Read Bilua Matiu 3 Bible Online

Matiu 3 - Bilua bible

Matiu 3

¹Koa taku kale, vo Jisu obeta eva keru Nazareti, inio vo Jone Bapitaiso ta o taniekake bazubazuto Jiudia rana lealea kama zaekale.

²Nio vota eri kiolake se maba poso kasi, “Meta liliziomo meko ruqe kale azo, ako vo Baṉara ko lekasa puo ta matu sipole sole,” kiolake.

³Jone Bapitaiso inio voa maba vo poropita Aisea o kaseveni vo eri va kioveni, “Kala maba ta o velavelaova lealea kama zaekale matuma kora kale, ‘Meta va inainaekomo vo Baṉara ko keve, ni sare ikomo koa keve sai vo o taliovoa koi,’ ” ka kiovema.

⁴Vo Jone ko sabosabo ta kameli ko toukale ke erekema ni vota okai bibuliovini tabarioma tupu biaṉa ko, ni voko sailao ta sesekalau ni piru ama variqore ko epa.

⁵Nio matuma vaki ta ko padoivake vokasi Jerusalema azo ni pado ama Jiudia ranʼazo ni Jodani sukuru ko sipole ama peuru poso kale azo tu ke didieko voko bazubazu.

⁶Ni sea maba poso ta kekai eraeraoke seko sarueko poso Baṉara kasi, nio vo Jone ta bapitaiso o imake se Jodani sukuru kale.

⁷Nio so keru vo Jone o meve keru matu kubo Parese madu ni se Sadiusi madu seke kuevini vokasi bapitaiso elole, sai nio vota eri ma kiolake, “Meta dole jaria ruqea mela! Noi sole inio meta eri kimela, ‘Eṉeta bapitaiso ṉe elou inio eṉeta ṉeda ka lapasou koa koqotato vo Baṉara o soroeko ama,’ kimela?

⁸Meta erekomo ko quli ko kasa ko iko ama ko meta lula meda lilizia meko sarueko poso kale azo kikovo ama quli, saita inio me qilou ni bapitaiso me elou.

⁹Ni meta pui eri kio me ṉavio kude, ‘Ebarahami nio eṉevo taite kio, ni so inio eṉeta ṉeda ka lapasou koko kilo ama koqotato,’ pui so kimevou. Aṉata a bazuemela me, vo Baṉara ta o roveo nio varieko vo Ebarahami ko vikuvikula komia lado kale sole!

¹⁰Vo Baṉara ta omadeuvo kala maba jari, vo lula o inainaovani tu o rakirakiekou ko ore poso. Kiadama ore poso ko pui uri ama epa sama vota o roekou ni o risaekou uza kale. Omadeuvo so jari nio o imou vo Baṉara se maba poso pui sidopu ke erekani.

¹¹“Aṉata bapitaiso a imela mea maba poso mela jukale tu ko mamola pueko meko lilizio, melai vo mainio opa kilo ala aṉako tova inio bapitaiso o imelou me Tabu ala Auvana ni uza kale, ni vota matu raura kala aṉa kasi azo, ni aṉata pui a male tu vovo mabaku va elo tu ava boriko voko kiti ko kiazakiaza.

¹²Ako vo inio o titizimou kiadama maba poso, omadeuvo vo iruruputo ko maba jari, vo o pitasikani ko vuiti ko uri ama epa ni o padoekani ko voko modo sapera topi, melai koko turu ta ota ka siqaekani lalamato pidea bainoma uza kale,” kiolake.

¹³Nio koa taku kale inio Jisu ta o baroake Jodani sukuru kale Qalili ranʼazo, tu Jone ta bapitaiso o ivo vo.

¹⁴Melai vo Jone ta o kaqarivake vo Jisu ni eri kiolake vokasi, “Aṉata pui a maleizika tu a bapitaiso pueṉou ṉo melai ṉo inio ṉo male tu bapitaiso ilo aṉa,” kiolake.

¹⁵Melai vo Jisu ta o vati tiorikake vo ni eri kiolake vokasi, “Komia taku kale ta vaeka tu so ko kalo tu aniqeta qe korotiko vo Baṉara oka zariani tu qe ereko,” kiolake. So sole vo Jone ta o opatikake vo Jisu ko zario.

¹⁶Nio soa bapitaiso o evake vo Jisu ti obeta kailake inio ju ko tana topi. Koa taku kale inio ko au ta kota veukaziake vokasi, nio vota o veake vo Baṉara vo Auvana vai saqoro vo, ni voa Auvana ko velo ta ova kurou jari ala.

¹⁷Ni vota o viqake ko kora aukale azo ama ko eri kikovema, “Ṉota a ṉavivo Meqora ṉa, a matu roqueṉani ṉa. Ṉo inio aṉa aṉa matu zoleivani ṉa,” kikovema.