Read Bilua Matiu 20 Bible Online

Matiu 20 - Bilua bible

Matiu 20

¹Nio vo Jisu ta mata eri kiolake sekasi, “Vo Baṉara ko lekasa puo ta eri. Kala tanala ta o lekoa omadeu vikale tu o vailimo kake maba poso, tu ke iruruputo voko vaini kiaro kale. Ni vota o meake kake.

²Ni vota o tabarimou se, maba poso ke koako omadeu ṉaniu ama reketekete kale, ni vota o soroemake tu kepa iruruputo koa vaini kiaro kale.

³“Nio siakava koloko kale vikale mata nea tanala ta o olake maketi kasi, sai maba poso ke padoivakoi, ni mata o meake kake maba poso se puliama iruruputo samu.

⁴Sole vota o soroemake se tu seta kepa iruruputo voko vaini kiaro kale ni vota o tabarimou se koko male ama tabara kale, ni seta keta olake iruruputole.

⁵“Nio toni omuqa koloko kale ṉadale ni mata zouke koloko kale raisiraisi nea tanala ta o erekake koa omadeuma kalo, o vailima maba poso tu ke iruruputo voko kiaro kale.

⁶“Sipole sike koloko tiniavo raisiraisi inio vota mata o olake maketi ko zaekale ni vota o meake kake maba poso, ni eri ma kiolake, ‘Noi sole inio meta me niumaeka ko taku koi pulia quli me ereka?’ kiolake.

⁷Nio seta ke vati tiorikake ni eri kikelake, ‘Puliala o ṉelai zaria tu eṉeta ṉe iruruputo sole,’ kikelake, so sole vota o soroemake tu kepa iruruputo koa vaini kiaro kale.

⁸“Sipole ṉaniu o sulupou kiola keru inio nea vaini kiaro ko tanala ta o bazuevake vovo iruruputo maba ko kuleto ala tu vota o odiemou seke iruruputani tu o tabarimo se. Nio vo o tabarima keru vota o taniekake tabarimo se tova ke taniteni iruruputo kasi azo ti obeta baroake se kuleto ke iruruputeni kasi.

⁹Ni vota o tabarimake se sike koloko raisiraisi ke taniteni iruruputo, ni o katimake pado ama ṉaniu ko iruruputo ko male ama reketekete.

¹⁰Nio mata voa tanala ta o tabarimake se toni omuqa koloko ni zouke koloko ni varimuja koloko ke taniteni. Nio se varimuja koloko kale vikale ke taniteni ko kerukeru kale ta seta ke kovou raura kama tabara, melai so keru vo o katima keru koa tabara ta se melai koa omadeuma reketekete ko kiada.

¹¹Ni seta ke koake koa takula, ni ke taniekake vai ṉuruṉuruo vo vaini kiaro ko tanala,

¹²ni eri va kikelake, ‘Koe! Nia maba poso se tova ke iruruputalani ta omadeu aoa ko kiada ikio seko iruruputo. Melai eṉeta komia pado ama ṉaniu vualavuala kama ṉaniu kale ṉe iruruputa melai eṉea kiada ṉela ko tabara ta omadeuvo,’ va kikelake.

¹³“Nio voa kiaro ko tanala ta eri kiolake kala kasi, se azo, ‘Lolo, aṉata pui a ubeubeṉa ṉo, ako ṉota ṉo ṉavi nio ṉo vinaeke koa omadeu ṉaniu ama iruruputo ko male ama tabara sole, kive?

¹⁴Tu koa ṉoko tabara ni ola ṉo bade kasi, ako aṉa inio koko raki sole nio a qativa koa omadeuma tabara vo ṉoko tova o tanitalani iruruputo.

¹⁵Ako a ṉavi nio koko pizato salala sole tu aṉa iko avo a ikou aṉako takula sole ṉota pui ṉo qonoilou,’ kiolake nea tanala.”

¹⁶Nio vo Jisu ta mata eri kiolake sea vaki kasi, “So inio matu kubo madu raura kamu erisaṉa ta mainio zara kepa elou ko kilo ama taku kale, ni se zara kamu inio mainio raura kepa elou koa taku kale,” kiolake.

¹⁷Ni Jisu ni voko toni omuqa disaipeli madu ta keta kailake Jerusalema, nio seko talio kale vota o mati edoliake voko disaipeli madu ke kiadakoi, ni eri kiolake,

¹⁸“Meta didielomo aṉa. Animeta meda kaila inio Jerusalema ni sai nio seta ke vaelou aṉa maba a eveni lala raura kama siama madu ni Mosese ko Bazu kekai nianiiekatani ko ṉase topi, tu seta ke titizilo tu a vou.

¹⁹Nio seta mata ke lati ziovou aṉa se pui Jiu amu kasi tu seta kelai balebaleitou ni ke sisiparuelou ni ke patoelou korosi topi. Melai zouke ala ṉaniu kale inio mata ada tova saevou,” kiolake vo Jisu.

²⁰Ni vo Zebeti ko reko ni koko meqora kidi Jemisi ni Jone ta ke olake Jisu kasi, ni koa reko ta ko iqeiqeake Jisu ko tanama kale, ni kovai zaivotake vo.

²¹Nio Jisu ta o kuimaekake koa reko, ni eri kiolake, “Loma quli kio ṉota ṉoqai zaria?” kiolake. Nio kota ko vati tiorikake ni eri kikolake, “So keru ṉo lekasa ṉo elou keru, aṉata aqa zaria tu ṉota ṉo zariekou nioqi aṉako meqora kidi ta qo papuvou ṉo sate, kala ta ṉoko palo rana ni kala ta ṉoko made rana,” kikolake.

²²Ni Jisu ta eri ka kiolake nioqa tamania, “Qeta pui qekai nianiia ko quli qeqe pasekako quli. Ma qeta inaina kaqela inio tu qe tolailou aṉa sate kio?” Nio nioqata qo vati tiorikake ni eri kiqolake, “Eqeta inaina kaqela tu qe tolailo ṉo sase,” kiqolake.

²³Nio Jisu ta o kati tiorikake nioqa ni eri kiolake, “Tuvevo qeta roveovou aṉa jaria tolailo elo, melai aṉata puliama pizato tu a zarieqelo qe tu qe papuvou aṉako palo ni made rana. Ako koa zae ta vo Baṉara inio o katimou se oma inainaekani,” kiolake.

²⁴Nio koko tova so keru sea toni disaipeli ke viqa keru koa paseto seta kekai matu korakoraivake nioqa tamania.

²⁵Nio Jisu ta o odiemake sea kiadamu o ṉavi kasi ni vota eri ma kiolake, “Meta memai nianiia komia peuru ma peuru kale ama aikovakova poso, seta kema raurarauraiva seko maba madu, ni sea lekasa poso melai ke zuruzuruema seko maba poso tu ke lulueko seko vatolo kikolani.

²⁶Melai meta pui so me qalou me navio kude, ako vo oka zariovo ala raura elo mekasi azo ta kiada mela vo nabulu o elou nio vota raura o elou.

²⁷Ni kala me azo ta oka zariovou kuleto elo ta kiada mela vo mabaku o elou nio kuleto o elou sole.

²⁸Omadeuvo jari aṉa maba a eveni lala ta pui aba kuevi tu maba poso ta kela iruruputo, melai aṉata a quevi tu aṉa inio nabulu ama elo maba poso, ni aṉata ama vouvou tu a bakiemou se,” kiolake vo Jisu.

²⁹Ni Jisu ni voko disaipeli madu ta ke vaekake Jeriko matu peuru, nio matu kubo vaki ta ke luluemake se.

³⁰Ni omuqa leqa kanioqa qopeta papuani nioqa keve ketaketa ta qo viqake Jisu ko alokato koa keve tona ni nioqata qo taniekake nokao ni eri kiqolake, “Vo Devita ko vikuvikula kalea laṉa, ṉota roqueqela eqe!” kiqolake.

³¹Melai sea vaki ta ke riqaekake nioqa tu qo moizailo kikelake. Melai so keru inio nioqata qo naizatikake nokao ni mata eri kiqolake, “Devita ko vikuvikula kalea laṉa, ṉota roqueqela eqe!” kiqolake.

³²Nio vo Jisu ta o dokolake ni o nokaekake nioqa ni eri kiolake, “Loma ikio qekai zaria tu aṉata a qela ereko qe?” kiolake.

³³Nio nioqata qo vati tiorikake ni eri kiqolake, “Lekasa, eqeta qeka zaria keazato,” kiqolake.

³⁴Nio vo Jisu ta o matu roquekake nioqa ni ota ka kamakake nioqako vilu ni maba koa taku kale inio nioqata qota roveake kelokelozato. Ni nioqata qo luluevake vo Jisu.