Read Bilua Matiu 28 Bible Online

Matiu 28 - Bilua bible

Matiu 28

¹Nio Sabati ko tova, Sade raneto puliako ṉaniu peato inio Maqidalama Mere ni ka pado Mere ta qo olake tu qopa kelo ko kea.

²Ni matuma nunu kota eve ni vo Baṉara vo mateana ta o saqorake aukale azo ni o vatutikake koa kea ko veutu kale ama lado, ni oka papuake.

³Ni voa mateana ko loilo ta kapi jaria simanamanato, ni voko suma ta sinou jaria pumapuma.

⁴Ni sea solodia madu ta keta va matu ṉake ni keta dederake ni keta piake miduku kale maba o vouvani jari.

⁵Ni vo mateana ta eri kiolake nioqa omuqa rekoreko kasi, “Qeta pui ṉalo. Ako aṉata a qelai nianiia qeta qe kueva velole vo Jisu vo ke patoeveni.

⁶Melai vota puliala koi, ako vota lula ota saevala sole, omadeuvo o ṉavi lula melati kiovevo jari. Tu kueko ni pa keko voko tupu ko tekulakoi.

⁷Ni olako taukavole ni pa bazuemoko voko disaipeli madu, ni eri kiqevou, ‘Vota ota saevala voukale azo, ni vota ota ziovou Qalili meko kuleto, ni sai nio meba velou,’ kiqevou, ni ko ikio aṉako bazu qekasi.”

⁸So sole nioqata taukavole qo vaekake koa kea ṉalole melai mata qota zoleike, tu qopa bazuemo sea disaipeli madu.

⁹Ni ota podoloa koi nio Jisu ta o toraekake nioqa keve tona ni eri kiolake, “Bule ta qe tona.” Ni nioqata qova vatutake ni qota va noqoekake voko kiti, ni qo ilusivake.

¹⁰Ni Jisu ta eri kiolake nioqa kasi, “Qeta pui ṉalo. Melai olako ni bazuemomo aṉako visi poso tu ke zio Qalili, ni sai nio seta ke lelou aṉa,” kiolake vo Jisu.

¹¹Ni so keru nioqa omuqa rekoreko zio maqa, inio sea solodia madu seke kati vailani koa kea ta ke vaitake koa matu peuru kale ni kemai bazuekake se raura kama siama madu kiadama quli koko ereivake sai.

¹²Nio se raura kama siama madu ni se tanatanamu ta ke padoivake ni ke nakanakatatake, ni ke katimake matuma takula se solodia madu,

¹³eri kio sama bazu sate, “Meta eri kimevou, voko disaipeli madu ta ke kuela raisi ipu kale ni kepa kuilikala voko tupu, me maroṉo maqa, kimevou.

¹⁴Ni vo Qavuna ta o viqou meko maroṉo, ta eṉe inio ṉe vati pesipesitou tu kota pui meko saruilo ko elou,” kikelake.

¹⁵Nio seke kati vailani ta ke koake koa takula ni ke erekake se mati kikelani, ni Sokale avo inio koa bazu ta ko aera Jiu amu kasi ti kobeta baroa vairutu melai.

¹⁶Ni sea toni omadeu disaipeli madu ta keta olake Qalili ni keta kailake sopu kale, sai Jisu o soroemekoi.

¹⁷Ni so keru ke vea keru vo, seta ke ilusivake vo, melai kake ta niuniala kebe va evake.

¹⁸Ni Jisu ta sipole o imake se ni eri ma kiolake, “Baṉara ta o katile aṉa ko pizato tu aṉa inio lekasa aqa elou kiadama quli aukale ama ni miduku kale ama.

¹⁹Tu meta olamo kiadama maba poso kasi kiadama peuru ma peuru kale, tu aṉako disaipeli imomo se, ni bapitaiso imomo se vo Mama, ni vo Meqora, ni vo Tabu ala Auvana ko ṉikale,

²⁰ni nianiie-kimomo se tu ke zoriko kiadama quli aṉa a melai bazuekema. Ni aṉata a elou me sase kiada keru, ti kobeta barolou komia peuru ma peuru ko paitopaito ko taku,” kiolake vo Jisu.