Read Bilua Matiu 24 Bible Online

Matiu 24 - Bilua bible

Matiu 24

¹Ni vo Jisu ta o saqorake koa Jelepade kale azo, ni voko disaipeli madu ta ke olake vokasi, ni keva kasekake koa pado ama Jelepade ni kiadama koko levoano kale ama quli.

²Nio Jisu ta eri kiolake sekasi, “Meta mebe kea koa Jelepade kio? Melai aṉata a bazuemela me, puliama ka pado otu ko lado ta kopa loilou ko ṉaviko zaekale, melai koa kiadama ti kana madu inio ke biresukou,” kiolake.

³Ni vo Jisu ta ota papuake Olive Ore sama Sopu kale, ni voko disaipeli madu ta keva olake vo moizavole ni eri kikelake, “Ṉelai bazueka noi keru inio koa Jelepade ta ko biresuovou, ni noni ama mamola ikio ko ereilou, nio ko mamola puekou ṉoko tova vaito, ni komia peuru ma peuru ko ruvuro,” kikelake.

⁴Nio vo Jisu ta o mati tiorikake ni eri ma kiolake, “Meta vailomo, ni pui zarievo kala tu o saruemelou me.

⁵Ako matu kubo maba madu inio ke kilou ni eri kikevou, ‘Aṉa inio voa Pakio lala vo Baṉara o pitoeveni,’ kikevou, ni ke saruemou matu kubo maba madu.

⁶Ni so keru meme viqou keru ko matuma pazokinio ko bazu ni ke ṉavio kude kanaekinio ko bazu melai meta pui me ṉalou, ako ko quli poso ta kota ereilou inio sole, melai pui ko ikio peuru ma peuru ko paitopaito.

⁷Ni matumatuma peuru poso ta ko kati pazokiniou kama edoloma matumatuma peuru poso, ni toutou poso ta kokai kasakeovou kama edoloma toutou poso, ni matuma nioṉe ni nunu ta ko elou komia kiadakoi.

⁸Melai koa kiadama quli ta ko rekoreko kai tanito meqora ko alilo ko tola jari pala inio.

⁹“Ni koa taku kale inio maba poso ta ke noqoemelou ni ke tolaemelou ni ke vouvaemelou me, ni kiadama maba madu ta ke melai kaikuapou, ako meta aṉa me luluelani mela sole.

¹⁰Ni matu kubo maba madu ta ke vaekou seko oqu, ni keta saiqorikiniou ke ṉavio kude ni keta kanaekiniou.

¹¹Ni matu kubo lipalipa kama poropita madu melai keta puratou ni ke saruemou matu kubo madu.

¹²Ni kiadama ruqe ta kota zarou ti matu kubo maba madu ko roquano melai lekuleku kota elou.

¹³Melai vo o pizato ala, ti obeta barolo ala koa taku ko paitopaito kale, vo inio o pakiovou.

¹⁴Ni komia Uri ama Bazu vo Baṉara ko lekasa puo ko ta kekai bazubazutou komia peuru ma peuru kale tu kiadamu ta ke roveovou viqo. Sai kazo inio peuru ma peuru ta ko ruvurou,” kiolake vo Jisu.

¹⁵Ni Jisu ta mata eri kiolake sekasi, “Meta me qelou ṉaloṉalo ama kapakapato ko quli ko ke lojoeko ama Jelepade ko Tabu ama Zaekale, ni ko ikio vo poropita Daniela o kasekema.” (Ni meme diromikoa mela komia pesipesi ta uria paqumukomo ko kikolani.)

¹⁶“Ni me Jiudia rana mu mela, so keru me qelou keru ko quli, meta me joqoilou sopu poso kale.

¹⁷Ni ṉo ṉobeta eloa laṉa ṉoko pade ko okate[23] ta pui ṉoqai ubaitou amaqeo kovole ṉoko lomaloma pade ko poro kale ama.

¹⁸Ni ṉo ṉobeta eloa laṉa ṉoko kiaro kale ta pui ṉoqai ubaitou saqoro pade kasi kovole ṉoko suma.

¹⁹“Matuma duki sama quli se molu ama niania poso kasi ni se molele meqora poso samu kasi ko ereilo ama koa taku kale!

²⁰Sole meta vararaitomo vo Baṉara kasi tu meko soqoilo ta pui sarosaroro keru ni Sabati ṉaniu keru ko elou!

²¹Ako komia tapata ta matu ruqe ama ko elou kobe kai paloasou kiadama lulavo ama tapata, vo Baṉara o ereke keru azo komia peuru ma peuru ti kobeta baroa vairutu. Ni tova ta mata pui kopa ereilou soama quli.

²²Melai vo Baṉara ta lula o vatoeka tu puju o ikou koa matuma tapata ko taku, melai vota pui puju o ikou tea, puliala inio opa saevo. Melai voko pitopito ama maba poso ko tauvemo kale avo inio Baṉara ta puju o ikou koa taku.

²³Ni kala ta eri kiovou, ‘Keatini, nei nio voa Pakio vo Baṉara o pitoeveni!’ ma ‘Unei nio vo!’ kiovou melai meta pui tuvevo me ivou.

²⁴Ako se lipalipa kama Pakio vo Baṉara o pitoemeni kikelani ni se lipalipa kama poropita madu ta ke podakou, ni ke erekou aqasiele ama quli ni ṉavaṉavala kama quli tu ke saruemo se lula vo Baṉara o pitoemeni, kebe mai roveovou ta.

²⁵Sole meta didielomo, ako aṉata a melai bazueka komi quli puliako koa taku barolo.

²⁶“Ni se maba poso ta ke bazuemelou me ni eri kikevou, ‘Vota kiṉu kale inio,’ kikevou, melai meta pui me ziovou vailivole vo sai, ni seta mata eri kikevou, ‘Vota pade ko poro kale inio,’ kikevou, melai meta pui tuvevo me imou se.

²⁷Ako aṉa maba a eveni lala a vaitou keru ta ke lelou kiadama maba madu omadeuvo kapi ko laqato jari ṉaniu o peatakoi vasi azo ti o sulupakoi vasi.

²⁸Sai meme qeloa koi ko belama ko padoilo sai nio ko inabu ko evakoi. So jaria lai nianiio ni lelo inio ke elou kiadama maba poso aṉa maba a eveni lala a vaitou keru,” kiolake vo Jisu.

²⁹Ni vo Jisu ta mata eri kiolake sekasi, “Ni koa tapata poso ko tova nio vo ṉaniu ta kutumana inio obeta elou, ni kaboso ta pui opa talolou, ni ko suti ta kota pialou aukale azo, ni ko okate ama pizato ta kota vezovezokatou.

³⁰Ni ko quli ko tova inio aṉa maba a eveni lala ko mamola ta ko podakou aukale, nio kiadama maba madu miduku kale amu ta duki keta elou ni keta zialou, ni aṉa maba a eveni lala ta a qilou aukale ama leikale ni seta ke lelou aṉa a bizato ni aqasiele ama ṉaṉaidara sate.

³¹Ni kala mateana ta o matu puzekou ko kuvili, ni aṉata a joroemou aṉako mateana madu komia peuru ma peuru kale, ni seta ke padoemou aṉako pitopito ama maba poso kiadama zaekale azo.”

³²Ni vo Jisu ta mata eri kiolake sekasi; “Aṉata mata a melati nianiiekikou vo piqi ore ko kalo. So keru voko kata ko vezupa keru ni voko leko melai ko korokoro puta ti mebe kai nianiia inio ta koa taku kiadama quli ko qotupo ko taku ta sipole.

³³Ni so jari nio mata so keru meme qelou keru kiadama quli ko aṉa a melai bazuekako quli ko ereilou keru inio meta meqai nianiiovou ta koa vairu ama taku vo Baṉara ko lekasa puo ko ta sipole kota barolou.

³⁴Ni aṉata mata a bazuemela me, komia kiadama quli ta ko ereilou puliako erisaṉama maba madu vou.

³⁵Au ni miduku ta kota ruvurou melai aṉako bazubazu ta maba pui ti pui kopa ruvurou,” kiolake.

³⁶Nio vo Jisu ta mata eri kiolake sekasi; “Puliala maba ta okai nianiia koa ṉaniu ni taku aṉa maba a eveni lala a vaitou keru; se aukale ama mateana madu melai pui kekai nianiia, ni a ṉavi melai pui aqai nianiia, melai aṉavo Mama Baṉara o kiada inio okai nianiia koa taku.

³⁷Melai aṉa maba a eveni lala ta a vaitou, so keru maba poso kebeta ziovou keru seko kerukeru pide ama saevo kale Noa ko taku keru ke erekema jari ama.

³⁸Ako puliako matuma nioqololo kilo seta ke vuatake ni ke nozutake, ni lasive poso ni rekoreko ta ke raekiniake kiada keru jari, ti kobeta baroake koa ṉaniu Noa o zazi keru voko vaka topi.

³⁹Ako seta pulia quli ke kerukeruekake sole se komai barolo ama, melai ota podolo kale ko matuma nioqololo ta komai baroake ni ko duluemake se. Ni so inio ko kalo avo aṉa maba a eveni lala a vaitou keru.

⁴⁰Nio koa taku keru omuqa kidi ta qopeta iruruputou kiaro kasi, ni kala ta aba vovou, kala ta a vaevou.

⁴¹Ni omuqa rekoreko ta omadeu mujarato qopeta elou vuiti ko epa tu qo ereko ko palava, ni ka pado ta aba kovou ka pado ta a vaekou sai.

⁴²“Sole meta vailomo, ako meta pui meqai nianiia aṉa mevo Lekasa lala a vaitou keru sole.

⁴³Ako vo pade ko raki sala ta okai nianiiovou koa taku so keru vo kuilokuilo ala maba okai kilo ama taku, ta vota ota vailou inio ni pui opa maronou, tu voa kuilokuilo ala ta pui o amaqeovou voko pade kale kuilole.

⁴⁴Sole me melai inainaomo, ako aṉa maba a eveni lala ta a vaitou koa taku kale ko me pui me baqumukako kale sole,” kiolake.

⁴⁵Ni Jisu ta mata eri kiolake, “Sole lala inio kerula kala ni nianiiola nabulu? Vo raura o iveni vovo lekasa, tu o mati vailou koa pade kale ke iruruputani ni oma puarikou ko sailao koa korokoroti ama vuato ko taku kale.

⁴⁶Voa nabulu ta ota matu zoleilou vovo lekasa o vaitou keru ni o kelou keru voko uri ama iruruputo vo obe erekako.

⁴⁷Aṉata a bazuemela me, voa lekasa ta raura o ivou nea nabulu tu vo inio o kati vailou kiadama voko lomaloma.

⁴⁸Melai vota ruqe ala nabulu o elou ni vota eri kiovou o ṉaviko bulo kale, ‘Aṉavo lekasa ta pui taukavole opa vaito ala inio,’ kiovou,

⁴⁹ti vota o taniekou ruterutemo vokale amu se nabulu poso ni vota ota vuatou ni ota saposapoitou seke saposapoekani ko piza kama ju sate,

⁵⁰nio voa lekasa ta o vaitou kama pado ṉaniu kale voa nabulu pui okai kuirikako ni koa taku vo pui okai nianiiako kale.

⁵¹Ni vovo lekasa ta matuma koqotato o kativou tu vota okai zomanou se kekai lipalipaitani ko sidopu ke kovo ama koqotato. Nio sai nio seke zialoa koi ni taka ke roinaroinaekoa koi,” kiolake vo Jisu.