Read Bilua Matiu 16 Bible Online

Matiu 16 - Bilua bible

Matiu 16

¹Ni kake Parese madu ni Sadiusi madu ta ke olake Jisu kasi ni keka zariake zara ivo vo Jisu seko madoevo kale, so sole seta ke soroevake vo tu oma ereko ko aqasiele ama iruruputo, tu seta tuvevo ke iko ta vo Baṉara ta ovai zoleiva vo Jisu.

²Melai vo Jisu ta o mati tiorikake ni eri ma kiolake, “So keru ṉaniu o sulupou keru raisiraisi ni au ko dirikaitou keru meta eri kimela, ‘Lea ta matuma bule,’ kimela.

³Ni omadeu vikale meta eri kimela, ‘Mainio nioro kopa elou ako ko lei ta sibi kutukutu sole,’ kimela. Meta me rovea kai nianiio ko ururu ni nioro ako me qea sole ko lei, ta noi sole inio meta pui meqai nianiia komia taku ko mamola?

⁴Mea maba poso komia taku kalea mela ta me baseka kama aqasiele ama iruruputo, melai meta ruqea mela ni pui meqa zariani mela vai nianiio vo Baṉara! Omadeu pado aqasiele ama iruruputo ko kiada ikio me qelou, koa omadeuma vo poropita Jona kova ereima jari lulavo,” ma kiolake. Nio sai nio vota o vaemake se.

⁵Nio se disaipeli madu ta ke pakeke Qalili toupa ko ka pake, melai seta ukaka ke ike tu ke boriko kama bereti.

⁶Ni Jisu ta eri ma kiolake se, “Meta vaitomo ni taka balauvomo se Parese madu ni Sadiusi madu ko isiti,” kiolake.

⁷Ni seta ke pesipesitake ke ṉavio kude ni eri kikelake, “Animeta pui meba borikala ko bereti nio nei o mela riqaekani ko isiti,” kikelake.

⁸Melai vo Jisu ta obe kai nianiiake se kikelani, so sole vota eri ma kiolake, “Noi sole inio meta meqai pesipesita me ṉavio kude meko pui boriko ko bereti, me silo ama oqu samela?

⁹Meta pui nio me baqumuka aṉako pizato, kio? Ni lula ukaka me ika so keru aṉa a balamuke keru sike silo ama bereti ni a niaeme keru se sike vuro maba, ni latau suakao kio meme jukatikema koko palakiovima sailao?

¹⁰Ni noi nio, meta mata lula ukaka me ike ta sikeura silo ama bereti kale inio aṉata a niaeme ariku vuro maba poso, ni latau suakao kio meme jukatikema koko palakiovima sailao, kio?

¹¹So inio meta pui meqai nianiia ta aṉata pui aqai pesipesita ko bereti, melai aṉata eri nio kiala mekasi, taka balauvomo se Parese madu ni Sadiusi madu ko isiti!”

¹²Sai nio se disaipeli madu ta kekai nianiiake ta pui o mati balauvika ko isiti bereti kekai erekako melai vota o balauvima se Parese madu ni Sadiusi madu ko nianiiekato kasi azo, ako seko ruqe ama nianiiekato ta komai zaroa se maba madu omadeuvo ko isiti ta kokai zaroa jari pado ama palava.

¹³Nio vo Jisu ta ota olake voko disaipeli madu sate Sizaria Pilipai matu peuru ko ketaketa, sai nio vota o kuimaemake o disaipeli madu ni eri kiolake sekasi, “Lala lala ta bela kikela maba madu aṉa maba a eveni lala?” kiolake.

¹⁴Ni seta eri kikelake, “Kake ta Jone Bapitaiso ṉa ṉa kikela. Mata kake ta Ilaija ṉa ṉa kikela ni kake ta Jeremaea ṉa ṉa kikela. Ni mata kake ta mata kala poropita ṉa ṉa kikela,” kikelake.

¹⁵Ni vota mata o kuimaemake se ni eri kiolake, “Ta meta lala lala inio bela kimela?”

¹⁶Ni vo Saimone Pita ta o vati tiorikake ni eri kiolake, “Ṉota vo Baṉara o pitoeṉeni Pakio ṉa vo saevola Baṉara vo meqora ṉa,” kiolake.

¹⁷Nio Jisu ta o vati tiorikake vo Saimone ni eri kiolake, “Matu uri ṉo kiṉolani, Saimone, Jone vo meqora ṉa. Komia tuveano ta pui maba kasi azo ko kuevako, melai kota aṉavo Mama aukale ala o katiṉako ṉo,” kiolake vo Jisu.

¹⁸“So sole aṉata a bazueṉa ṉo, Pita, ṉoko ṉi ko kio ni kalo ta lado ikio, ni omadeuvo kala ta o orumuka voko pade lado ko vola topi, so jari nio aṉata a orumukou aṉako lotu ṉo topi, ni vou melai pui kopa niumaekou.

¹⁹Ni aṉata a qatiṉou ṉo vo Baṉara ko aukale ama lekasa puilo ko vidulu, ni ko quli ṉoṉo qaitiko ama quli miduku kale ma ko quli ṉoṉo zarieko ama quli miduku kale ta vo aukale ala Baṉara ta o ṉati tiorikou ni o ṉati vinaekou ko,” kiolake.

²⁰Ni Jisu ta piza kavole o bazuemake o disaipeli madu tu seta pui kekai bazutou maba madu kasi ta vo Jisu nio vo Baṉara o pitoeveni Pakio.

²¹Koa taku kale azo inio Jisu ta o taniekake mai uria bazubazueko o disaipeli madu voko talio, ni eri kiolake, “Aṉata a ziovou Jerusalema ni sai nio aṉata ke tolaelou kubo quli kale se lotu tanatanamu ni se raura kama siama madu ni Mosese ko Bazu kekai nianiiekatani. Ni seta ke vouvaelou aṉa, melai zouke ala ṉaniu kale inio aṉata mata a jaevou,” kiolake.

²²Nio vo Pita ta o vati edoliake vo Jisu ni eria riqaevo o evake, “Lekasa, Baṉara ta pui opa zariekou komi quli tu ko ereilo ṉokasi!” kiolake.

²³Nio Jisu ta o vati lilitake vo Pita ni eri va kiolake, “Ose Setani! Aṉata so ṉa kiala ako ṉo dizaekou kiṉola sole aṉako keve. Ni koa kerukeru ta pui vo Baṉara kasi azo ko kuevako sole, melai maba kasi azo,” kiolake vo Jisu.

²⁴Nio Jisu ta eri ma kiolake voko disaipeli madu, “Vo oka zariani luluelo aṉa ta vota pui o kerukeruilou o ṉavi o kiada melai vota o tolailou aṉako luluelo kale omadeuvo vo maba vo o borikani jari o ṉaviko korosi, vo okai vouvo ama.

²⁵Ako kala vo oka zariani pakieko pala voko tupu kale ama saevo ta vota o niumaeka inio voko saevo tovama saevo kale ama, melai vo o ṉamuko ala voko tupu kale ama saevo aṉako luluelo kale ta o kovou noqola kama saevo.

²⁶Noi nio? Kala maba o ṉeamukani komia pado ama peuru ma peuru kale ama batiro melai okai suatani ko noqola kama saevo ta obe tauveziovo ala inio komia peuru ma peuru ama quli kale kio? Maba pui! Pulia quli ta opa katikou tu o kovo ko noqola kama saevo.

²⁷Ako aṉa maba a eveni lala ta mata a vaitou, aṉavo Mama ko pizato ni ṉaṉaidara sate ni aṉako mateana madu sate, ni aṉata reketekete saṉa a imou kiadamu seko iruruputo ko male tiniavo.

²⁸Ni aṉata a bazuemela me, kake mela me koi mebeta evani mela ta puliako me vou inio meta me lelou aṉa maba a eveni lala ta a qilou ni a lekasa puilou komia peuru ma peuru kale,” kiolake vo Jisu.