Read Bilua Matiu 6 Bible Online

Matiu 6 - Bilua bible

Matiu 6

¹Nio vo Jisu ta obeta olake bazubazuto ni eri kiolake sekasi, “Meta balauvomo tu pui me erekou meko uri ama iruruputo ubutiania tu maba poso ta ke mela lelo me. Ako meta me erekou ko quli ubutiania ta meta pui meba ṉeamukou ko reketekete mevo aukale ala Mama kasi azo sole.

²“So sole so keru meme buarou keru tu me dauvemou se olaquamu meta pui meqai aikailou ko omadeuvo se kekai lipalipaitani ko sidopu ke kavani jari, meko ilusato ko pade kale ni matu keve tona. Seta so ke kava tu maba poso ta ke melo se tu ke rauraemo. Melai aṉata a bazuemela me, seko reketekete ta puliama Baṉara kasi, ako seta lula ke koa seko reketekete maba kasi sole.

³Melai meta pui so me qalou, so keru meme buarou keru tu me dauvevou keru kala olaquala maba, melai meta erekomo moiza kalo kale tu puliala ta o melai nianiiovou meko puaro.

⁴Ni koa kalo kale ta me ṉavi me qiada inio meqai nianiiovou meko puaro. Ni mevo Mama vo o keani meko moiza kalo kale ama puaro ta reketekete saṉa o imelou me.”

⁵Nio vo Jisu ta obeta olake bazubazuto ni eri kiolake sekasi, “So keru meme vararaitou keru meta pui se kekai lipalipaitani ko sidopu jari me qalou, se keka matu zariani tu vararaito ilusato ko pade kale ni matu keve tona tu kiadama maba poso ta ke melo se. Aṉata a bazuemela me, seta puliama reketekete samu vo Baṉara kasi, ako seta lula ke koa seko reketekete maba poso kasi sole.

⁶Melai meta pui so me qalou. So keru meme vararaitou keru meta me amaqeovou meko lose kale ni me dibulikou ko veutu, ni me vararaitou mevo mutamuta kala Mama kasi, vo puliala o veani, ni mevo Mama vo o keani ko meme erekako quli moiza kalo kale, vo inio o katimelou me meko reketekete.

⁷“So keru meme vararaitou keru, meta pui meqai pesiovou kubo utube ama pesio poso omadeuvo se kutumana kamu ke kavani jari, se kekai vararaitani matu kubo pesio tu seko baṉara poso ta keta ma viqo se seko rosi ama vararaito.

⁸Meta pui se jari me qalou. Ako mevo Mama ta lula okai nianiia ko quli me meqa zariako, puliako me pasevo vo.

⁹So sole meme vararaitou keru meta eri jari nio kimevou, ‘Eṉevo aukale ala Mama ṉa, ṉoko tabu ama ṉi ta ko raurailou,

¹⁰ṉoko lekasa puo ko kilo, ṉoko vatolo ta ko luluilou miduku kale omadeuvo kota ko luluiva aukale jari.

¹¹Katiṉela eṉe komia ṉaniu ko maleziko ama sailao,

¹²ni taṉela akoeka eṉeko sarueko poso ko lula eṉe ṉe erekako, omadeuvo eṉeta ṉeda ma akoeka jari seke saruekani eṉe kasi.

¹³Ni pui vaeṉelo eṉe zolizolito kale, melai pakieṉela eṉe Setani ko ruqe ama pizato kale azo. Emeni.’

¹⁴Sole meta meda ma akoekou seko sarueko seke saruekani mekasi, nio mevo aukale ala Mama ta ota mela akoekou meko sarueko.

¹⁵Melai meta pui meda ma akoekou meko lolo poso ko sarueko, ta mevo aukale ala Mama ta pui opa tamela akoekou meko sarueko.”

¹⁶Nio vo Jisu ta obeta olake bazubazuto ni eri kiolake sekasi, “Ni so keru meme dabutabuovou keru meko pui vuato kale, meta pui se kekai lipalipaitani ko sidopu ke kavani jari me qalou. Seko melo ta luapiluapi amu jari ke eva, tu kiadama maba ta ke melou se, ta seta keta tabutabua kio. Melai tuvevo avole aṉata a bazuemela me, seta puliama reketekete samu Baṉara kasi, ako seta lula ke koa seko reketekete maba poso kasi sole.

¹⁷Melai meme dabutabuovou keru meko pui vuato kale ta pusaekomo meko loilo ni zutiekomo meko tou,

¹⁸tu puliala ta okai nianiiovou meko pui vuato, melai mevo Mama, vo puliala o veani, vo inio okai nianiiovou ko. Ni mevo Mama, vo o keani ko meme erekako quli moiza kalo kale, vo inio o katimelou me meko reketekete.”

¹⁹Nio vo Jisu ta obeta olake bazubazuto ni eri kiolake sekasi, “Meta pui padoeko meko batiro miduku kale, ako sai nio kota moatakou ni ko narakou, ni sai ta se kuilokuilo amu ta ke puraekou ko pade, ni ke kuilikou ko batiro sole.

²⁰Melai meta padoekomo meko tuvevo ama batiro aukale, meko ereko kale koa uri ama iruruputo vo Baṉara oka zariako, tu vota o katimelou noqola kama reketekete. Ako aukale ta pui kopa moatakou ni pui kopa narakou sole, ni puliala kuilokuilo ala ta opa puraekou koa pade tu o kuilikou koa batiro.

²¹Ako sai meko batiro ko evakoi, sai nio meko bulo kale ama kerukeru ko eloa koi kiada keru.

²²“Ṉoko vilu ta ṉoko tupu ko zakaremu. Ni ṉoko vilu ta uri ama ko elou ta ṉoko pado ama tupu ta matu zakaremu, melai ṉoko vilu ta ruqe ko elou ta ṉoko tupu ta matu kutumana ikio. So sole ṉoko tupu tonama zakaremu ta kutumana ko elou ta matu kutumana kota elou.”[6]

²⁴Nio vo Jisu ta obeta olake bazubazuto ni eri kiolake sekasi, “Puliala nabulu ta opa roveovou ka nabulupute omuqa lekasa. Vota o roquevou kala ni ovai keduvou kala. Vota ovai masapou kala, ni vota dikidauputole ova nabuluputou kala. Omadeuvo so jari nio meta pui meba roveovou omadeu ilusiko Baṉara ni batiro.

²⁵“So inio aṉata a bazuemela me tu meta pui tiṉoliṉoli kai elo ko quli meme quovo ama ni me nozueko ama quli ko meko tupu ko saevikako, ma ko quli meme qiako ama quli. Ako saevo ta kobe qulepa sailao azo ni tupu ta kobe qulepa sabosabo azo sole.

²⁶Kemo ko okale ama biaṉabiaṉa poso, seta pui ke papaka kama rui ni pui ke sabereputa, ni puliama varivaripato ko pade samu sai seke padoekakoi ko sailao, melai vo mevo aukale ala Mama inio o niaekani koa biaṉabiaṉa poso. Meta meda ka matu qulepa ko biaṉabiaṉa poso, so sole pui ukaka opa imelou me.

²⁷Keatini; kala me azo ta o rovea rosikiko voko saevo tiṉoliṉoli elo kale kio? Maba pui!

²⁸Ni noi sole inio meta tiṉoliṉoli meqai eva meko sabosabo? Ako keatini, ko piru ama sisusisu koko qotupako ta pui ko iruruputako ni pui ko turutako koko sabosabo.

²⁹Melai aṉata a bazuemela me, komia omadeu pado sisusisu ko ileile ta kobe kai paloasa vo matu batiro ala Lekasa Solomone o kiakema sabosabo ko ileile.

³⁰Ni koa sisusisu poso ta ko eva seulele valuvalu matu puju ama taku kale, ni koko tova maba poso ta ke saqaeka ni ke risaeka uza kale. Melai vo Baṉara ta matu ileilea zaloniko o eve koa seulele sisusisu kale. Meta pui me duvevo puekou ta vo Baṉara inio o saboemelou me sabosabo kale, omadeuvo vo o zalonika jari ko seulele sisusisu kale, ta meko oqu ta matu silo ama ikio.

³¹So sole pui me matu kerukeruekou ko eri, ‘Loma quli kio animeta me quovou, ni loma quli kio animeta me nozuekou ni loma quli kio me qiakou?’

³²Ako komia peuru ma peuru kale ama kutumana kamu inio kuleto ke ikani kiada keru ko sailao ni ju seko vailizato kale. Melai meta pui se jari me qalou, ako mevo aukale ala Mama ta lula okai nianiia kiadama quli saevo ko korotikako quli sole.

³³So sole meta atanaziekomo koa saevo vo Baṉara ko lekasa puo kale ama ni me erekou vo oka zariako quli, nio vota mata o katimelou kiadama quli meko saevo ko korotiko ama.

³⁴So sole meta pui matu kerukerueko ko lea ko ereilo ama quli tu upotuqu ko imelo. Lea ko ereilo ama ta ko ṉavi leama, kiadama ṉaniu ta ko kati kueva ko ṉaviṉavi ko tapata ṉaniu ko sole.”