Read Bilua Matiu 19 Bible Online

Matiu 19 - Bilua bible

Matiu 19

¹Nio vo Jisu ta o paikake voko bazubazuto, ni vota o vaekake Qalili rana ni ota olake Jiudia rana Jodani sukuru koa pake.

²Nio matuma vaki ta ko luluevake vo, ni vota o urikimake se vere amu koa vaki kale amu.

³Ni kake se Parese madu ta ke olake Jisu kasi tu zara ke ivo seko madoevo kale, ni eri kikelake, “Animeko Bazu kale vo Mosese o katimelema ta zarizari ama tu kala ta o vaekou voko reko kama kalo poso kale?” kikelake.

⁴Nio Jisu ta o mati tiorikake ni eri ma kiolake se, “Meta pui me ataekako ikio ko Tabu ama Riki kikovevo, kio? Ko eri kikovema, koko tanitanila kale inio vo Baṉara ta o ereke ko maba lasive ala ni reko ama kikovema.

⁵Ni vo Baṉara ta mata eri kiolake, ‘Sokale avo inio vo maba ta o vaekou voko mama ni niania ni omadeu o kati elou voko reko ni nioqata omadeu qo elou,’ kiolake.

⁶Sole nioqata pui omuqa, melai omadeu. So sole nioqa vo Baṉara omadeu o ikeni nioqa ta pui ko male tu maba ta o pitasiko,” ma kiolake vo Jisu.

⁷Melai se Parese madu ta mata eri kikelake Jisu kasi, “So ko kalou ta noi sole inio vo Mosese ta o katimele anime ko Bazu ko eri kikelako, kala ta o katikou voko reko vaekinio ko pepa ti obe soroekou inio koa reko?” kikelake.

⁸Nio vo Jisu ta o mati tiorikake se ni eri ma kiolake, “Vo Mosese ta o zariemele me tu meta me vaemou meko reko poso ako meko bulo ta zokele sole, melai kota pui so kopa kaema ikio ko tanitanila kale, so keru vo Baṉara o ereke keru ko maba.

⁹So sole aṉata a bazuemela me, kala ta o butuekou voko reko, melai koa reko ta pulia quli ko pauvekako ikio, ni vota mata o tova rorotou, ta ota zavemata inio,” kiolake.

¹⁰Nio voko disaipeli madu ta eri kikelake vokasi, “Ni koa saevo ta so kobeta kalou ta uri tu lasive amu ni reko amu ta pui ke rorotou,” kikelake.

¹¹Nio Jisu ta mata eri kiolake, “Komia nianiiekato ta pui kiadamu ke roveako ikio lulueko, melai se vo Baṉara o katimeni pala inio.

¹²Ako matu kubo kalo kale inio vo maba ta pui o rorotani, kake ta soa alilo keta eve, kake ta maba ikio soa eremo ke eva, melai kake ta pui ke rorota vo Baṉara ko lekasa puo ka nabulupute kale avo sole. So sole me roveovoa mela lulueko komia nianiiekato ta luluekomo!” kiolake vo Jisu.

¹³Nio kake maba poso ta ke mati olake seko meqora poso Jisu kasi tu vota oma iviko voko ṉase ni o mati vararaito se, melai se disaipeli madu ta ke riqaemake se.

¹⁴Melai Jisu ta eri kiolake sekasi, “Meta pui kaitimo se meqora poso tu ke kilo aṉa kasi, ako se maba poso nia sasa rusu jari ke kalo amu nio ke ṉeamukou vo Baṉara ko lekasa puo kale ama mauruto sole,” kiolake.

¹⁵Nio Jisu ta oma ivikake voko ṉase ni mauru o imake se ni o mati vararaitake se. Ni koko tova inio o vaemake.

¹⁶Ni omadeu taku kale inio kala maba ta o kuevake Jisu kasi ni eri kiolake, “Tanala, loma uri ama iruruputo a erekou nio vo Baṉara ta o katilou aṉa ko noqola kama saevo?” kiolake.

¹⁷Nio Jisu ta o vati tiorikake ni eri va kiolake, “Ṉota pui ṉo quimaelou aṉa loma uri ama quli kio ṉo erekou. Puliala inio uri ala melai vo Baṉara o kiada. Ṉota zorika Baṉara ko Bazu nio ṉo qovou ko noqola kama saevo,” kiolake vo Jisu.

¹⁸Nio voa maba ta eri kiolake “Loma bazu ikio?” kiolake. Nio Jisu ta o vati tiorikake ni eri va kiolake, “Eri nio koa Bazu. Ṉota pui ṉo vouvatou, ṉota pui ṉo zavematou, ṉota pui ṉovai kuirikou kala lipalipa kama quli,

¹⁹ṉota ṉoda ka paṉaovou ṉoko mama ni niania, ni ṉota ṉo roquevou ṉovo lolo ṉo ṉavi ṉo roquiva jari,” kiolake vo Jisu.

²⁰Melai voa vairu ala maba ta o vati tiorikake vo Jisu ni eri kiolake. “Aṉata a zorikako ikio koa kiadama bazubazu poso, sole loma ikio ikoana tu aṉata a ereko?” kiolake voa vairu ala maba.

²¹Nio Jisu ta o vati tiorikake, ni eri va kiolake, “Ṉota ṉoqai zaria matu uri ama maba ṉa elo, sole ola tu pa kai tatabaraovi kiadama ṉoko lomaloma, ni ṉota ṉo qatimou koko takula se ozaoza kamu, inio ṉota batiro saṉa ṉo elou Baṉara kasi. Saita inio ṉo luluelou aṉa,” kiolake.

²²Melai voa maba ta matu batiro ala, sole so keru vo o viqa keru koa pesio vota matu duki ota evake, ni o vaevake vo Jisu.

²³Nio Jisu ta eri kiolake voko disaipeli madu kasi, “Aṉata a bazuemela me, matu tapata tu se batiro ama maba poso ta kekai amaqeo vo Baṉara ko lekasa puo.

²⁴Ni mata eri kiala mekasi, koko tapata tu vo batiro ala maba ta o amaqeo Baṉara ko lekasa puo kale ta kokai paloasa koko tapata tu kala kameli ta o amaqeo nila ko purapura kale,” kiolake.

²⁵So keru se disaipeli madu ke viqa keru ko quli seta keta matu ti mati vuzeike ni eri kikelake, “Sole lala inio vo o roveovo ala pakio?” kikelake.

²⁶Nio vo Jisu ta o toiritoirimake se ni eri ma kiolake, “Maba ta pui opa pakiovou o ṉavi melai Baṉara inio o pakievou vo, ako Baṉara o kiada inio o roveani sole ereko kiadama quli,” kiolake.

²⁷Ni Pita ta o kuimaevake vo Jisu ni eri kiolake, “Noi nio eṉe, ṉoko disaipeli madu ṉela, ako eṉeta lula ṉe vaeke eṉeko kiadama quli tu ṉe lulueṉo ṉo, sole loma uri ama quli kio ko ṉela ereilou eṉe?” kiolake.

²⁸Nio vo Jisu ta eri kiolake sekasi, “Aṉata a bazuemela me, tovama ṉaniu kale aṉa maba a eveni lala a bapuvou keru aṉako ṉaṉaidara kama lekasa puo ko papupapu topi nio me aṉako toni omuqa lulupato ko maba poso mela melai me bapuvou aṉa sate me ṉaviko papupapu topi, ni mema lekasa puovou koa toni omuqa toutou Izireli.

²⁹Ni kala ta o vaekou voko pade ni voko tamania poso ni voko mama ni niania ni voko meqora poso ni voko miduku tu o luluelo aṉa, ta vo Baṉara ta ova besiekou vo omadeu paizana vole ni mata o kativou ko noqola kama saevo.

³⁰Melai matu kubo madu raura kamu erisaṉa ta mainio zara kepa elou ko kilo ama taku kale, ni se zara kamu inio mainio raura kepa elou koa taku kale,” kiolake vo Jisu.