ta ke simanamanatou ṉaniu jari sevo Mama ko lekasa puo kale. Meta paqumukomo ko quli meme viqako quli!” kiolake vo Jisu.

⁴⁴“Vo Baṉara ko lekasa puo ta eri jari. Kala maba ta o kati inota kama mutamuta kama batiro miduku kale, ni vota mata o tova boutaeka melai vota ota matu zoleiva so sole vota ota olake tu kai tatabaraole kiadama voko lomaloma, ni o vaitake ni opa tatabaraekake koa miduku.

⁴⁵“Vo Baṉara ko lekasa puo ta mata eri jari. Kala maba ta o vailika kama bulebule ama jiku,

⁴⁶ni vota o kati inota ka pado matu bulebule ama ni vota ota olake ni okai tatabaraovake kiadama voko lomaloma, sai kazo inio o tatabaraeka koa jiku. Omadeuvo so jari nio kota ko male tu ṉamuko kiadama quli Baṉara ko lekasa puo kai amaqeo kale.

⁴⁷“Vo Baṉara ko lekasa puo ta mata eri jari. Kake se abu ko maba madu ta ke risaeka seko saru ivere kale ni ke koa kubo azaazama niuniu poso.

⁴⁸Ni so keru koa saru ko reina keru inio seta ke rajaeka ko keta kale, ni sai nio seta ke papua ni ke pitoeka koa niuniu. Koko uri ama ta keta ka teamuka suakao kale melai koko ruqe ama ta keta ka ṉamuka.

⁴⁹Ni so jari pado inio ko kalo avo komia peuru ma peuru ko paitopaito keru. Vo Baṉara ko mateana madu ta ke kilou ni ke pitasimou se ruqe amu sidopu amu kasi azo.

⁵⁰Ni se ruqe amu ta ke risaemou heli kale, sai seke zialoa koi ni taka ke roinaroinaekoa koi.”

⁵¹Ni vo Jisu ta o kuimaemake voko disaipeli madu ni eri kiolake sekasi, “Mebe paqumuka ko ikio komia nianiiekato kio?” kiolake, ni seta ke vati tiorikake ni eri kikelake, “Zio.”

⁵²Nio Jisu ta mata eri kiolake sekasi, “So inio kiadamu vo Mosese ko Bazu ko nianiiekato ko maba poso se kekai nianiiani ko vairu ama nianiiekato vo Baṉara ko lekasa puo ko, ta vo pade sala jari vo o saqorikani voko lomaloma vairu ama ni tana kama voko lomaloma o tukiekakoi kazo.”

⁵³Nio vo Jisu ta o paikake mai bazubazueko koa podepodeti poso, ni vota o vaekake koa zae,

⁵⁴ni vota ota vaitake o ṉaviko ṉisa peuru kale Nazareti. Sai nio vota o nianiiekata seko ilusato ko pade kale, ni seke didievani vo ta aqasiele keva evake ni eri kikelake, “Lai nio o koa komia upo kale ama nianiio ni voko ereko komia aqasiele ama iruruputo?

⁵⁵Ako nei ta vo kamada vo meqora inio ni Mere ikio voko niania, ni Jemisi ni Josepa ni Simeoni ni Jiudasi ta voko visi poso,

⁵⁶ni voko saqi poso melai koi nio seko peuru melai. Noi nio nea maba ta o paqumuka ni o ereka koa kiadama quli?” kikelake.

⁵⁷So sole seta maba kevai kaikuapake se Nazareti amu. Melai Jisu ta eri kiolake sekasi, “Vo poropita ta keta va paṉaovou kiadama zae poso kale amu, melai seta kevai kaikuapou o ṉaviko ṉisa peuru kale amu ni o ṉaviko saidi,” kiolake.

⁵⁸So sole vota pui o erekake kubo aqasiele ama iruruputo sai Nazareti peuru kale, ako seta pui tuvevo ke ivake vo sole.