Read Bilua Matiu 21 Bible Online

Matiu 21 - Bilua bible

Matiu 21

¹Ni Jisu ni voko disaipeli madu ta kebeta taliake keve tona, ni sipole kebe baro Jerusalema kikela keru, inio seta ke baroake Betipeji sasa peuru Olive Ore sama Sopu ko ketaketa. Nio Jisu ta o soroekake omuqa voko disaipeli kidi tu qopeta zio seko kuleto vasi.

²Ni puliako vo soroeko nioqa vota eri kiolake, “Qeta olako ukoa peuru kale ni qeta qe kelou kama doqi kobeta lojoa ke titiekema barabara topi ni koko meqora. Qeta qe rupasikou ni qe kati kilou koa doqi ni koko meqora aṉa kasi.

³Ni kala ta o kuimaeqelou qe ni eri kiovou, ‘Noi sole inio qeta qe rupasika koa doqi?’ kiovou, nio qeta eri kiqevou, ‘Animevo Lekasa inio oka zaria,’ kiqevou, ti vota obe qela zariekou nio koa doqi,” kiolake.

⁴Ko quli ta ko ereivake tu vo Baṉara kiovevo kala poropita kasi ta tuvevo ko elo ko eri ka kiovema,

⁵“Meta bazuemomo Jerusalema peuru kale amu, keatini, mevo aikovakova ta obeta kueva mekasi, ni vota matu zarazarailo ala ni obeta talia doqi kale, ka pado doqi vo meqora kale.”

⁶Nio nioqa omuqa disaipeli ta qo olake ni qopa erekake Jisu kati kiolani.

⁷Nio nioqa omuqa disaipeli ta qo kati olake koa doqi ni koko meqora, ni qo saluekake nioqako suma koa omuqa doqi ko momo topi ni vo Jisu ta o papuake sai.

⁸Ni matu kubo vaki ta ke ivikake seko topi ama sabosabo ni ke saluekake ko keve tona, ni kake ta ke kobuekake ore ko kata ni ke saluekake keve tona.

⁹Nio so keru inio se maba poso seke taliani Jisu ko kuleto ni voko tova ta ke velavelaoke ni eri kikelake, “Me ilusivo nea Devita ko vikuvikula kale ala! Baṉara ta mauru o ivou vo o kuevani voko ṉikale! Ilusivomo vo Baṉara!” kikelake.

¹⁰Nio so keru vo Jisu o amaqea keru Jerusalema, kiadama maba poso koa matu peuru kale amu ta ke rereake tu kepa velo lala inio voa maba o kuevani, ni keta matu tibaraputake, ni keta kuimaekiniake ke ṉavio kude, ni eri kikelake, “Lala inio nea maba?” kikelake,

¹¹Nio sea vaki seke kuevini Jisu sase ta eri kikelake, “Nei ta poropita Jisu inio Nazareti peuru Qalili tanala,” kikelake.

¹²Ni vo Jisu ta o amaqeake Jelepade kale ni o butuemake sea kiadamu sai kekai tatabaraekiniani ko lomaloma ni vota o mati raibiraibikake seko tevolo sai kekai tatabaraovakoi ko kurou.

¹³Nio vota eri ma kiolake se, “Kota ko rikiziovi Tabu ama Riki kale ko eri ka kiovema vo Baṉara, ‘Aṉako Jelepade ta vararaito ko pade ka kikevou,’ melai meta se kuilokuilo amu kekai mutaivako keaka jari meda va ika!” kiolake vo Jisu.

¹⁴Koko tova inio se leqa kamu ni se lepu amu ta ke olake Jisu kasi koa Jelepade kale ni vota o urikimake se.

¹⁵Nio se raura kama siama madu, ni se vo Mosese ko Bazu kekai nianiiekatani ta keta matu korakoraivake so keru seke kea keru koa aqasiele ama iruruputo vo Jisu o erekako, ni se meqora poso ko velavelao ke viqa keru koa Jelepade kale, eri kikelake, “Dusivomo vo Devita ko vikuvikula kale ala!” kikelake sole.

¹⁶Nio seta ke kuimaevake vo Jisu ni eri kikelake, “Ṉobe viqa seko ilusiṉo ni rauraeṉo ṉo, kio?” kikelake. Nio Jisu ta o mati tiorikake se ni eri kiolake, “Zio, melai meta pui me ataeka ko ikio ko Tabu ama Riki ko kasekema, ko eri kikovema, ‘Ṉota ṉo nianiiekima silosilo amu ni molele poso tu ke ilusiṉo ṉo’ kikovema?”

¹⁷Nio ko quli ko tova inio Jisu ta o vaemake se, ni o vaekake koa matu peuru Jerusalema, ni ota olake Betani, ni sai nio vota ota raneake.

¹⁸Nio omadeu vikale Jisu ta mata ota tova vaitake Jerusalema koa matu peuru kale, ni voko talio kale vota ota luapake.

¹⁹Ni vota o veake kala piqi ore koa keve ko ketaketa, ni vota ota olake tu opa tava kelo voko epa. Melai voa piqi ore ta puliama voko epa melai voko leko ko kiada ikio ota va keake, so sole vota eri va kiolake voa ore, “Ṉota pui mata ṉoba tova epamatou,” va kiolake. Nio so beva kiola keru inio voa piqi ore ta ota kajaoke.

²⁰Nio so keru se disaipeli madu, ke talini Jisu sate, ke kea keru ko quli, seta keta matu vuzeike ni eri va kikelake, “Loma quli kio nea piqi ore ko kajaekivala?” kikelake.

²¹Nio vo Jisu ta o mati tiorikake ni eri kiolake, “Aṉata a bazuemela me, meta tuvevo putomo ni pui niuniala elo nio meta me roveovou ereko aṉa a erekako iruruputo jari ama nea piqi ore kasi. Ni pui koko kiada melai meta eri kimevou koa sopu kasi, ‘Zolai ni piave ivere kale!’ ni kota so ko kalou.

²²So sole meta me duvevo putou nio meta me qovou ko quli meme basekako quli meko vararaito kale,” kiolake vo Jisu.

²³Ni Jisu ta mata ota vaitake Jelepade kale ni vota o nianiiekimake se maba poso. Sai nio se raura kama siama madu ni se lotu tanamu ta ke olake ni ke kuimaevake vo Jisu, ni eri kikelake, “Lala inio o zarieṉa inio ṉota ṉo ereka komi quli, ni lala inio o katiṉa ṉo koa pizato?” kikelake.

²⁴Nio vo Jisu ta o mati tiorikake ni eri ma kiolake se, “Aṉa melai aqa zaria melai kuimaeko me kama pado kuimanao, ni meta mela opatikou koa kuimanao inio aṉa melai a bazuemelou lala ko pizato kale inio aṉata a ereka komia iruruputo.

²⁵Sole lala inio o kativake vo Jone koa pizato, inio vota bapitaiso o imake se maba poso. Vo Baṉara inio o kative koa pizato ma maba inio?” ma kiolake. Nio seta ke taniekake zolizoliekinio ke ṉavio kude ni eri kikelake, “Ako ‘Vo Baṉara inio o kative koa pizato vo Jone’ kimevou, ta vota eri nio mela kiovou, ‘Ta noi sole inio meta pui meba tuvevo pueve vo?’ inio mela kiovou.

²⁶Ni animeta mata eri kimevou, ‘Maba inio o kative koa pizato,’ kimevou, ta meda ma balauvou se maba madu, ako seta ke tuvevo pueveni nio sole vo Jone ta kala Baṉara vo poropita,” kikelake.

²⁷So sole seta eri kikelake Jisu kasi, “Eṉeta pui ṉeqai nianiia,” kikelake. Nio Jisu ta eri ma kiolake se, “Sole aṉa melai pui aba melai bazuekou me lala ko pizato kale inio aṉata a ereka komi quli,” kiolake.

²⁸Ni Jisu ta obeta olake bazubazuto ni eri kiolake sekasi, “Nonia kerukerueko ta mebe eva ko eri? Kala maba ta omuqa meqora sala, ni vota o olake vovo kaka kala meqora kasi ni eri kiolake, ‘Meqora, ṉota ṉo ziovou vairutu ni ṉoba iruruputou vaini kiaro kale,’ kiolake.

²⁹Melai nea meqora ta ota lupaoke zio, melai koko tova vota o besiekake voko kerukeru ni ota olake iruruputole.

³⁰Nio voa mama kala ta mata o olake visi ala meqora kasi ni ovai bazuekake koa omadeuma bazu, ni nea visi ala meqora ta o uria opatikake vovo mama ko soru, melai vota pui o olake iruruputole.

³¹Sole lala pado nioqa tamania inio o zorikake nioqavo mama ko zario?” kiolake. Ni seta ke vati tiorikake ni eri kikelake, “Vo kaka kala meqora, vo o keveni iruruputole,” kikelake. Nio Jisu ta eri ma kiolake se, “Tuvevo. Sole tuvevo avole aṉata eri kiala mekasi, so inio se takisi ke koani ni seke sasave putani ta ke mela paloasa me seko amaqeo kale Baṉara ko lekasa puo kale.

³²Kota so ko kava ako meta pui tuvevo meba ive sole vo Jone Bapitaiso, vo o kuevini mela kasekole ko sidopu tu meta me erekou. Melai se takisi ke koani ni seke sasave putani inio ke tuvevo pueve, melai meta mebe keve seko kalo, melai meta pui meba besieke meko kerukeru tu me duvevo puevo vo sole,” kiolake vo Jisu.

³³Ni Jisu ta mata eri kiolake sekasi, “Meta didianomo tu aṉata mata a melai bazueko kama pado podepodeti. Inevoana kala kiaruzo ko maba vo o papakani ko vaini voko kiaro kale, ni vota o qaramukake koa kiaro ko levoano, ni vota o erekake ka pado zae vo o zuzuekoa koi ko vaini ko epa ko ju, ni o lojoevake kala okate ala pade o lovelove kaqe. Koko tova inio voa maba ta oka zariake zio vaṉama peuru kale nio vota oma zariekake koa kiaro kake maba poso, ni vota ota olake vaṉama peuru kale. Melai vota o kovou ka kena koa kiaro kale ama epa seko korotato ke erekema kale

³⁴Nio vaini ko epa ko padoeko ko taku ko baroa keru, vota o soroemake kake voko nabulu poso tu kepa kovo voko kena koa papapapa ko.

³⁵Melai sea iruruputo ko maba madu ta ke meake ni seta ke noqoemake sea nabulu poso ni kala ta ke pazovake, kala ta ke vouvaevake, kala ta ke taivake lado kale ni ke vouvaevake.

³⁶Nio koko tova voa tanala ta mata o soroemake kubo madu voko iruruputo ko maba madu kebe mai paloasa se kuleto o soroemeni, melai koa omadeuvo jari kebe imake.

³⁷Koko tovatova inio voa tanala ta o soroevake o ṉavivo meqora, ‘Ako vo inio keta va panaovo ala sole,’ kiolake.

³⁸Melai so keru se kekai iruruputani koa vaini kiaro ke vea keru voa meqora, seta eri kikelake, ‘Nei nio komia kiaro sala vo meqora, vo o besievo ala vovo mama tu kiaro ko raki ota ka elo. Ariamo tu me vouvaevo, nio komia vaini kiaro vo kovai vikuvo ama ta animeko ko elou!’

³⁹So sole seta ke noqoevake, ni ke rajarajaevake koa vaini kiaro kale azo ni ke vouvaevake,” kiolake vo Jisu.

⁴⁰Nio Jisu ta o kuimaemake sea maba poso ni eri kiolake, “Sole noi nio o imou voa kiaro sala maba se kekai iruruputani koa kiaro voko vaito keru?”

⁴¹Nio seta eri kikelake Jisu kasi, “Vota o vouvaemou sea ruqe ama maba poso, ni vota ota ma kovou koa kiaro ni o katimou edolomu, seke uria kativo amu vo voko puaro kajoro ko taku keru.”

⁴²Nio Jisu ta mata eri kiolake sekasi, “Sole meta pui me ataeka ko ikio ko Tabu ama Riki kikovevo? Ko eri kikelako, ‘Koa lado se pade ke erekani kekai keduima pui uri ama ka kikevema, ko ikio erisanama qulepo ama pade ko lado kiadama lado poso azo. Kota vo Baṉara inio soa ereko o eve ni matu aqasiele koko uria kelo,’ kikelako.

⁴³Ni Sokale avo inio aṉata a bazuemela me, vo Baṉara ko lekasa puo ko mauruto ta ota mela kovou me ni o katimou sea qoqono, seke zoriko amu voko soru.”[21]

⁴⁴

⁴⁵Nio se raura kama siama madu ni se Parese madu ke viqa keru Jisu ko podepodeti, seta kekai nianiiake ta Jisu ta se inio o kasemake koa vaini kiaro ko podepodeti kale.

⁴⁶Sole seta kekai zariake tu noqoevo vo, melai seta keta ma ṉake sea matuma vaki, ako sea vaki ta ke tuvevo pueva vo Jisu ta poropita inio sole.