Read Bilua Matiu 15 Bible Online

Matiu 15 - Bilua bible

Matiu 15

¹Nio kake se Parese madu ni se vo Mosese ko Bazu kekai nianiiekatani seke kuevini Jerusalema azo ta ke kuevake Jisu kasi tu ke kuimaevo vo

²ni eri kikelake, “Noi sole inio ṉoko disaipeli madu ta pui ke lulueka eṉeko taite poso ke katiṉelema nianiiekato ko bazu ko keve? Ako seta pui ke uria pusaeka seko ṉase saita inio ke vuata,” kikelake.

³Melai vo Jisu ta o mati tiorikake ni eri ma kiolake se, “Ta noi sole nio me ṉavi ta pui me lulueka vo Baṉara ko bazu melai meta me lulueka me ṉaviko nianiiekato?

⁴Ako vo Baṉara ta eri kiola, ‘Ṉota taka paṉaovi ṉoko mama ni niania,’ ni ‘Vo o ruqe kaseko ala voko mama ni niania ta o vouvou.’

⁵Melai ko me meqai nianiiekatako ta eri, kala ta kama quli sala vo o roveako kai tauveko voko mama ni niania, melai vota eri kiovou, ‘Kota leveleveo a ika tu a qativou vo Baṉara,’ kiovou, ta uri tu vota pui okai tauveko voko mama ni niania, kimela.

⁶So sole meko mati nianiiekiko se maba poso me ṉaviko vikuvikula bazu kale inio meta me bazoka vo Baṉara ko Bazu.

⁷Me lipalipa kamela! Ko quli vo Baṉara ovai bazuekema vo poropita Aisea tu o rikieko mekale avo ta tuvevo ama,

⁸ko eri kikovema, ‘Nia maba poso ta ke rauraela aṉa seko pesio kale, melai seta pui ke roquela aṉa,

⁹ni seko ilusilo aṉa ta utube ama, ako seta kebe mati nianiiekika seko maba poso ke ṉavi ke erekako bazu sole, melai pui aṉa aba katimema bazu,’ kikolani.”

¹⁰Mata vo Jisu ta o nokaemake sea vaki tu ke kilo vokasi ni eri ma kiolake, “Meta didiekomo ni kai nianiimo ko eri.

¹¹Pui sailao vo maba o kuako ikio ruqe ko iva vo Baṉara ko vilu kasa, melai ko pesio koko saqorako voko suto kale azo ikio ruqe ko iva vo maba Baṉara ko vilu kasa.”

¹²Nio se disaipeli madu ta ke olake Jisu ko sipole ni eri kikelake, “Se Parese madu ta duki kekai eva ni kekai kaikuapa ṉoṉo qasekako quli.”

¹³Nio vo Jisu ta eri kiolake, “Kiadama papapapa poso aṉavo aukale ala Mama pui opa papakema ta ko rabuilou muli.

¹⁴Sole meta pui duki ma elo se, seko kai kaikuapo kale aṉako nianiiekato, ako seta leqa kamu jari, kekai zariani aveavemo mata kake leqa kamu sole. Ni kala leqa kala ta o aveavevou kala leqa kala ta nioqa kiada nioqa ti qota jourou soqili kale,” kiolake.

¹⁵Ni vo Pita ta eri kiolake, “Ṉota ṉelati nianiiekika koa podepodeti,” kiolake.

¹⁶Ni Jisu ta eri kiolake sekasi, “Me melai niuniala mebeta eva se jari, kio?

¹⁷Meta pui meqai nianiia, ta ko quli vo maba o kuako quli ta ko ola voko siapa kale ni mata ko saqora.

¹⁸Melai ko quli vo maba o rukuekako voko suto kale ta ko kuevako voko bulo kale azo ni ko quli kio kaqa ko rovea ivo vo maba Baṉara ko vilu kasa.

¹⁹Ako vo maba ko bulo kale azo inio ko saqora voko ruqe ama vatolo tu vota o vouvato ni o zavemato ni o pauvezato ni o kuilo, ni o lipalipato, ni o sekeseketato sole.

²⁰Ko quli kio kaqa kota va ikako vo maba ko saevo Baṉara ko vilu kasa, melai puliako pusailo Saita inio vuato, ta pui kaqa kopa ivou vo maba,” kiolake vo Jisu.

²¹Ni koko tova inio Jisu ni voko disaipeli madu ta ke vaekake koa zae ni keta olake Taea ni Saidoni matu peuru ko ketaketama peuru poso kale.

²²Nio kama pado rekoreko pui Jiu ama koa peuru kale ama ta ko kuevake Jisu kasi ni eri kikelake, “Tanala, ṉo Devita ko vikuvikula kalea laṉa, ṉota tauvela aṉa! Ako aṉako meqora ta ziolo kokai onobata ni kota kota matu verepa!”

²³Melai vo Jisu ta pui o kati tiorikake ko, melai obeta olake talio. Nio se kebeta talia keru inio voko disaipeli madu ta kevai olake ni ke bazuevake vo Jisu, tu vota o soroeko koa rekoreko, ako kota ko luluemake se ni kota tibaraputake sole, kikelake.

²⁴Melai vo Jisu ta eri kiolake koa reko kasi, “Aṉa inio a joroini lala Izireli mu kasi, sea mumamuma kama sipi poso jari amu kasi, seke mumaivani sevo vijaro kasi azo mumamuma kama sipi jari.”

²⁵Nio so keru inio koa rekoreko ta ko olake ni ko iqeiqeake Jisu kasi ni eri va kikolake, “Tanala, ṉota tauvela aṉa,” kikolake.

²⁶Ni vo Jisu ta o kati tiorikake ko, ni Jiu amu ta meqora o mati podetikake, ni eri kiolake kokasi, “Kuleto animeta me niaemo se meqora poso Saita. Ako pui ko male tu animeta me qovou meqora poso ko sailao ni me risaekou siele poso kasi tu ko kuovou,” kiolake.

²⁷Nio kota eri kikolake, “Tuvevo Lekasa, melai ko siele poso ta ko kua ko sailao ko vuruvuru kiada keru koko piako vo siele sala ko tevolo topi azo,” kikolake.

²⁸Ni vo Jisu ta o kati tiorikake ko ni eri kiolake kokasi, “A ṉea ṉoa rekoreko ṉa ta matuma oqu salaṉa, so sole ṉo ṉoqa zariako quli ta ko ereilou ṉokasi,” kiolake vo Jisu, ni maba koa omadeuma taku kale inio koko meqora ta kota urikake.

²⁹Ni vo Jisu ta o vaekake koa zae ni ota vaitake Qalili rana, ni ota ketainake Qalili toupa ko keta kale. Ni vota ota kailake sopu kale ni ota papuake sai.

³⁰Ni matu kubo vaki ta kevai padoivake vo seke mati kuevani seko mabamu, se lepu amu ni se raiqo amu ni poka kamu ni mata kake azaazama vere ko moani, Jisu ko tanama kale, ni Jisu ta o urikimake se.

³¹Nio sea maba poso ta keta vuzeike so keru ke mea keru se poka kamu ta keta pesiake ni se raiqo amu ta keta urikake ni se lepu amu ta keta taliake ni se leqa kamu ta keta keazakeazatake sole, ni seta ke ilusivake vo Izireli mu vo Baṉara.

³²Ni koko tova inio Jisu ta o nokaemake voko disaipeli madu tu ke zio vokasi, ni eri kiolake sekasi, “Aṉata a matu roquema nia maba poso, ako seta lula zouke ṉaniu keta eva sole anime kasi, ni vairutu seta puliama sailao samu melai aṉata pui aqa zaria soroemo se puliako niaemo, ako lekuleku ke ekale sole ke vaitou keru ke peuru poso kale,” kiolake.

³³Ni se disaipeli madu ta eri kikelake vokasi, “Lai nio animeta me qelou ko sailao komia lealea kama zaekale nio me niaemou nia vaki?” kikelake.

³⁴Nio vo Jisu ta eri kiolake sekasi, “Latau bereti kio ikoana mekasi?” Ni seta ke vati tiorikake ni eri kikelake, “Sikeura silo ama bereti ni kama niuniu,” kikelake.

³⁵Nio vo Jisu ta o bazuemake sea vaki tu ke papu miduku kale.

³⁶Ni vota opa koake koa sikeura silo ama bereti ni niuniu, ni o kati vararaitake ni uriavo o kasekake Baṉara kasi, ni o palapalamukake ni vota o katimake o disaipeli madu, ni se disaipeli madu ta ke puarikake sea maba poso kasi.

³⁷Ni sea kiadamu ta ke vuatake ni keta maqinake. Ni se disaipeli madu ta kekai sukatikake sikeura suakao koko palakiako sailao.

³⁸Ni sea kiadamu lasive poso ta ariku vuro madu melai pui kepa ataeme rekoreko ni meqora poso se sate ke vuateni, ako seko kalo ta pui ke ataemani sole rekoreko ni meqora poso.

³⁹Ni Jisu ta o soroemake nia maba poso ke peuru poso kale, nio raisiraisi vota ota zazuke vaka topi ni ota olake Maqadani peuru kale.